1 जै तू अपणे परमेसवर यहोवा के सारे हुकम, जो मै आज तेरै ताहीं सुणाऊँ सूं, चौकसी तै पूरी करण नै ध्यान लाकै उसकी सुणै, तो वो तन्‍नै धरती की सारी जात्तां म्ह सबतै बढ़कै बणावैगा। 2 फेर अपणे परमेसवर यहोवा की सुणण कै कारण ये सारे आशीर्वाद तेरै पै पूरे होवैगें। 3 धन्य हो तू नगर म्ह, धन्य हो तू खेत म्ह। 4 धन्य हो तेरी सन्तान, अर तेरी धरती की उपज, अर गां अर भेड़-बकरी आदि पशुआं कै बच्‍चे। 5 धन्य हो तेरी टोकरी अर तेरा आटा गूंँधण का बरतन। 6 धन्य हो तू भित्तर आन्दे बखत, अर धन्य हो तू बाहर जान्दे बखत*।

7 यहोवा इसा करैगा के तेरे बैरी जो तेरै पै चढ़ाई करैगें वे तेरै तै हार जावैंगे; वे एक राह तै तेरै पै चढ़ाई करैंगे, पर तेरै स्याम्ही तै सात राह तै होकै भाज जावैंगे। 8 तेरै खत्यां पै अर जितने काम्मां म्ह तू हाथ लगावैगा उन सारया पै यहोवा आशीष देवैगा; इस करकै जो देश तेरा परमेसवर यहोवा तन्‍नै देवै सै उस म्ह वो तन्‍नै आशीष देवैगा। 9 जै तू अपणे परमेसवर यहोवा के हुकमां नै मान्दे होए उसकै रास्तयां पै चाल्‍लै, तो वो अपणी कसम कै मुताबिक तेरे ताहीं अपणी पवित्र प्रजा करकै स्थिर राक्खैगा। 10 अर धरती के देश-देश के सारे माणस या देखकै, के तू यहोवा का कुह्वावै सै, तेरै तै डर ज्यागें। 11 अर जिस देश कै बारै म्ह यहोवा नै तेरै पूर्वजां तै कसम खाकै तन्‍नै देण खात्तर कह्या था, उस म्ह वो तेरी सन्तान की, अर धरती की उपज की, अर डांगरां की बढ़दी करकै तेरी भलाई करैगा। 12 यहोवा तेरै खात्तर अपणे आकाशरुप्पी उत्तम भण्डार ताहीं खोल कै तेरी धरती पै बखत पै मिह बरसाया करैगा, अर तेरे सारे काम्मां पै आशीष देवैगा; अर तू भोत सी जात्तां ताहीं उधार देवैगा, पर किसे तै तन्‍नै उधार लेणा न्ही पड़ैगा। 13 अर यहोवा तन्‍नै पूँछ न्ही, बल्के सिर ए ठहरावैगा, अर तू तळै न्ही, पर उप्पर ए रहवैगा; जै परमेसवर यहोवा के हुकम जो मै आज तन्‍नै सुणाऊँ सूं, तू उनकै मानण म्ह मन लाकै चौकसी करै; 14 अर जिन वचनां का मै आज तन्‍नै हुकम दियुँ सूं उन म्ह तै किसे तै दाएँ या बाएँ मुड़कै पराए देवत्यां कै पाच्छै ना होइये, अर ना उनकी सेवा करिये।

15 "पर जै तू अपणे परमेसवर यहोवा की बात ना सुणै, अर उसके सारे हुकम अर नियमां का पालन करण म्ह जो मै आज सुणाऊँ सूं चौकसी न्ही करैगा, तो ये सारे श्राप तेरै पै आण पड़ैगें। 16 श्रापित हो तू नगर म्ह, श्रापित हो तू खेत म्ह। 17 श्रापित हो तेरी टोकरी अर तेरा आटा गूंँधण का बरतन। 18 श्रापित हो तेरी सन्तान, अर धरती की उपज, अर गां अर भेड़-बकरियाँ कै बच्‍चे। 19 श्रापित हो तू भित्तर आन्दे बखत, अर श्रापित हो तू बाहर जान्दे बखत।"

20 "फेर जिस-जिस काम म्ह तू हाथ लगावै, उस म्ह यहोवा जिब ताहीं तन्‍नै श्राप देन्दा, अर डरान्दा, अर धमकी देन्दा रहवैगा, जिब ताहीं तू मिट ना जावै, अर तावळी तै नाश ना हो जावै; यो इस कारण होवैगा के तू यहोवा नै त्याग कै दुष्ट काम करैगा। 21 अर यहोवा इसा करैगा के मरी तेरै म्ह फैल कै उस बखत ताहीं लाग्गी रहवैगी, जिब ताहीं जिस धरती के हकदार होण कै खात्तर तू जाण लागरया सै उसपै तै तेरा अन्त ना हो जावै। 22 यहोवा तन्‍नै क्षयरोग तै, अर बुखार, अर डाह, अर बड्डी जळण तै, अर तलवार,* अर झुलस, अर गेरूई तै मारैगा; अर ये उस बखत ताहीं तेरा पिच्छा करदे रहवैगें, जिब ताहीं तेरा सत्यानाश ना हो जावै। 23 अर तेरे सिर कै उप्पर अकास पीत्तळ का, अर तेरे पैर कै तळै धरती लोहवै की हो जावैगी। 24 यहोवा तेरै देश म्ह पाणी कै बदलै रेत अर धूळ बरसावैगा; वो अकास तै तेरै पै उरै ताहीं बरसैगी के तेरा सत्यानाश हो ज्यागा।"

25 "यहोवा तन्‍नै दुश्मनां तै हरवावैगा; अर तू एक राह तै उनका मुकाबला करण नै जावैगा, पर सात राह तै होकै उनकै स्याम्ही तै भाज जावैगा; अर धरती के सारे राज्याँ म्ह मारया-मारया फिरैगा।"

26 "अर तेरी लाश अकास के कई ढाळ के पक्षियां, अर धरती कै पशुआं का खाणा होवैगी; अर उन ताहीं कोए भगाण आळा न्ही होवैगा। 27 यहोवा तन्‍नै मिस्र देश कै जिसे फोड़े, अर बवासीर, अर दाद, अर खुजली तै इसा पीड़ित करैगा, के तू ठीक ना हो सकैगा। 28 यहोवा तेरै ताहीं बावळा अर आन्धा कर देगा, अर तेरे मन नै भोत घणा डरा देवैगा; 29 अर जिस तरियां आन्धा अंधियारे म्ह टटोळै सै उस्से तरियां ए तू दिन दुपहरी म्ह टटोळदा फिरैगा, अर तेरे काम-काज सफल न्ही होवैगें; अर तू सदा सिर्फ अत्याचार सहण करदा अर लुटदा ए रहवैगा, अर तेरा कोए छुड़ाण आळा न्ही होवैगा। 30 तू जनान्‍नी तै ब्याह की बात तो लगावैगा, पर दूसरा आदमी उस ताहीं भ्रष्ट करैगा; घर तो तू बणावैगा, पर उस म्ह बसण न्ही पावैगा; अंगूर के बाग तू लगावैगा, पर उसकै फळ खाण न्ही पावैगा। 31 तेरा बळध तेरी आँखां कै स्याम्ही मारया जावैगा, अर तू उसका माँस खाण न्ही पावैगा; तेरा गधा तेरी आँखां कै स्याम्ही लूट म्ह चल्या जावैगा, अर तेरै ताहीं दुबारा न्ही मिलैगा; तेरी भेड़-बकरी तेरै दुश्मनां कै हाथ लाग ज्यागी, अर तेरी ओड़ तै उनका कोए छुड़ाण आळा न्ही होवैगा। 32 तेरे बेट्टे-बेटियाँ दुसरे देश के माणसां कै हाथ लाग ज्यागें*, अर उनकै खात्तर चाव तै देखदे-देखदे तेरी आँखां की रोशनी रह ज्यागी; अर तेरा कुछ बस न्ही चाल्‍लैगा। 33 तेरी धरती की उपज अर तेरी सारी कमाई एक अनजाणे देश के माणस खा जावैंगे; अर सदा तू सिर्फ अत्याचार सहन्दा अर पिसदा रहवैगा; 34 उरै ताहीं के तू उन बात्तां कै कारण जो अपणी आँखां तै देक्खैगा पागल हो ज्यागा। 35 यहोवा तेरै घुटन्या अर टांगाँ म्ह, बल्के नाखून तै सिर ताहीं असाध्य फोड़े लिकाड़कै तन्‍नै पीड़ित करैगा।"

36 "यहोवा तन्‍नै उस राजा समेत, जिस ताहीं तू अपणे उप्पर ठहरावैगा, तेरै अर तेरै पूर्वजां कै खात्तर अनजाणी एक जात कै बिचाळै पोहचावैगा; अर उसकै बीच म्ह रहकै तू लाकड़ी अर पत्थर कै दुसरे देवत्यां की आराधना अर पूजा करैगा। 37 अर उन सारी जात्तां म्ह जिनकै बीच म्ह यहोवा तन्‍नै पोहचावैगा, ओड़ै के माणसां कै खात्तर तू हैरान होण का, अर उदाहरण अर श्राप का कारण समझया जावैगा। 38 तू खेत म्ह बीज तो घणा सा ले ज्यागा, पर उपज थोड़ी-ए बटोरैगा; क्यूँके टिड्डियाँ उस ताहीं खा जावैगी। 39 तू अंगूर के बाग लाकै उन म्ह काम तो करैगा, पर उनकी दाखां का मधु पीण न्ही पावैगा, बल्के फळ भी तोड़ण न्ही पावैगा; क्यूँके कीड़े उन ताहीं खा जावैंगे। 40 तेरे सारे देश म्ह जैतून के दरखत तो होवैगें, पर उनका तेल तू अपणी देह म्ह लाण न्ही पावैगा; क्यूँके वे झड़ ज्यागें। 41 तेरे बेट्टे-बेटियाँ तो पैदा होवैगें, पर तेरे रहवैंगें न्ही; क्यूँके वे बन्धुवाई म्ह चले जावैंगे। 42 तेरे सारे दरखत अर तेरी धरती की उपज टिड्डियाँ खा ज्यागी। 43 जो परदेशी तेरै बिचाळै रहवैगा वो तेरै तै बढ़दा जावैगा; अर तू खुद घटदा चल्या जावैगा।"

44 "वो तन्‍नै उधार देवैगा, पर तू उस ताहीं उधार ना दे सकैगा; वो तो सिर अर तू पूँछ ठहरैगा। 45 तू जो अपणे परमेसवर यहोवा के दिए होए हुकमां अर विधियाँ नै मानण ताहीं उसकी ना सुणैगा, इस कारण ये सारे श्राप तेरै पै आण पड़ैगें, अर तेरै पाच्छै पड़ै रहवैगें, अर तन्‍नै पकड़ैगें, अर अन्त म्ह तू नाश हो ज्यागा। 46 अर वे तेरै पै अर तेरी पीढ़ी पै सदा कै खात्तर बणे रहकै निशान अर चमत्कार ठहरैगें;"

47 "तू जो सब कुछ की भरपूरी होण पै भी आनन्द अर खुशी कै गेल्या अपणे परमेसवर यहोवा की सेवा न्ही करैगा, 48 इस कारण तन्‍नै भूक्खा, प्यासा, नंगा, अर सारी चिज्जां तै दूर होकै अपणे उन बैरियाँ की सेवा करणी पड़ैंगी जिननै यहोवा तेरै खिलाफ भेज्जैगा; अर जिब ताहीं तू नाश ना हो जावै जिब तक यहोवा तेरे गर्दन पै लोहे का जूआ गेरे राक्खैगा।* 49 यहोवा तेरै खिलाफ दूर तै, बल्के धरती कै सिरे तै जल्दी तै उड़ण आळे उकाब जिसी एक जात ताहीं चढ़ा ल्यावैगा जिसकी भाषा ताहीं तू न्ही समझैगा; 50 उस जात के माणसां का बरताव कठोर होवैगा, वे ना तो बूढ़यां का मुँह देखकै आदर करैंगे, अर ना बाळकां पै दया करैंगे; 51 अर वे तेरे पशुआं कै बच्‍चे अर धरती की पैदावार उरै ताहीं खा जावैंगे के तू नाश हो जावैगा; अर वे तेरै खात्तर ना अन्‍न, अर ना नया दाखमधु, अर ना टटका तेल, अर ना बाछड़े, ना मेम्‍ने छोड़ैगें, उरै ताहीं के तू नाश हो जावैगा। 52 अर वे तेरे परमेसवर यहोवा के दिए होए सारे देश के सारे फाटकां कै भित्तर तन्‍नै घेर राक्खैगें; वे तेरे सारे फाटकां कै भित्तर तन्‍नै उस बखत ताहीं घेरैगें, जिब ताहीं तेरै सारे देश म्ह तेरी ऊँची-ऊँची अर मजबूत शहरपनाह जिनपै तू भरोस्सा करैगा गिर ना जावै। 53 फेर घिर जाण अर उस दुख कै बखत जिस म्ह तेरै बैरी तन्‍नै गेरैंगें, तू अपणे खुद जन्माए बेट्टे-बेटियाँ का माँस जिननै तेरा परमेसवर यहोवा तन्‍नै देवैगा खावैगा। 54 अर तेरै म्ह जो आदमी कोमल अर घणे सुकुमार हो वो भी अपणे भाई, अर अपणी जान तै प्यारी, अर अपणे बचे होड़ बाळकां नै करड़ी निगांह तै देक्खैगा; 55 अर वो उन म्ह तै किसे नै भी अपणे बाळकां के माँस म्ह तै जो वो खुद खावैगा कुछ न्ही देवैगा, क्यूँके घिर जाण अर उस संकट म्ह, जिस म्ह तेरे बैरी तेरे सारे फाटकां कै भित्तर तन्‍नै घेर लेंगे, उसकै धोरै कुछ न्ही रहवैगा। 56 अर तेरै म्ह जो जनान्‍नी उरै ताहीं कोमल अर सुकुमार हो के सुकुमारपण कै अर नम्रता कै मारे धरती पै पैर धरदे भी डरदी हो, वो भी अपणे जान तै प्यारे पति, अर बेट्टे, अर बेट्टी नै, 57 अपणी खेरी, बल्के अपणे जणै होए बाळकां नै करड़ी निगांह तै देक्खैगी, क्यूँके घिर जाण अर उस दुख कै बखत जिस म्ह तेरे बैरी तन्‍नै तेरै फाटकां कै भित्तर घेरे राक्खैगें, वो सारे चिज्जां की कमी कै मारै उननै लुह्क कै खावैगी।"

58 "जै तू इन नियम-कायदे कै सारे वचनां का पालन करण म्ह, जो इस किताब म्ह लिक्खे सैं, चौकसी करकै उस आदरणीय अर भययोग्य नाम का, जो यहोवा तेरै परमेसवर का सै भय ना मान्‍नै, 59 तो यहोवा तन्‍नै अर तेरै वंश नै भयानक-भयानक सजा देवैगा, वे दुष्ट अर घणे दिन रहण आळी बीमारी अर भारी-भारी सजा होवैगी। 60 अर वो मिस्र देश के उन सारे रोगां ताहीं फेर तेरै उप्पर लगा देवैगा, जिनतै तू भय खावै था; अर वे तेरै म्ह लाग्गे रहवैगें। 61 अर जितनी बीमारी आदि सजा इस नियम-कायदे की किताब म्ह कोनी लिक्खी सैं, उन सारया नै भी यहोवा तेरै उरै ताहीं लगा देवैगा, के तेरा सत्यानाश हो जावैगा। 62 अर तू जो अपणे परमेसवर यहोवा की न्ही मान्‍नैगा, इस कारण अकास के तारां के समान अनगिणत होण कै बदलै तेरै म्ह तै थोड़े ए माणस रह जावैंगे। 63 अर जिस तरियां इब यहोवा नै थारी भलाई अर बढ़दी करण तै खुशी होवै सै, उस्से तरियां ए फेर उस ताहीं थारा नाश बल्के सत्यानाश करण तै खुशी होवैगी; अर जिस धरती के हकदार होण नै थम जाण लागरे सो उसपै तै थम उखाड़े जाओगे। 64 अर यहोवा थमनै धरती कै इस सिरे तै लेकै उस सिरे ताहीं के सारे देशां के माणसां म्ह तित्तर-भित्तर करैगा; अर ओड़ै रहकै तू अपणे अर अपणे पुरखाँ कै अनजाणे लाकड़ी अर पत्थर के दुसरे देवत्यां की आराधना करैगा। 65 अर उन जात्तां म्ह तू कदे चैन न्ही पावैगा, अर ना तेरे पैरां ताहीं ठिकाणा मिलैगा; क्यूँके ओड़ै यहोवा इसा करैगा के तेरा मन काम्बदा रहवैगा, अर तेरी आँखां की रोशनी धुँधळी पड़ ज्यागी, अर तेरा मन बेचैन रहवैगा; 66 अर तन्‍नै जीवन का लगातार शक रहवैगा; अर तू थरथराता रहवैगा, अर तेरे जीवन का कुछ भी भरोस्सा न्ही रहवैगा। 67 तेरै मन म्ह जो भय बण्या रहवैगा, अर तेरी आँखां नै जो कुछ दिखदा रहवैगा, उसकै कारण तू तड़कै ए तड़कै नै आह मारकै कहवैगा, ‘साँझ कद होवैगी!’ अर साँझ ताहीं आह मारकै कहवैगा, ‘सबेरा कद होवैगा!’ 68 अर यहोवा तन्‍नै किस्तियाँ पै चढ़ाकै मिस्र देश म्ह उस राह तै बोहड़ा देवैगा, जिसकै बारै म्ह मन्‍नै तेरै तै कह्या था, के वो फेर तेरै देखण म्ह ना आवैगा; अर ओड़ै थम दुश्मनां कै हाथ दास-दास्सी होण कै खात्तर बिकाऊ तो रहोगे, पर थारा कोए ग्राहक ना होवैगा।"