1 इतिहास 14

दाऊद का यरुशलेम म्ह स्थिर होणा

1 सोर के राजा हीराम नै दाऊद कै धोरै दूत भेज्जे, अर उसका भवन बणाण नै देवदार की लाकड़ी अर राजमिस्त्री अर बढ़ई भेज्जे। 2 फेर दाऊद नै पक्‍का होग्या के यहोवा नै उस ताहीं इस्राएल का राजा करकै स्थिर करया सै, क्यूँके उसकी प्रजा इस्राएल के निमित्त उसका राज्य भोत घणा बढ़ ग्या था।

3 यरुशलेम म्ह दाऊद नै और जनानियाँ तै ब्याह कर लिया, अर उनतै बेट्टे-बेटियाँ पैदा होई। 4 उसकै जो सन्तान यरुशलेम म्ह पैदा होई, उनके नाम ये सै : शम्मू, शोबाब, नातान, सुलैमान; 5 यिभार, एलीशू, एलपेलेत; 6 नोगह, नेपेग, यापी, एलीशामा, 7 बेल्यादा अर एलीपेलेत।

पलिश्तियाँ की हार

8 जिब पलिश्तियाँ नै सुण्या के पूरे इस्राएल का राजा होण खात्तर दाऊद का अभिषेक होया, फेर सारे पलिश्तियाँ नै दाऊद की खोज म्ह चढ़ाई करी; या सुणकै दाऊद उनका सामना करण नै लिकड़ ग्या। 9 पलिश्ती आए अर रपाईम नाम की तराई म्ह धावा बोल्या। 10 फेर दाऊद नै परमेसवर तै पूच्छया, "के मै पलिश्तियाँ पै चढ़ाई करुँ? अर के तू उननै मेरै हाथ म्ह कर देगा?" यहोवा नै उसतै कह्या, "चढ़ाई कर, क्यूँके मै उननै तेरै हाथ म्ह कर दियुँगा।" 11 ज्यांतै जिब वे बालपरासीम नै आए, फेर दाऊद नै उन ताहीं ओड़ैए मार लिया; फेर दाऊद नै कह्या, "परमेसवर मेरे जरिये मेरे दुश्मनां पै पाणी की धारा कै बराबर टूट पड़या सै।" इस कारण उस जगहां का नाम बालपरासीम*14:11 बालपरासीम बालपरासीम का मतलब सै प्रभु नै भाग लिया या प्रभु के जरिये तै फट ग्या। धरया गया। 12 ओड़ै वे अपणी मूर्तियाँ नै छोड़गे*14:12 अपणी मूर्तियाँ नै छोड़गे प्राचीन युग की जात्तां म्ह अपणे देवत्यां नै लेकै युद्ध म्ह जाणा एक सामान्य रीत थी जो इस अंधबिश्वास तै शरुआत होया के मूर्तियाँ म्ह कुछ गुण सै अर उनके जरिये सेना नै कामयाबी हासिल होवै सै।, अर दाऊद के हुकम तै वे आग लगाकै फूँक दिए गए।

13 फेर दुसरी बार पलिश्तियाँ नै उसे तराई म्ह धावा बोल्या। 14 फेर दाऊद नै परमेसवर तै फेर पूच्छया, अर परमेसवर नै उसतै कह्या, "उनका पिच्छा न कर; उनतै मुड़कै तूत के दरखतां कै स्याम्ही तै उनपै छाप्पा मार। 15 अर जिब तूत के दरखतां की चोट्टी म्ह तै सेना के चालण की जिसी आहट तन्‍नै सुण पड़ै, फेर यो जाणकै युद्ध करण नै लिकड़ जाणा के परमेसवर पलिश्तियाँ की सेना नै मारण कै खात्तर तेरै आग्गै जा रहया सै।" 16 परमेसवर के इस हुकम कै मुताबिक दाऊद नै करया, अर इस्राएलियाँ नै पलिश्तियाँ की सेना ताहीं गिबोन तै लेकै गेजेर ताहीं मार लिया। 17 फेर दाऊद की कीर्ति सारे देशां म्ह फैलगी, अर यहोवा नै सारी जात्तां के मन म्ह उसका डर भर दिया।