1 "फेर हम उस हुकम कै मुताबिक, जो यहोवा नै मेरै ताहीं दिया था, घूमकै चालणा शरु करया, अर लाल समुन्दर कै राह के जंगळ-बियाबान कान्ही गए; अर घणे दिन तक सेईर पहाड़ कै बाहर-बाहर चाल्दे रहे। 2 फेर यहोवा नै मेरै तै कह्या, 3 ‘थारे ताहीं इस पहाड़ के बाहर-बाहर चाल्दे होए घणे दिन बीतगे, इब घूमकै उत्तर की ओड़ चाल्‍लों। 4 अर तू प्रजा कै माणसां नै मेरे ये हुकम सुणा, के थम सेईर कै रहणीये अपणे भाई एसावियाँ की सीमा कै धोरै तै होकै जाण पै हो; अर वे थारै तै डर ज्यागें। इस करकै थम घणे चौकन्‍ने रहो; 5 उनतै लड़ाई ना करियो; क्यूँके उनकै देश म्ह तै मै थमनै पैर धरण की जगहां तक न्ही दियुँगा, इस करकै मन्‍नै सेईर पर्वत एसावियाँ कै अधिकार म्ह कर दिया सै। 6 थम उनतै खाणा रपिये तै मोल लेकै खा सकोगे, अर रपिये देकै कुयां तै पाणी भरकै पी सकोगे। 7 क्यूँके थारा परमेसवर यहोवा थारे हाथ्थां के सारे काम्मां कै बाबत थमनै आशीष देंदा आया सै; इस भारी जंगळ-बियाबान म्ह थारा चालणा-फिरणा वो जाणै सै; इन चाळीस साल म्ह थारा परमेसवर यहोवा थारै गैल-गैल रह्या सै; अर थारै ताहीं कुछ कमी न्ही होई।’ 8 आखर म्ह हम सेईर के बासिन्दे अपणे भाई एसावियाँ* कै धोरै तै होकै, अराबा कै राह, अर एलत अर एस्योनगेबेर नै पाच्छै छोड़कै चाल्‍ले। फेर हम मुड़कै मोआब के जंगळ-बियाबान के राह तै होकै चाल्‍ले।"

9 "अर यहोवा नै मेरै तै कह्या, ‘मोआबियाँ नै ना सताईयो अर ना उनतै लड़ाई छेड़ियो, क्यूँके मै उनकै देश म्ह तै कुछ भी तेरै हक म्ह न्ही करुँगा क्यूँके मन्‍नै आर ताहीं लूत कै वंश कै अधिकार म्ह करया सै। 10 (पुराणे दिनां म्ह ओड़ै एमी माणस बसे होए थे, जो अनाकियाँ की तरियां ताकत्त बर अर लाम्बे-लाम्बे अर गिणती म्ह घणे थे; 11 अर अनाकियाँ की तरियां वे भी रपाई* गिणे जावैं थे, पर मोआबी उननै एमी कहवैं सै। 12 अर पुराणे दिनां म्ह सेईर म्ह होरी माणस बसे होए थे, पर एसावियाँ नै उन ताहीं उस देश तै लिकाड़ दिया, अर अपणे स्याम्ही तै नाश करकै उनकी जगहां पै आप बसगे; जिस तरियां के इस्राएलियाँ नै यहोवा के दिए होए अपणे हक कै देश म्ह करया।) 13 इब थम चालकै जेरेद नदी कै परली ओड़ जाओ।’ फेर हम जेरेद नदी कै परली ओड़ आए। 14 अर म्हारै कादेशबर्ने नै छोड़ण तै लेकै जेरेद नदी कै परली ओड़ होण तक अड़तीस साल बीतगे, उस बिचाळै यहोवा की कसम कै मुताबिक उस पीढ़ी के सारे योद्धा छावणी म्ह तै नाश होगे। 15 अर जिब तक वे नाश न्ही होए जिब ताहीं यहोवा का हाथ उननै छावणी म्ह तै मिटाण कै खात्तर उनकै खिलाफ बढ़दा ए रह्या।"

16 "जिब सारे योद्धा मरदे-मरदे माणसां के बीच म्ह तै नाश होगे, 17 फेर यहोवा नै मेरै तै कह्या, 18 ‘इब मोआब की सीमा, यानिके आर शहर नै पार कर; 19 अर जिब तू अम्मोनियाँ कै स्याम्ही जाकै उनकै धोरै पोहचै, फेर उन ताहीं ना सताईये अर ना छेड़िये, क्यूँके मै अम्मोनियाँ कै देश म्ह तै कुछ भी तेरै हक म्ह न्ही करुँगा, क्यूँके मन्‍नै उस ताहीं लूत कै वंशज कै अधिकार म्ह कर दिया सै। 20 (वो देश भी रापाइयाँ का गिण्या जावै था, क्यूँके गुजरे दिनां म्ह रपाई, जिन ताहीं अम्‍मोनी जमजुम्मी कहवैं थे, वे ओड़ै रहवै थे; 21 वे भी अनाकियाँ की ढाळ ताकतवर अर लाम्बे-लाम्बे अर गिणती म्ह घणे थे; पर यहोवा नै उन ताहीं अम्मोनियाँ कै स्याम्ही तै नाश कर दिया, अर उननै उन ताहीं उस देश तै लिकाड़ दिया, अर उनकी जगहां पै आप रहण लाग्गे; 22 जिस तरियां के उसनै सेईर कै रहणीये एसावियाँ कै स्याम्ही तै होरियाँ ताहीं नाश करया, अर उननै उन ताहीं उस देश तै लिकाड़ दिया, अर आज ताहीं उनकी जगहां पै वे खुद बसण लागरे सैं। 23 उस्से तरियां ए अव्वियां ताहीं, जो गाज़ा नगर तक गाम्मां म्ह बसै होए थे, उन ताहीं कप्तोरियाँ नै जो कप्तोर तै लिकड़े थे नाश करया, अर उनकी जगहां पै आप रहण लाग्गे।) 24 इब थम उठकै चाल्‍लों, अर अर्नोन के नाळे कै परली ओड़ चाल्‍ल सुण, मै देश सुधा हेशबोन के राजा एमोरी सीहोन नै तेरै हाथ म्ह कर दियुँ सूं; ज्यांतै उस देश नै अपणे अधिकार म्ह लेणा शरु करो, अर उस राजा तै युद्ध छेड़ द्यो। 25 अर जितने माणस धरती पै रहवैं सै उन सारया कै मन म्ह मै आज ए कै दिन तै तेरै कारण डर अर थरथराहट समवाण लाग्गूँगा; वे तेरी खबर सुणकै तेरै तै डर के मारे कांम्बैगें अर पीड़ित होवैगें।’"

26 "आखर म्ह मन्‍नै कदेमोत नाम के जंगळ-बियाबान तै हेशबोन के राजा सीहोन कै धोरै मेल की या बात कहण नै दूत भेज्जे: 27 ‘मन्‍नै अपणे देश म्ह तै होकै जाण दे; मै राजपथ पै तै होकै चल्या जाऊँगा, अर ओळे अर सोळे हाथ न्ही मुड़ूँगा। 28 तू रुपया लेकै मेरै हाथ खाण-पीण का समान दिये के मै खाऊँ, अर पाणी भी रुपया लेकै मेरै ताहीं दिये के मै पीऊँ; सिर्फ मन्‍नै पाँये-पाँये चले जाण दे, 29 जिसा सेईर कै रहणीया एसावियाँ नै अर आर कै रहणीया मोआबियाँ नै मेरै तै करया, उस्से तरियां ए तू भी मेरै तै कर, इस तरियां मै यरदन नदी के परली ओड़ होकै उस देश म्ह पोहचूंगा जो म्हारा परमेसवर यहोवा म्हारै ताहीं देवै सै।’ 30 पर हेशबोन के राजा सीहोन नै म्हारै पै अपणे देश म्ह तै होकै चाल्‍लण न्ही दिया; क्यूँके म्हारे परमेसवर यहोवा नै उसका मन कठोर अर उसका मन हठील्‍ला कर दिया था, ज्यांतै के उसनै थारै हाथ म्ह करदे, जिसा के आज जाहिर सै। 31 अर यहोवा नै मेरै तै कह्या, ‘सुण, मै देश सुधा सीहोन नै तेरै वश म्ह कर देण पै सूं; उस देश नै अपणे अधिकार म्ह लेणा शरु कर।’ 32 फेर सीहोन अपणी सारी पलटन समेत लिकड़ आया, अर म्हारा मुकाबला करकै युद्ध करण नै यहस* ताहीं चढ़ आया। 33 अर म्हारै परमेसवर यहोवा नै उस ताहीं म्हारै जरिये हरा दिया, अर हमनै उस ताहीं बेट्टयाँ अर सारी पलटन सुधा मार दिया। 34 अर उस्से बखत हमनै उसके सारे नगर ले लिए, अर एक-एक बसे होए नगर की बिरबानियाँ अर बाल-बच्‍चेयाँ समेत उरै ताहीं सत्यानाश करया के कोए न्ही बच्या; 35 पर डान्गरां ताहीं हमनै ले लिया, अर उन नगरां की लूट भी हमनै ले ली जिन ताहीं हमनै जीत्या था। 36 अर्नोन के नाळे कै छोर आळे अरोएर नगर तै लेकै, अर उस नाळे म्ह कै नगर तै लेकै, गिलाद तक कोए नगर इसा ऊँच्‍चा न्ही रह्या जो म्हारै स्याम्ही ठैहर सकै था; क्यूँके म्हारै परमेसवर यहोवा नै सारया ताहीं म्हारै वश म्ह कर दिया। 37 पर हम अम्मोनियाँ कै देश कै धोरै, बल्के यब्बोक नदी कै परली ओड़ जितना देश सै, अर पहाड़ी देश के नगर जड़ै जाण तै म्हारै परमेसवर यहोवा नै म्हारै तै मना करया था, ओड़ै हम न्ही गए।"