व्यवस्थाविवरण 25

निष्पक्षता अर दया

1 "जै माणसां कै बिचाळै कोए झगड़ा हो, अर वे न्याय करवाण खात्तर न्यायियाँ कै धोरै जावैं, अर वे उनका न्याय करैं, तो बेकसूर ताहीं बेकसूर अर कसूरवार ताहीं कसूरवार ठहरावै। 2 अर जै कसूरवार मार खाण के लायक ठहरै, तो न्यायी उस ताहीं गिरवाकै अपणे स्याम्ही जिसा उसका दोष हो उसकै मुताबिक कोड़े गिणकै लगवावै। 3 वो उस ताहीं चाळीस कोड़े तक लगवा सकै सै, इसतै घणे न्ही लगवा सकदे; इसा ना हो के इसतै घणे मार खाण तै तेरा भाई तेरी निगांह म्ह तुच्छ ठहरै।"

4 "नाज लिकाड़ते बखत चाल्दे होए बळध का मुँह ना बाँधिये।"

मरे होए भाई कै प्रति जिम्मेदारी

5 "जिब कई भाई गैल रहंदे हों, अर उन म्ह तै एक बेऊलादा मर जावै, तो उसकी जनान्‍नी का ब्याह दुसरे गोत्र तै न्ही करया जावै; उसकै पति का भाई उसकै धोरै जाकै उस ताहीं अपणी घरआळी कर ले, अर उसतै पति कै भाई का धर्म पालन करै। 6 अर जै पैहल्ड़ा छोरा उस जनान्‍नी तै पैदा हो वो उस मरे होए भाई कै नाम का ठहरै, जिसतै के उसका नाम इस्राएल देश म्ह तै मिट न्ही जावै। 7 जै उस जनान्‍नी कै पति कै भाई नै उसतै ब्याह करणा न्ही भावै, तो वो जनान्‍नी नगर कै फाटक पै बुजुर्ग माणसां कै धोरै जाकै कहवै, ‘मेरे पति कै भाई नै अपणे भाई का नाम इस्राएल देश म्ह बणाए राक्खण तै मना कर दिया सै, अर मेरै तै पति के भाई का धर्म पालन न्ही करणा चाहन्दा।’ 8 फेर उस नगर के बुजुर्ग माणस उस आदमी ताहीं बुलवाकै उस ताहीं समझावै; अर जै वो अपणी बात पै अड़या रहवै, अर कहवै, ‘मन्‍नै इसतै ब्याह करणा न्ही भान्दा,’ 9 तो उसके भाई की घरआळी उन बुजुर्ग माणसां कै स्याम्ही उसकै धोरै जाकै उसके पायां तै जूत्ती तारै, अर उसकै मुँह पै थूकदे; अर कहवै, ‘जो आदमी अपणे भाई कै वंश नै चलाणा ना चाहवै उसतै इस्से ढाळ बरताव करया जावैगा।’ 10 फेर इस्राएल देश म्ह उस आदमी का यो नाम पड़ैगा, यानिके जूत्ती तारे होए आदमी का घराना।"

कई ढाळ के नियम

11 "जै दो आदमी आप्पस म्ह मारपीट करदे हों, अर उन म्ह तै एक की घरआळी अपणे पति नै मारण आळे कै हाथ तै छुड़ाण कै खात्तर धोरै जावै, अर अपणा हाथ बढ़ाकै उसके गुप्त अंग ताहीं पकड़ै, 12 तो उस जनान्‍नी का हाथ काट दिये; उसपै तरस ना खाइये।"

13 "अपणी थैल्‍ली म्ह कई ढाळ के यानिके घटदे-बढ़दे बट्टे ना राखिये। 14 अपणे घर म्ह कई ढाळ के, यानिके घटदे-बढ़दे माप ना राखिये। 15 तेरे बट्टे अर माप पूरे-पूरे अर धर्म के हों; ज्यांतै के जो देश तेरा परमेसवर यहोवा तन्‍नै देवै सै उस म्ह तेरी उम्र घणी हो। 16 क्यूँके इसे काम्मां म्ह जितने कुटिलता करै सै वे सारे तेरै परमेसवर यहोवा की निगांह म्ह घृणित सै।"

अमालेकियाँ तै बदला

17 "याद राख के जिब तू मिस्र देश तै लिकड़कै आण लागरया था तब अमालेक नै तेरै तै राह म्ह के करया, 18 यानिके उन ताहीं परमेसवर का भय न्ही था; इस कारण उसनै जिब तू राह म्ह थक्या-माँदा था, फेर तेरै पै चढ़ाई करकै जितने कमजोर होण कै कारण सबतै पाच्छै थे उन सारया ताहीं मारया। 19 इस करकै जिब तेरा परमेसवर यहोवा उस देश म्ह, जो वो तेरा हिस्सा करकै तेरै अधिकार म्ह कर देवै सै, तन्‍नै चौगरदे के सारे दुश्मनां तै आराम दे, फेर अमालेक का नाम धरती पै तै मिटा दिये; अर थम इस बात नै ना भूलियो।"