1 अर एक दिन शैतान* नै इस्राएल कै खिलाफ उठकै, दाऊद ताहीं उकसाया के इस्राएलियाँ की गिणती ले। 2 फेर दाऊद नै योआब अर प्रजा के हाकिमां तै कह्या, "थम जाकै बेर्शेबा तै ले दान ताहीं के इस्राएल की गिणती लेकै मेरै ताहीं बताओ, कै मै जाण लूँ के वे कितणे सैं।" 3 योआब नै कह्या, "यहोवा की प्रजा के कितणे ए क्यूँ ना हों, वो उन ताहीं सौ गुणा बढ़ा दे; पर हे मेरे प्रभु! हे राजा! के वे सारे राजा कै अधीन न्ही सैं? मेरा प्रभु इसी बात क्यूँ चाहवै सै? वो इस्राएल पै दोष लागण का कारण क्यूँ बणै?" 4 फेर भी राजा का हुकम योआब पै प्रबल होया। फेर योआब विदा होकै सारे इस्राएल म्ह घूमकै यरुशलेम नै बोहड़ आया। 5 फेर योआब नै प्रजा की गिणती का जोड़, दाऊद तै सुणाया अर सारे तलवार चलाण आळे माणस इस्राएल के तो ग्यारह लाख, अर यहूदा के च्यार लाख सत्तर हजार ठैहरे। 6 पर उन म्ह योआब नै लेवी अर बिन्‍यामीन ताहीं ना गिण्या, क्यूँके वो राजा के हुकम तै घृणा करैं था

7 अर दाऊद का यो हुकम परमेसवर नै बुरी लाग्या, ज्यांतै उसनै इस्राएल ताहीं मारया। 8 अर दाऊद नै परमेसवर तै कह्या, "यो काम जो मन्‍नै करया, वो महापाप सै। पर इब अपणे दास का अधर्म दूर कर; मेरे तै तो बड़ी बेकूफी होई सै।" 9 फेर यहोवा नै दाऊद के दर्शी गाद तै कह्या, 10 "जाकै दाऊद तै कह, ‘यहोवा यो कहवै सै कै मै तेरै ताहीं तीन विपत्तियाँ दिखाऊँ सूं, उन म्ह तै एक नै चुण ले, के मै उसनै तेरै पै गेरू।’" 11 फेर गाद नै दाऊद कै धोरै जाकै उसतै कह्या, "यहोवा न्यू कहवै सै, के जिस ताहीं तू चावै उसनै चुण ले : 12 या तो तीन साल का अकाळ पड़े; या तीन महिन्‍ने तक तेरे बिरोधी तन्‍नै नाश करदे रहवै, अर तेरे दुश्मनां की तलवार तेरे पै चाल्दी रहवै; या तीन दिन तक यहोवा की तलवार चाल्‍ले, यानिके मरी देश म्ह फैल्‍लै अर यहोवा का दूत इस्राएली देश म्ह च्यांरु ओड़ विनाश करदा रहवै। इब सोच, के मै अपणे भेज्जणआळे तै के जवाब देऊँ।" 13 दाऊद नै गाद तै कह्या, "मै बड़े संकट म्ह पड़या सूं; मै यहोवा कै हाथ म्ह पड़ूँ, क्यूँके उसकी दया भोत बड़ी सै; पर माणस कै हाथ म्ह मेरै ताहीं पड़णा ना पड़ै।"

14 फेर यहोवा नै इस्राएल म्ह मरी फैलाई, अर इस्राएल म्ह सत्तर हजार माणस मर मिटे। 15 फेर परमेसवर नै एक दूत यरुशलेम ताहीं भी उसका नाश करण नै भेज्या; अर वो नाश करणे ए पै था, के यहोवा दुःख देण तै दुखी होया, अर नाश करण आळे दूत तै कह्या, "बस कर; इब अपणा हाथ खींच ले।" अर यहोवा का दूत यबूसी ओर्नान के खलिहाण कै धोरै खड़या था। 16 अर दाऊद नै नजर ठाकै देख्या के यहोवा का दूत हाथ म्ह खींची होई अर यरुशलेम कै उप्पर बढाई होई एक तलवार लिये होए अकास कै बीच खड़या सै, फेर दाऊद अर अगुवे टाट* पहरे होए मुँह कै बळ गिरे। 17 फेर दाऊद नै परमेसवर तै कह्या, "जिसनै प्रजा की गिणती लेण का हुकम दिया था, के वो मै न्ही सूं? हाँ, जिसनै पाप करया अर घणी बुराई करी सै, वो तो मै ए सूं। पर इन भेड़-बकरियाँ नै के करया सै? ज्यांतै हे मेरे परमेसवर यहोवा! तेरा हाथ मेरे पिता के कुण्बे कै बिरुध्द हो, पर तेरी प्रजा के बिरुध्द ना हो, के वे मारे जावैं।"

18 फेर यहोवा के दूत* नै गाद ताहीं दाऊद तै या कहण का हुकम दिया के दाऊद चढ़कै यबूसी ओर्नान कै खलिहाण म्ह यहोवा की एक वेदी बणावै। 19 गाद के इस वचन कै मुताबिक जो उसनै यहोवा के नाम तै कह्या था, दाऊद चढ़ ग्या। 20 फेर ओर्नान नै पाच्छै फिरकै दूत ताहीं देख्या, अर उसके च्यांरु बेट्टे जो उसकै गैल थे छिप गए, ओर्नान तो गेहूँ काढै था। 21 जिब दाऊद ओर्नान के धोरै आया, फेर ओर्नान नै नजर करकै दाऊद ताहीं देख्या अर खलिहाण तै बाहर जाकै धरती ताहीं झुककै दाऊद ताहीं दण्डवत करया। 22 फेर दाऊद नै ओर्नान तै कह्या, "इस खलिहाण की जगहां मन्‍नै दे दे, के मै इसपै यहोवा कै खात्तर एक वेदी बणाऊँ, उसका पूरा दाम लेकै उसनै मेरै ताहीं दे, के या बिप्दा प्रजा पै तै दूर करी जावै।" 23 ओर्नान नै दाऊद तै कह्या, "इसनै ले ले, अर मेरे प्रभु राजा नै जो कुछ भावै वो वाए करै; सुण, मै तन्‍नै होमबलि कै खात्तर बळध अर ईधण कै खात्तर दाँवने के हथियार अर अन्‍नबलि कै खात्तर गेहूँ, यो सारे मै देऊँ सूं।" 24 राजा दाऊद नै ओर्नान तै कह्या, "ना, मै जरुर इसका पूरा दाम ए देकै इसनै मोल ल्यूँगा; जो तेरा सै, उसनै मै यहोवा कै खात्तर ना ल्यूँगा, अर ना मुफ्त का होमबलि चढ़ाऊँगा।" 25 फेर दाऊद नै उस जगहां कै खात्तर ओर्नान ताहीं छः सौ शेकेल सोन्‍ना* तौलकै दिया। 26 फेर दाऊद नै ओड़ै यहोवा की एक वेदी बणाई अर होमबलि अर मेलबलि चढ़ाकै यहोवा तै प्रार्थना करी, अर उसनै होमबलि की वेदी पै सुर्ग तै आग गिराकै उसकी सुण ली। 27 फेर यहोवा नै दूत तै हुकम दिया; अर उसनै अपणी तलवार फेर म्यान म्ह कर ली।

28 यो देखकै के यहोवा नै यबूसी ओर्नान के खलिहाण म्ह मेरी सुण ली सै, दाऊद नै उसे बखत ओड़ै बलिदान करया। 29 यहोवा का निवास जो मूसा नै जंगळ म्ह बणाया था, अर होमबलि की वेदी, ये दोन्‍नु उस बखत गिबोन के ऊँच्‍ची जगहां पै थे। 30 पर दाऊद परमेसवर कै धोरै उसकै स्याम्ही ना जा सक्या, क्यूँके वो यहोवा के दूत की तलवार* तै डर ग्या था।