1 जिब दाऊद अपणे भवन म्ह रहण लाग्या, फेर दाऊद नै नातान नबी तै कह्या, "देख, मै तो देवदार के बणे होए घर म्ह रहया करुँ सूं, पर यहोवा के वाचा का सन्दूक तम्बू म्ह रहवै सै।" 2 नातान नै दाऊद तै कह्या, "जो किमे तेरै मन म्ह हो उसनै कर, क्यूँके परमेसवर तेरै गैल सै।"

3 उसे दिन-रात नै परमेसवर का यो वचन नातान कै धोरै पोहच्या, "जाकै मेरे दास दाऊद तै कह, 4 ‘यहोवा यों कहवै सै: मेरे निवास कै खात्तर तू घर बणवाण ना पावैगा। 5 क्यूँके जिस दिन तै मै इस्राएलियाँ नै मिस्र तै ले आया, आज कै दिन ताहीं मै कदे घर म्ह न्ही रहया; पर एक तम्बू तै दुसरे तम्बू ताहीं अर एक निवास तै दुसरे निवास ताहीं आया-जाया करुँ सूं। 6 जित्त-जित्त मन्‍नै सारे इस्राएलियाँ कै बीच म्ह आणा-जाणा करया, के मन्‍नै इस्राएल के न्यायियाँ म्ह तै जिन ताहीं मन्‍नै अपणी प्रजा की रुखाळ करण नै ठैहराया था, किसे तै इसी बात कदे कही के थम माणसां नै मेरै खात्तर देवदार का घर क्यूँ न्ही बणवाया? 7 आखर: इब तू मेरे दास दाऊद तै इसा कह, के सेनाओं का यहोवा न्यू कहवै सै, के मन्‍नै तो तेरै ताहीं भेड़शाला तै अर भेड़-बकरियाँ कै पाच्छै-पाच्छै फिरण तै इस इरादे तै बुला लिया, के तू मेरी प्रजा इस्राएल का प्रधान हो जावै; 8 अर जित्त किते तू आया अर गया, ओड़ै मै तेरै गैल रहया, अर तेरे सारे दुश्मनां ताहीं तेरै स्याम्ही तै नाश करया सै। इब मै तेरे नाम नै धरती के बड़े-बड़े माणसां के नाम्मां कै बराबर बड़ा कर दियुँगा। 9 अर मै अपणी प्रजा इस्राएल कै खात्तर एक जगहां ठहराऊँगा, अर उसनै स्थिर करुँगा ताके वो अपणी ए जगहां म्ह बसे रहवैं अर कदे घुमक्‍कड़ ना हो; अर कुटिल माणस उन ताहीं नाश ना करण पावैगें, जिसा के पैहले दिनां म्ह करैं थे, 10 बलके उस बखत भी जिब मै अपणी प्रजा इस्राएल कै उप्पर न्यायी ठहराऊँ था; आखर मै तेरे सारे दुश्मनां नै दबा दियुँगा। फेर मै तन्‍नै या भी बताऊँ सूं, के यहोवा तेरा घर बणाए राक्खैगा। 11 जिब तेरी उम्र पूरी हो ज्यागी अर तन्‍नै अपणे पितरां कै गैल जाणा पड़ैगा, फेर मै तेरै बाद तेरे वंश ताहीं जो तेरे बेट्टयाँ म्ह तै होगा, खड़या करकै उसके राज्य नै स्थिर करुँगा*। 12 मेरै खात्तर एक घर वोए बणावैगा, अर मै उसकी राजगद्दी नै सदा स्थिर राखूँगा। 13 मै उसका पिता ठहरूँगा अर वो मेरा बेट्टा ठहरैगा; अर जिसी मन्‍नै अपणी करुणा उसपै तै जो तेरे तै पैहले था हटाई, उसे ढाळ मै उसपै तै ना हटाऊँगा*, 14 बलके मै उस ताहीं अपणे घर अर अपणे राज्य म्ह सदा स्थिर राखूँगा अर उसकी राजगद्दी सदा अटल रहवैगी।’" 15 इन सारी बात्तां अर इस दर्शन कै मुताबिक नातान नै दाऊद ताहीं समझा दिया।

16 फेर दाऊद राजा भित्तर जाकै यहोवा के स्याम्ही बैठ्या, अर कहण लाग्या, "हे यहोवा परमेसवर! मै के सूं? अर मेरा घराना के सै? के तन्‍नै मेरै ताहीं उरै ताहीं पोहचाया सै? 17 हे परमेसवर! यो तेरी निगांह म्ह छोट्टी सी बात होई, क्यूँके तन्‍नै अपणे दास के घरान्‍ने कै बारै म्ह भविष्य के भोत दिनां ताहीं की चर्चा करी सै, अर हे यहोवा परमेसवर! तन्‍नै मेरै ताहीं ऊँच्‍चे पद* का माणस सा जाण्या सै। 18 जो महिमा तेरे दास पै दिखाई गई सै, उसकै बारै म्ह दाऊद तेरे तै और के कह सकै सै? तू तो अपणे दास नै जाणै सै। 19 हे यहोवा! तन्‍नै अपणे दास कै निमित्त अर अपणे मन कै मुताबिक यो बड़ा काम करया सै, के तेरा दास उस ताहीं जाण ले। 20 हे यहोवा! जो किमे मन्‍नै अपणे कान्‍नां तै सुण्या सै, उसकै मुताबिक तेरै बराबर कोए न्ही, अर ना तन्‍नै छोड़ और कोए परमेसवर सै। 21 फेर तेरी प्रजा इस्राएल कै भी तुल्य कौण सै? वो तो धरती भर म्ह एक ए जात सै, उस ताहीं परमेसवर नै जाकै अपणी खुद की प्रजा करण नै छुड़ाया, ज्यांतै के तू बड़े अर डरावणे काम करकै अपणा नाम करै, अर अपणी प्रजा कै स्याम्ही तै जो तन्‍नै मिस्र तै छुड़ा ली थी, जात-जात के माणसां नै लिकाड़ दे। 22 क्यूँके तन्‍नै अपणी प्रजा इस्राएल ताहीं अपणी सदा की प्रजा होण कै खात्तर ठैहराया, अर हे यहोवा! तू आप उसका परमेसवर ठहरया। 23 ज्यांतै, इब हे यहोवा, तन्‍नै जो वचन अपणे दास के अर उसकै घरान्‍ने के बारै म्ह दिया सै, वो सदा अटल रहवै, अर अपणे वचन कै मुताबिक ए कर। 24 अर तेरा नाम सदा अटल रहवै, अर या कहकै तेरी बड़ाई सदा करी जावै*, के सेनाओं का यहोवा इस्राएल का परमेसवर सै, बलके वो इस्राएल ए कै खात्तर परमेसवर सै, अर तेरा दास दाऊद का घराना तेरै स्याम्ही स्थिर रहवै। 25 क्यूँके हे मेरे परमेसवर, तन्‍नै या कहकै अपणे दास पै प्रगट करया सै के मै तेरा घर बणाए राखूँगा, इस कारण तेरे दास नै तेरै स्याम्ही प्रार्थना करण का होसला होया सै। 26 अर इब हे यहोवा तू ए परमेसवर सै, अर तन्‍नै अपणे दास ताहीं यो भलाई करण का वचन दिया सै; 27 अर इब तन्‍नै खुश होकै, अपणे दास के घरान्‍ने पै इसी आशीष दी सै, के वो तेरै सम्मुख सदा बण्या रहवै, क्यूँके हे यहोवा, तू आशीष दे चुक्या सै, ज्यांतै वो सदा आशिषित बण्या रहवै।"