1 "लेवी याजकां का, बल्के सारे लेवी गोत्रियाँ का, इस्राएलियाँ कै गैल कोए हिस्सा या अंश ना हो; उनका खाणा हव्य अर यहोवा का दिया होया हिस्सा हो। 2 उनका अपणे भाईयाँ कै बिचाळै कोए हिस्सा ना हो; क्यूँके अपणे वचन कै मुताबिक यहोवा उनका खुद हिस्सा ठहरया सै। 3 अर चाहे गां-बळध चाहे भेड़-बकरी का मेलबलि हो, उसके करण आळे माणसां की ओड़ तै याजकां का हक या हो, के वे उसका कंधा अर दोन्‍नु गाल अर पेट याजक ताहीं दें। 4 तू उस ताहीं अपणी पैहली पैदावार का अन्‍न, नया दाखमधु, अर टटका तेल, अर अपणी भेड्डां की वा ऊन दिए जो पैहली बार कतरी गई हो। 5 क्यूँके तेरे परमेसवर यहोवा नै तेरै गोत्र म्ह तै उस्से ताहीं छाँट लिया सै, के वो अर उसकी पीढ़ी सदा उसकै नाम तै सेवा-पाणी करण नै उपस्थित होया करैं।"

6 "फेर जै कोए लेवी इस्राएल की बस्तियाँ म्ह तै किसे म्ह, जड़ै वो परदेशी की ढाळ रहन्दा हो, अपणे मन की बड्डी अभिलाषा तै उस जगहां पै जावै जिस ताहीं यहोवा छाँट लेवै, 7 तो अपणे सारे लेवी भाईयाँ की तरियां, जो ओड़ै अपणे परमेसवर यहोवा कै स्याम्ही उपस्थित होवैगें, वो भी उसकै नाम तै सेवा-पाणी करै। 8 अर अपणे पूर्वजां के हिस्से कै मोल नै छोड़ उस ताहीं खाणा का हिस्सा भी उनकै ढाळ मिल्या करै।"

9 "जब तू उस देश म्ह पोहचै जो तेरा परमेसवर यहोवा तन्‍नै देवै सै, फेर ओड़ै की जात्तां कै मुताबिक घिनोणा काम करणा ना सिखिये। 10 तेरै म्ह कोए इसा ना हो जो अपणे बेट्टे या बेट्टी नै आग म्ह होम करकै चढ़ाण आळा, या भावी कहण आळा, या शुभ-अशुभ मुहूर्तां का मानण आळा, या टोन्हा, या तांत्रिक, 11 या बाजीगर, या सियाणा तै पूछण आळा, या भूत साधण आळा, या भूत्तां का जगाण आळा हो। 12 क्यूँके जितने इसे-इसे काम करै सै वे सारे यहोवा कै स्याम्ही घृणित सैं; अर इन्हे घृणित काम्मां कै कारण तेरा परमेसवर यहोवा उन ताहीं तेरै स्याम्ही तै लिकाड़ण पै सै। 13 तू अपणे परमेसवर यहोवा कै स्याम्ही सिध्द बण्या रहिये।"

14 "वे जात जिनका हकदार तू होण पै सै शुभ-अशुभ मुहूर्तां कै मानण आळे अर भावी कहण आळयां की सुण्या करै सैं; पर तेरै ताहीं तेरे परमेसवर यहोवा नै इसा करण न्ही दिया। 15 तेरा परमेसवर यहोवा तेरै बीच म्ह तै, यानिके तेरे भाईयाँ म्ह तै मेरै जिसा एक नबी नै पैदा करैगा; तू उस्से की सुणिये; 16 या तेरी उस बिनती के मुताबिक होवैगा, जो तन्‍नै होरेब पहाड़ कै धोरै सभा कै दिन अपणे परमेसवर यहोवा तै करी थी, ‘मन्‍नै ना तो अपणे परमेसवर यहोवा का शब्द फेर सुणणा, अर ना वो बड्डी आग फेर देखणी पड़ै, कदे इसा ना हो के मर जाऊँ।’ 17 फेर यहोवा नै मेरै तै कह्या, ‘माणस जो कुछ कहवै सै वो सही कहवै सैं। 18 इस करकै मै उनकै खात्तर उनके भाईयाँ कै बिचाळै तै तेरे जिसा एक नबी पैदा करुँगा; अर अपणा वचन उसकै मुँह म्ह डालूँगा; अर जिस-जिस बात का मै उस ताहीं हुकम दियुँगा वोए वो उन ताहीं कह सुणावैगा। 19 अर जो माणस मेरै वो वचन जो वो मेरै नाम तै कहवैगा मान्या न्ही करैगा, तो मै उसका हिसाब उसतै ल्यूँगा। 20 पर जो नबी घमण्ड करकै मेरै नाम तै कोए इसा वचन कहवै जिसका हुकम मन्‍नै उस ताहीं न्ही दिया हो, या पराए देवत्यां कै नाम तै कुछ कहवै, वो नबी मार दिया जावै।’ 21 अर जै तू अपणे मन म्ह कहवै, ‘जो वचन यहोवा नै कोनी कह्या उस ताहीं हम किस तरियां तै पिच्छाण्या?’ 22 तो पिच्छाण या सै के जिब कोए नबी यहोवा कै नाम तै कुछ कहवै; फेर जै वो वचन ना घटै अर पूरा ना हो होवै, तो वो वचन यहोवा का कह्या होया न्ही; पर उस नबी नै वो बात घमण्ड करकै कही सै, तू उसतै भय ना खाइये।"