1 "उस बखत यहोवा नै मेरै तै कह्या, ‘पैहली पटियाँ की ढाळ पत्थर की दो और पटियाँ गड़ ले, अर उननै लेकै मेरै धोरै पहाड़ कै उप्पर आ ज्या, अर लाकड़ी का एक सन्दूक भी बणवा ले। 2 अर मै उन पटियाँ पै वेए वचन लिक्खूँगा, जो उन पैहली पटियाँ पै थे, जिन ताहीं तन्‍नै तोड़ दिया, अर तू उननै उस सन्दूक म्ह धरिये।’ 3 फेर मन्‍नै किक्‍कर की लाकड़ी का एक सन्दूक बणवाया, अर पैहली पटियाँ की ढाळ पत्थर की दो और पटियाँ गढ़ी, फेर उननै हाथ्थां म्ह लिए होए पहाड़ पै चढ़ ग्या। 4 अर जो दस वचन यहोवा नै सभा कै दिन पहाड़ पै आग कै बिचाळै तै थारै ताहीं कहे थे, वेए उसनै पैहल्या की ढाळ उन पटियाँ पै लिक्खे; अर उन ताहीं मेरे तै सौंप दिया। 5 फेर मै पहाड़ तै तळै उतर आया, अर पटियाँ नै अपणे बणवाए होए सन्दूक म्ह धर दिया; अर यहोवा के हुकम कै मुताबिक वे ओड़ैए धरी होई सैं।"

6 "(तब इस्राएली याकानियाँ कै कुयां तै चालकै मोसेरा ताहीं आए। ओड़ै हारुन मर ग्या, अर उस ताहीं ओड़ैए माट्टी दी गई; अर उसका बेट्टा एलीआजर उसकी जगहां पै याजक का काम करण लाग्या। 7 वे ओड़ै तै चाल कै गुदगोदा ताहीं, अर गुदगोदा तै योतबाता ताहीं चाल्‍ले, इस देश म्ह पाणी की नदी सैं। 8 उस बखत यहोवा नै लेवी गोत्र तै इस करकै न्यारा करया के वे यहोवा के करार का सन्दूक ठाया करैं, अर यहोवा कै स्याम्ही खड़े होकै उसकी सेवा-पाणी करया करैं, अर उसकै नाम तै आशीर्वाद दिया करैं, जिस ढाळ के आज कै दिन तक होन्दा आण लागरया सै। 9 इस कारण लेवियाँ नै अपणे भाईयाँ कै गेल्या कोए हिस्सा या अंश कोनी मिल्या; यहोवा ए उनका खुद का हिस्सा सै, जिस तरियां के तेरे परमेसवर यहोवा नै उनतै कह्या था।)"

10 "मै तो पैहल्या की ढाळ उस पहाड़ पै चाळीस दिन अर चाळीस रात ठहरया रहया, अर उस बार भी यहोवा नै मेरी सुणी, अर तेरै ताहीं नाश करण की इच्छा छोड़ दी। 11 फेर यहोवा नै मेरै तै कह्या, ‘उठ, अर तू इन माणसां की अगुवाई कर, ताके जिस देश कै देण ताहीं मन्‍नै उनके पूर्वजां तै कसम खाकै कह्या था उस म्ह वे जाकै उसनै अपणे अधिकार म्ह कर लें।’"

12 "इब, हे इस्राएल, तेरा परमेसवर यहोवा तेरै तै इसकै सिवा और के चाहवै सै, के तू अपणे परमेसवर यहोवा का भय मान्‍नै, अर उसके सारे रास्तयां पै चाल्‍लै, उसतै प्यार राक्खै, अर अपणे पूरे मन अर अपणे सारे जी तै उसकी सेवा करै 13 अर यहोवा के जो-जो हुकम अर विधि मै आज तन्‍नै सुणाऊँ सूं उन ताहीं अपणावै, जिसतै तेरा भला हो? 14 सुण, सुर्ग अर सबतै ऊँच्‍चा सुर्ग भी, अर धरती अर उस म्ह जो कुछ सै, वो सारा तेरे परमेसवर यहोवा का ए सै; 15 फेर भी यहोवा नै तेरे पूर्वजां तै स्नेह अर प्यार राख्या, अर उनकै पाच्छै थारे ताहीं जो उनकी सन्तान हो सारे देशां के माणसां कै बीच म्ह तै छाँट लिए, जिसा के आज कै दिन जाहिर सै। 16 इस करकै अपणे-अपणे मन का खतना करो, अर आग्गै ताहीं जिद्दी ना रहो। 17 क्यूँके थारा परमेसवर यहोवा वोए ईश्‍वरां का परमेसवर अर प्रभुआं का प्रभु सै, वो महान् पराक्रमी अर भययोग्य परमेसवर सै, जो किसे का पक्षपात न्ही करदा अर ना घूस लेवै सै। 18 वो अनाथां अर बिधवा का न्याय चुकावै, अर परदेशियाँ तै इसा प्यार करै सै के उननै खाणा अर कपड़े देवै सै। 19 इस करकै थम भी परदेशियाँ तै प्यार भाव राखियो; क्यूँके थम भी मिस्र देश म्ह परदेशी थे। 20 अपणे परमेसवर यहोवा का भय मानियो; उस्से की सेवा करियो अर उस्से तै लिपटे रहियो, अर उस्से कै नाम की कसम खाईयों। 21 वोए थारी स्तुति कै जोग्गा सै; अर वोए थारा परमेसवर सै, जिसनै तेरै गेल्या वे बड़े महानता कै अर भयानक काम करे सैं, जिन ताहीं तन्‍नै अपणी आँखां तै देख्या सै। 22 तेरे पुरखाँ जिब मिस्र देश म्ह गए जिब सत्तर माणस थे; पर इब तेरे परमेसवर यहोवा नै तेरी गिणती अकास के तारयां की तरियां घणीए कर दी सै।"