1 इतिहास 13

पवित्र सन्दूक का यरुशलेम म्ह पोहचाया जाणा

1 दाऊद नै सहस्‍त्रपतियाँ, शतपतियाँ अर सारे प्रधानां*13:1 प्रधानां हो सकै सै: इसी व्यवस्था दाऊद तै पैहले सारे गोत्रां म्ह कर दी गई थी पर दाऊद वो पैहला आदमी था जिसनै इन प्रधानां म्ह माणसां के प्रतिनिधित्व ताहीं पिछाणा था के उनतै जनता के बारें म्ह सलाह देई जावै अर उन ताहीं कोए राजनैतिक पद दिया जावै। तै सलाह ली। 2 फेर दाऊद नै इस्राएल की सारी मण्डळी तै कह्या, "जै यो थमनै आच्छा लाग्गै अर म्हारे परमेसवर की इच्छा हो, तो इस्राएल के सारे देशां म्ह जो म्हारे भाई रह गए सैं अर उनकै गैल जो याजक अर लेवीय अपणे-अपणे चराई आळे नगरां म्ह रहवै सैं, उनकै धोरै भी यो खबर भेज्जे के म्हारै धोरै कठ्ठे हो जाओ, 3 अर हम अपणे परमेसवर के सन्दूक नै अपणे उरै ले आए; क्यूँके शाऊल के दिनां म्ह हम उसके धोरै न्ही जावां थे।" 4 अर सारी मण्डळी नै कह्या, के वे इसाए करैगें, क्यूँके या बात उन सारे माणसां की नजरां म्ह उचित मालुम होई।

5 फेर दाऊद नै मिस्र के शीहोर तै ले हमात*13:5 ले हमात हमात शहर के दक्षिण म्ह पहाड़ी दर्रा की घाटी ताहीं के सारे इस्राएलियाँ ताहीं ज्यांतै कठ्ठा करया, के परमेसवर के सन्दूक नै किर्यत्यारीम तै ले आए। 6 फेर दाऊद सारे इस्राएलियाँ नै गैल लेकै बाला नै गया, जो किर्यत्यारीम भी कुह्वावै था अर यहूदा के भाग म्ह था, के परमेसवर यहोवा का सन्दूक ओड़ै तै ले आए; वो तो करूबां पै विराजण आळा सै, अर उसका नाम भी योए लिया जावै सै। 7 फेर उन ताहीं परमेसवर का सन्दूक एक नई गाड़ी पै चढ़ाकै, अबीनादाब के घर तै लिकाड़या, अर उज्जा अर अह्यो उस गाड़ी नै चलाण लाग्गे। 8 दाऊद अर सारे इस्राएली परमेसवर कै स्याम्ही तन-मन तै गीत गान्दे अर वीणा, सारंगी, डफ, झाँझ अर तुरहियाँ बजावैं थे।

9 जिब वे किदोन कै खलिहाण ताहीं आए, फेर उज्जा नै अपणा हाथ सन्दूक थामण नै बढ़ाया, क्यूँके बळधां नै ठोक्‍कर खाई थी। 10 फेर यहोवा का कोप उज्जा पै भड़क उठ्या; अर उसनै उन ताहीं मारया क्यूँके उसनै सन्दूक पै हाथ लगाया था; वो ओड़ैए परमेसवर कै स्याम्ही मर ग्या। 11 फेर दाऊद नाराज होया, ज्यांतै के यहोवा उज्जा पै टूट पड़या था; अर उसनै उस जगहां का नाम पेरेसुज्जा*13:11 पेरेसुज्जा उज्जा की सजा राख्या, यो नाम आज ताहीं बण्या सै। 12 उस दिन दाऊद परमेसवर तै डरकै कहण लाग्या, "मै परमेसवर के सन्दूक नै अपणे उरै किस तरियां ले आऊँ?" 13 फेर दाऊद सन्दूक नै अपणे उरै दाऊदपुर म्ह ना ल्याया, पर ओबेदेदोम नाम के गती कै ओड़ै लेग्या। 14 अर परमेसवर का सन्दूक ओबेदेदोम कै उरै उसके घरान्‍ने कै धोरै तीन महिन्‍ने ताहीं रहया, अर यहोवा नै ओबेदेदोम के घराने पै अर जो किमे उसका था उसपै भी आशीष दी।