1 "जो देश थारै पूर्वजां के परमेसवर यहोवा नै थारे हक म्ह लेण नै दिया सै, उस म्ह जिब ताहीं थम धरती पै जिन्दा रहो जिब ताहीं इन विधियाँ अर नियमां कै मानण म्ह चौकसी करियो। 2 जिन जात्तां के थम हकदार होवैगें उनके माणस ऊँच्‍चे-ऊँच्‍चे पहाड़ां या टील्यां पै, या किसे ढाळ के हरे दरखत्त कै तळै, जितने जगहांया म्ह अपणे देवत्यां की भक्ति करैं सैं, उन सारया नै थम पूरी तरियां तै नाश कर दियो; 3 उनकी वेदियाँ नै गेर दियो, उनकी लाठां नै तोड़ दियो, उनकी अशेरा नाम की मूरतां नै आग म्ह जळा दियो, अर उनके देवत्यां की खुदी होई मूरतां नै काटकै गिरा दियो, के उस देश म्ह तै उनका नाम ताहीं मिट ज्या। 4 फेर जिसा वे करैं सैं, थम अपणे परमेसवर यहोवा कै खात्तर उस्से तरियां ना करियो। 5 बल्के जो जगहां थारा परमेसवर यहोवा थारे सारे गोत्र म्ह तै छाँट लेवैगा, के ओड़ै अपणा नाम बणाए राक्खै, उसके उस्से निवास-स्थान कै धोरै जाया करियो; 6 अर ओड़ैए थम अपणे होमबलि, अर मेलबलि, अर दशमांश, अर ठाई होई भेंट, अर मन्‍नत की चीज, अर स्वेच्छाबलि, अर गां-बळध अर भेड़-बकरियाँ कै पहलौठे ले जाया करियो; 7 अर ओड़ैए थम अपणे परमेसवर यहोवा कै स्याम्ही खाणा खाया करियो, अर अपणे-अपणे कुण्बे समेत उन सारे काम्मां पै, जिन म्ह थमनै हाथ लगाया हो, अर जिनपै थारे परमेसवर यहोवा की आशीष मिली हो, आनन्द करियो। 8 जिस तरियां हम आजकाल उरै जो काम जिस ताहीं भावै सै वोए करै सैं उस्से तरियां थम ना करियो; 9 जो विश्रामस्थान थारा परमेसवर यहोवा थारे हिस्से म्ह देवै सै ओड़ै थम इब ताहीं तो न्ही पोहचे। 10 पर जिब थम यरदन नदी के पार जाकै उस देश म्ह जिसका हकदार थारा परमेसवर यहोवा थमनै करै सै निडर होकै बस जाओ, अर वो थारै चौगरदे के सारे दुश्मनां तै थमनै आराम दे, 11 अर थम बिना डरे रहण पाओ, फेर जो जगहां थारा परमेसवर यहोवा अपणे नाम का घर ठहराण कै खात्तर छाँट ले उस्से म्ह थम अपणे होमबलि, अर मेलबलि, अर दशमांश, अर ठाई होई भेंट, अर मन्‍नतां की सारी उत्तम-उत्तम चिज्जां जो थम यहोवा कै खात्तर इरादा करोगे, यानिके जितनी चिज्जां का हुकम मै थारै ताहीं सुणाऊँ सूं उन सारया ताहीं ओड़ैए ले जाया करियो। 12 अर ओड़ै थम अपणे-अपणे बेट्टे-बेटियाँ अर दास-दासियाँ समेत अपणे परमेसवर यहोवा कै स्याम्ही आनन्द करियो, अर जो लेवी थारे फाटकां म्ह रहवै सै वो भी आनन्द करैं, क्यूँके उसका थारै गैल कोए खुद का हिस्सा या अंश न्ही होवैगा। 13 अर सावधान रहियो के थम अपणे होमबलियाँ नै हरेक जगहां पै जो देखण म्ह आवै ना चढ़ाईयो; 14 पर जो जगहां तेरै किसे गोत्र म्ह यहोवा छाँट ले उड़ैए अपणे होमबलियाँ नै चढ़ाया करियो, अर जिस-जिस काम का हुकम मै तन्‍नै सुणाऊँ सूं उस ताहीं ओड़ैए करिये।"

15 "पर तू अपणे सारे फाटकां कै भित्तर अपणे मन मर्जी अर अपणे परमेसवर यहोवा की दी होई आशीष कै मुताबिक पशु मारकै खा सकैगा, शुद्ध अर अशुद्ध माणस दोन्‍नु खा सकैगें, जिस तरियां के चिकारे अर हिरण का माँस। 16 पर उसका लहू ना खाईयों; उस ताहीं पाणी के समान धरती पै उण्डेल दियो। 17 फेर अपणे अन्‍न, या नये दाखमधु, या टटके तेल का दशमांश, अर अपणे गां-बळध या भेड़-बकरियाँ के पहलौठे, अर अपणी मन्‍नतां की कोए चीज, अर अपणे स्वेच्छाबलि, अर ठाई होई भेंट अपणे सारे फाटकां कै भित्तर ना खाईयों; 18 उननै अपणे परमेसवर यहोवा कै स्याम्ही उस्से जगहां पै जिस ताहीं वो छाँटे अपणे बेट्टे-बेटियाँ अर दास-दासियाँ के, अर जो लेवी तेरे फाटकां कै भित्तर रहवैंगें उनकै गेल्या खाईयों, अर तू अपणे परमेसवर यहोवा कै स्याम्ही अपणे सारे काम्मां पै जिन म्ह हाथ लगाया हो आनन्द करियो। 19 अर चौक्‍कस रह के जिब ताहीं थम धरती पै जिन्दा रहवै जिब ताहीं लेवियाँ नै ना छोड़ियो।"

20 "जब तेरा परमेसवर यहोवा अपणे वचन कै मुताबिक तेरा देश बढ़ावै, अर तेरा जी माँस खाणा चाहवै, अर तू सोच्‍चण लाग्गै, के मै माँस खाऊँगा, फेर जो माँस तेरा जी चाहवै वोए खा सकैगा। 21 जो जगहां तेरा परमेसवर यहोवा अपणा नाम बणाए राक्खण कै खात्तर छाँट ले वो जै तेरै तै घणी दूर हो, तो जो गां-बळध भेड़-बकरी यहोवा नै तेरै ताहीं दी हों, उन म्ह तै जो कुछ तेरा जी चाहवै, उस ताहीं मेरे हुकम कै मुताबिक मारकै अपणे फाटकां कै भित्तर खा सकैगा। 22 जिस तरियां चिकारे अर हिरण का माँस खाया जावै सै उस्से तरियां ए उन ताहीं भी खा सकैगा, शुद्ध अर अशुद्ध दोन्‍नु ढाळ के माणस उनका माँस खा सकैगें। 23 पर उनका लहू किसे ढाळ ना खाइये; क्यूँके लहू जो सै वो जान सै, अर तू माँस कै गेल्या जान कदे भी ना खाइये। 24 उस ताहीं ना खाइये; उस ताहीं पाणी की तरियां धरती पै उण्डेल दिये। 25 तू उस ताहीं ना खाइये; इस करकै के वो काम करण तै जो यहोवा की निगांह म्ह सही सै तेरा अर तेरै बाद तेरे वंश का भी भला हो। 26 पर जिब तू कोए चीज पवित्र करै, या मन्‍नत मान्‍नै, तो इसी चिज्जां लेकै उस जगहां पै जाणा जिस ताहीं यहोवा छाँट लेगा, 27 अर ओड़ै अपणे होमबलियाँ के माँस अर लहू दोनुआं नै अपणे परमेसवर यहोवा की वेदी पै चढ़ाईये, अर मेलबलियां का लहू उसकी वेदी पै उण्डेल कै उनका माँस खाइये। 28 इन बात्तां नै जिनका हुकम मै तन्‍नै सुणाऊँ सूं चित्त लगाकै सुण, के जिब तू वो काम करै जो तेरे परमेसवर यहोवा की निगांह म्ह भला अर सही सै, फेर तेरा अर तेरै बाद तेरे वंश का भी सदा भला होंदा रहवै।"

29 "जिब तेरा परमेसवर यहोवा उन जात्तां ताहीं जिनका हकदार होण नै तू जाण लागरया सै तेरै आग्गै तै नाश करै, अर तू उनका हकदार होकै उनकै देश म्ह बस ज्या, 30 फेर चौक्‍कस रहिये, कदे इसा ना हो के उनका सत्यानाश होण कै बाद तू भी उनकै ढाळ फँस ज्या, यानिके न्यू कहकै उनकै देवत्यां के सम्बन्ध म्ह या पूछताछ ना करिये, के उन जात्तां के माणस अपणे देवत्यां की आराधना किस तरियां करैं थे? मै भी उस्से तरियां ए करुँगा। 31 तू अपणे परमेसवर यहोवा तै इसा व्यवहार ना करिये; क्यूँके जितने ढाळ के काम्मां तै यहोवा नफरत करै सै अर बैरभाव राक्खै सै, उन सारया ताहीं उननै अपणे देवत्यां कै खात्तर करया सै, उरै ताहीं के अपणे बेट्टे-बेटियाँ नै भी वे अपणे देवत्यां कै खात्तर आग म्ह गेर कै जळा देवैं सै।"

32 "जितनी बात्तां के मै थारै ताहीं हुकम दियुँ सूं उन ताहीं चौकन्‍ने होकै मान्या करिये; अर ना तो कुछ उन म्ह बढ़ाईये अर ना उन म्ह तै कुछ घटाईये।"