1 इतिहास 12

सिकलग म्ह दाऊद के बिन्‍यामीनी समर्थक

1 जिब दाऊद सिकलग म्ह कीश के बेट्टे राजा शाऊल के डर के मारे छिप्या रहवै था, फेर ये उसकै धोरै ओड़ै आए, अर ये उन वीरां म्ह तै थे जो युद्ध म्ह उसके मददगार थे। 2 ये धनुर्धारी थे, जो दाएँ-बाएँ, दोनु हाथ्थां तै गोफन के पत्थर अर धनुष के तीर चला सकैं थे; अर ये शाऊल के भाईयाँ म्ह तै बिन्‍यामीनी*12:2 बिन्‍यामीनी बिन्यामिनियों की धनुष कला उरै व्यक्त सै। (1 इति. 8:40, 2 इति 14:8) बाएँ हाथ के इस्तमाल म्ह उनकी दक्षता न्यायियाँ के वृत्तान्त म्ह बताई गई सै (न्याय. 3:15 अर पार्श्व टिप्पणी) अर गोफन चलाण म्ह उनकी उत्कृष्टता भी व्यक्त सै। थे, 3 खास तो अहीएजेर अर दूसरा योआश था जो गिबावासी शमाआ का बेट्टा था; फेर अज्मावेत के बेट्टे यजीएल अर पेलेत, फेर बराका अर अनातोती येहू, 4 अर गिबोनी यिशमायाह जो तीसों म्ह तै एक वीर अर उनकै उप्पर भी था; फेर यिर्मयाह, यहजीएल, योहानान, गदेरावासी योजाबाद, 5 एलूजै, यरीमोत, बाल्याह, शेमर्याह, हारूपी शपत्याह, 6 एल्काना, यिश्शिय्याह, अजरेल, योएजेर, याशोबाम, जो सारे कोरहवंशी थे, 7 अर गदोरवासी यरोहाम के बेट्टे योएला अर जबद्याह। 8 फेर जिब दाऊद जंगळ के गढ़ म्ह रहवै था, फेर ये गादी जो शूरवीर थे, अर युद्ध विद्या सीखे होए अर ढाल अर भाला काम म्ह ल्याण आळे थे, अर उनके मुँह शेर के जिसे अर वे पहाड़ी मृग कै बराबर तेज भाजण आळे थे, ये अर गादियाँ तै न्यारे होकै उसकै धोरै आए, 9 यानिके खास तो एजेर, दूसरा ओबद्याह, तीसरा एलीआब, 10 चौथा मिश्मन्‍ना, पाँचवाँ यिर्मयाह, 11 छठा अत्तै, सातवाँ एलीएल, 12 आठवाँ योहानान, नौवां एलजाबाद, 13 दसमां यिर्मयाह अर ग्यारहवाँ मकबन्‍नै था, 14 ये गादी खास योद्धा थे, उन म्ह तै जो सबतै छोट्टा था वो तो एक सौ कै उप्पर, अर जो सबतै बड़ा था, वो हजार कै उप्पर था। 15 येए वे सैं, जो पैहले महिन्‍ने म्ह जिब यरदन नदी सारे किनारयाँ कै ऊपर-ऊपर बहवै थी, जद उसकै पार उतरे; अर पूर्व अर पश्चिम दोन्‍नु और की सारी तराई के रहण आळयां ताहीं भजा दिया। 16 कई एक बिन्‍यामीनी अर यहूदी भी दाऊद कै धोरै गढ़ म्ह आए। 17 उनतै मिलण नै दाऊद लिकड़या अर उनतै कह्या, "जै थम मेरै गैल मित्रभाव तै मेरी मदद करण नै आए हो, फेर तो मेरा मन थारे तै लाग्या रहवैगा; पर जै थम मन्‍नै धोक्खा देकै मेरे दुश्मनां कै हाथ पकड़वाण आए हो, तो म्हारे पितरां का परमेसवर इसपै नजर करकै डाँटै, क्यूँके मेरे हाथ तै कोए उपद्रव न्ही होया।" 18 फेर आत्मा अमासै म्ह समाया, जो तीसों वीरां म्ह खास था, अर उसनै कह्या,

"हे दाऊद! हम तेरे सां;

हे यिशै के बेट्टे! हम तेरी और के सां,

तेरा कल्याण ए कल्याण हो अर तेरे मददगारां का कल्याण हो,

क्यूँके तेरा परमेसवर तेरी मदद करया करै सै।"

ज्यांतै दाऊद नै उन ताहीं राख लिया, अर अपणे दल के मुखिए ठहरा दिए। 19 फेर किमे मनश्शेई भी उस बखत दाऊद कै धोरै भाज आए, जिब वो पलिश्तियाँ कै गैल होकै शाऊल तै लड़ण नै गया, पर वो उसकी किमे मदद ना कर सक्या, क्यूँके पलिश्तियाँ के सरदारां नै सलाह लेण पै यो कहकै उसतै विदा करया, "वो म्हारे सिर कटवाकै अपणे स्वामी शाऊल तै फेर मिल ज्यागा।" 20 जिब वो सिकलग नै जा रह्या था, फेर ये मनश्शेई उसकै धोरै भाज आए; यानिके अदनह, योजाबाद, यदीएल, मीकाएल, योजाबाद, एलीहू अर सिल्‍लतै जो मनश्शे के हजारां के मुखिए थे। 21 इननै लुटेरयां के दल कै बिरुध्द दाऊद की मदद करी, क्यूँके ये सारे शूरवीर थे, अर सेना के प्रधान भी बण गए। 22 बलके रोज माणस दाऊद की मदद करण नै उसकै धोरै आन्दे रहे, उरै ताहीं के परमेसवर की सेना कै बराबर एक बड़ी सेना बणगी।

23 फेर माणस लड़ण खात्तर हथियार बाँधे होए हेब्रोन म्ह दाऊद कै धोरै ज्यांतै आए के यहोवा कै वचन के मुताबिक शाऊल का राज्य उसके हाथ म्ह करदे : उनके मुखिया की गिणती या सै। 24 यहूदा के ढाल अर भाला लिए होए छः हजार आठ सौ हथियार-बन्द लड़ण नै आए। 25 शिमोनी सात हजार एक सौ त्यार शूरवीर लड़ण नै आए। 26 लेवीय च्यार हजार छः सौ आए। 27 अर हारुन के घराने का प्रधान यहोयादा था, अर उसके गैल तीन हजार सात सौ आए। 28 अर सादोक नाम का एक जवान वीर भी आया, अर उसके पिता के कुण्बे के बाईस प्रधान आए। 29 अर शाऊल के भाई बिन्‍यामीनियाँ म्ह तै तीन हजार आए, क्यूँके उस बखत ताहीं आध्धे बिन्‍यामीनियाँ तै घणे शाऊल के घराने का पक्ष करदे रहे। 30 फेर एप्रैमियां म्ह तै बड़े वीर अर अपणे-अपणे पितरां के घरान्यां म्ह नाम्मी माणस बीस हजार आठ सौ आए। 31 मनश्शे के आध्धे गोत्र म्ह तै दाऊद नै राजा बणाण कै खात्तर अठारह हजार आए, जिनके नाम बताए गए थे। 32 इस्साकारियाँ म्ह तै जो बखत नै पिच्छाणै थे, के इस्राएल नै के करणा उचित सै, उनके प्रधान दो सौ थे; अर उनके सारे भाई उनके हुकम म्ह रहवैं थे। 33 फेर जबूलून म्ह तै युद्ध के सारे ढाळ के हथियार लिए होए लड़ण नै पाँति बाँधण आळे योद्धा पचास हजार आए, वे पाँति बाँधण आळे थे अर चंचल ना थे। 34 फेर नप्ताली म्ह तै प्रधान तो एक हजार, अर उनकै गैल ढाल अर भाला लिए सैंतीस हजार आए। 35 दानियां म्ह तै लड़ण खात्तर पाँति बाँधण आळे अट्ठाईस हजार छः सौ आए। 36 अर आशेर म्ह तै लड़ण नै पाँति बाँधण आळे चाळीस हजार योद्धा आए। 37 अर यरदन पार रहणआळे रूबेनी, गादी अर मनश्शे के आध्धे गोत्रियाँ म्ह तै युद्ध के सारे ढाळ के हथियार लिए होए एक लाख बीस हजार आए।

38 ये सारे युद्ध खात्तर पाँति बाँधण आळे दाऊद नै सारे इस्राएल का राजा बणाण कै खात्तर हेब्रोन म्ह सच्‍चे मन तै आए, अर और सारे इस्राएली भी दाऊद नै राजा बणाण कै खात्तर सहमत थे। 39 वे ओड़ै तीन दिन दाऊद के गैल खान्दे-पीन्दे रहे, क्यूँके उनके भाईयाँ नै उनकै खात्तर तैयारी करी थी, 40 अर जो उनकै लोवै बलके इस्साकार, जबूलून अर नप्ताली तक रहवैं थे, वे भी गधां, ऊँटां, खच्‍चरां अर बळधां पै मैद्दा, अंजीरां अर किशमिश की टिकियाँ, दाखमधु, तेल अर भोजनवस्तु लादकै लाए, अर बळध अर भेड़-बकरियाँ बहुतायत तै लाए; क्यूँके इस्राएल म्ह आनन्द मनाया जा रह्या था।