व्यवस्थाविवरण 21

अणसुळझी हत्या कै बारै म्ह नियम

1 "जै उस देश कै मदानां म्ह जो तेरा परमेसवर यहोवा तन्‍नै देवै सै किसे मारे होए की लाश पड़ी होई मिलै, अर उस ताहीं किसनै मार दिया सै यो पता ना चाल्‍लै, 2 तो तेरे अगुवें अर न्यायी लिकड़कै उस लाश कै चौगरदेकै एक-एक नगर की दूरी ताहीं नाप्पै; 3 फेर जो नगर उस लाश कै सबतै लोवै ठहरै, उसकै यहूदी अगुवें एक इसी बछिया ले-ले, जिसतै किमे काम ना लिया गया हो, अर जिसपै जूआ कदे न्ही धरया ग्या हो। 4 फेर उस नगर के यहूदी बुजुर्ग उस बछिया नै एक बारहमासी नदी की इसी तराई म्ह जो ना जोत्ती अर ना बोई गई हो ले जावै, अर उस्से तराई म्ह उस बछिया का गळा तोड़ दें। 5 अर लेवी याजक भी धोरै आवैं, क्यूँके तेरे परमेसवर यहोवा नै उन ताहीं छाँट लिया सै के उसकी सेवा-पाणी करै अर उसकै नाम तै आशीर्वाद दिया करैं, अर उनकै कहण कै मुताबिक हरेक रोळे अर मार पीटकै मुकदमे का फैसला हो। 6 फेर जो नगर उस लाश कै सबतै लोवै ठहरै, उसके सारे पुरनिये उस बछिया कै उप्पर जिसका गळा तराई म्ह तोड्या गया हो अपणे-अपणे हाथ धोकै कहवै, 7 ‘यो खून हमनै न्ही करया, अर ना यो काम म्हारी आँखां कै स्याम्ही होया सै। 8 इस करकै, हे यहोवा, अपणी छुड़ाई होई इस्राएली प्रजा का पाप ढक कै बेकसूर खून का पाप अपणी इस्राएली प्रजा कै सिर पै तै तार।’ फेर उस खून कै दोष तै उन ताहीं माफ कर दिया जावैगा। 9 इस तरियां वो काम करकै जो यहोवा की निगांह म्ह सही सै तू बेकसूर कै खून का दोष अपणे बीच म्ह तै दूर करिये।"

जनान्‍नी कैदी

10 "जिब तू अपणे बैरी तै युद्ध करण नै जावै, अर तेरा परमेसवर यहोवा उननै तेरै हाथ म्ह करदे, अर तू उननै कैदी बणा ले, 11 फेर जै तू कैदियाँ म्ह किसे सुन्दर जनान्‍नी ताहीं देखकै उसपै मोहित हो जावै, अर उसतै ब्याह कर लेणा चाहवै, 12 तो उस ताहीं अपणे घर कै भित्तर ले आईये, अर वो अपणा सिर मुंडावै, नाखून कटावै, 13 अर अपणे बन्धन कै कपड़े तारकै तेरै घर म्ह महिन्‍ने भर रहकै अपणे माँ-बाप कै खात्तर रोंदी रहवै; उसकै बाद तू उसकै धोरै जाईये, अर तू उसका पति अर वो तेरी घरआळी बणै। 14 फेर जै वो तेरै ताहीं आच्छी ना लाग्गै, तो जड़ै वो जाणा चाहवै ओड़ै उस ताहीं जाण दिये; उस ताहीं रुपया लेकै कदे ना बेचिये, अर तेरा उसतै शारीरिक सम्बन्ध था, इस करकै उसतै नौकराणी की ढाळ बरताव ना करिये।"

जेठ्ठे का हक

15 "जै किसे आदमी की दो घरआळी हों, अर उस ताहीं एक प्रिय अर दुसरी अप्रिय हो, अर प्रिय अर अप्रिय दोन्‍नु बिरबान्‍नी बेट्टे जणै, पर जेठ्ठा अप्रिय का हो, 16 तो जिब वो अपणे बेट्याँ ताहीं अपणी जायदाद का बटवारा करैं, फेर जै अप्रिय का बेट्टा जो साच्‍चए जेठ्ठा सै जै जिन्दा हो, तो वो प्रिय कै बेट्टे नै जेठांस ना दे सकैगा; 17 वो न्यू जाणकै के अप्रिय का बेट्टा मेरै पौरूष का पैहला फळ सै, अर जेठ्ठे का हक उस्से का सै, उस्से ताहीं अपणी सारी जायदाद म्ह तै दो हिस्से देकै जेठांसी मान्‍नै।"

हठील्‍ला बेट्टा

18 "जै किसे का हठील्‍ला अर बिद्रोही बेट्टा हो, जो अपणे माँ-बाप की बात न्ही मान्‍नै, बल्के सजा देण पै भी उनकी ना सुणै, 19 तो उसके माँ-बाप उस ताहीं पकड़कै अपणे नगर तै बाहर फाटक कै लोवै नगर के अगुवां कै धोरै ले जावैं, 20 अर वे नगर के यहूदी अगुवां तै कहवैं, ‘म्हारा यो बेट्टा हठील्‍ला अर बदमाश सै, यो म्हारी न्ही सुणदा; यो उड़ाऊ अर शराबी सै।’ 21 फेर उस नगर के सारे आदमी उस ताहीं पथराव करकै मार दें, इस तरियां तै तू अपणे बीच म्ह तै इसी बुराई नै दूर करिये, फेर सारे इस्राएली सुणकै भय खावैंगे।"

पेड़ पै लटकाए जाण आळा श्रापित

22 "फेर जै किसे नै मौत की सजा कै जोग्गा कोए पाप होया हो जिसतै वो मार दिया जावै, अर तू उसकी लाश नै दरखत पै लटका दे, 23 तो वो लाश रात नै दरखत पै टंगी ना रहवै, जरुर उस्से दिन उस ताहीं माट्टी दिये, क्यूँके जो लटकाया गया हो वो परमेसवर की ओड़ तै श्रापित ठहरया सै; इस करकै जो देश तेरा परमेसवर यहोवा तेरा हिस्सा करकै देवै सै उस धरती नै अशुद्ध ना करिये।"