1 मूसा नै सारे इस्राएलियाँ तै बुलवाकै कह्या, "हे इस्राएलियों, जो-जो विधि अर नियम मै आज थमनै सुणाऊँ सूं वे सुणो, इस करकै के उननै सीख कै मानण म्ह चौकसी करो। 2 म्हारै परमेसवर यहोवा नै तो होरेब पै म्हारै तै करार करया। 3 इस करार ताहीं यहोवा नै म्हारै पितरां तै न्ही, म्हारै तै ए करया, जो उरै आज कै दिन जिन्दा सैं। 4 यहोवा नै उस पर्वत पै आग कै बिचाळै तै थारै तै आम्ही-स्याम्ही बात करी; 5 उस आग कै डर के मारे थम पर्वत पै न्ही चढ़े, ज्यांतै मै यहोवा कै अर थारै बिचाळै उसका वचन थमनै बताण कै खात्तर खड्या रह्या।" फेर उसनै कह्या,

6 "तेरा परमेसवर यहोवा, जो तन्‍नै गुलाम्मी कै घर यानिके मिस्र देश म्ह तै लिकाड़ ल्याया सै, वो मै सूं।"

7 मन्‍नै छोड़ दुसरयां नै परमेसवर करकै ना मानिये।

8 थम अपणे खात्तर कोए मूर्ति खोदकै ना बणाईयो, ना किसे की प्रतिमा बणाईयो जो अकास म्ह, या धरती पै, या धरती कै पाणी म्ह सै; 9 थम उन ताहीं दण्डवत ना करियो अर ना उनकी भगति करियो; क्यूँके मै थारा परमेसवर यहोवा जळण राक्खण आळा परमेसवर सूं, अर जो मेरै तै बैर राक्खै सै उनकै बेट्टयाँ, पोत्यां, अर पड़पोत्यां ताहीं पितरां की सजा दिया करुँ सूं, 10 अर जो मेरै तै प्यार राक्खै सै अर मेरे हुकमां नै मान्‍नै सै उन हजारां पै करुणा करया करुँ सूं।

11 थम अपणे परमेसवर यहोवा का नाम बेकार म्ह ना लियो; क्यूँके जो यहोवा का नाम बेकार म्ह लेवै उस ताहीं यहोवा सजा दिये बिना न्ही छोड़ैगा।

12 थम विश्रामदिन नै पवित्र मानियो, जिस तरियां तेरे परमेसवर यहोवा नै थारे ताहीं हुकम दिया। 13 हफ्ते कै छः दिन तो मेहनत करकै अपणा सारा काम-काज करियो; 14 पर सातवाँ दिन थारे परमेसवर यहोवा कै खात्तर विश्रामदिन सै; उस म्ह ना तू किसे ढाळ का काम-काज करियो, ना तेरा बेट्टा, ना तेरी बेट्टी, ना तेरा दास, ना तेरी दास्सी, ना तेरा बळध, ना तेरा गधा, ना तेरा कोए पशु, ना कोए परदेशी भी जो थारे फाटकां कै भित्तर हो; जिसतै थारा दास अर थारी दास्सी भी तेरै ढाळ आराम करै। 15 अर इस बात नै याद राखियो के मिस्र देश म्ह थम खुद दास थे, अर ओड़ै तै थारा परमेसवर यहोवा थमनै बलवन्त हाथ अर बढाई होई बांह कै जरिये लिकाड़ ल्याया; इस करकै थारा परमेसवर यहोवा थमनै विश्रामदिन मान्‍नण का हुकम देवै सै।

16 अपणे पिता अर अपणी माँ का आदर करियो, जिस तरियां के थारे परमेसवर यहोवा नै थारे ताहीं हुकम दिया सै; जिसतै जो देश थारा परमेसवर यहोवा थमनै देवै सै उस म्ह थम घणे दिन ताहीं रहण पाओ, अर तेरा भला हो।

17 थम हत्या ना करियो।

18 थम व्यभिचार ना करियो।

19 थम चोरी ना करियो।

20 थम किसे कै खिलाफ झूठ्ठी गवाही ना दियो।

21 थम ना किसे की घरआळी का लालच करियो, अर ना किसे कै घर का लालच करियो, ना उसकै खेत का, ना उसके दास का, ना उसकी दास्सी का, ना उसकै बळध या गधे का, ना उसकी किसे और चीज का लालच करियो। 22 येए वचन यहोवा नै उस पर्वत पै आग, अर बादळ, अर घोर अन्धेरै कै बिचाळै तै थारी सारी मण्डळी तै पुकार कै कह्या; अर इसतै ज्यादा और कुछ न्ही कह्या। अर उन ताहीं उसनै पत्थर की दो पटियाँ पै लिखकै मेरै ताहीं दे दिया।

23 "जिब पर्वत आग तै दहक रह्या था, अर थमनै उस शब्द ताहीं अन्धेरै कै बिचाळै तै आन्दे होए सुण्या, फेर थम अर थारै गोत्रां के सारे खास-खास आदमी अर थारै अगुवें मेरै धोरै आए; 24 अर थम कहण लाग्गे, म्हारै परमेसवर यहोवा नै म्हारै पै अपणा तेज अर अपणी महिमा दिखाई सै, अर हमनै उसका शब्द आग कै बिचाळै तै आन्दे होए सुण्या; आज हमनै देख लिया के जै परमेसवर माणस तै बात करै सै फेर भी माणस जिन्दा रहवै सै। 25 इब हम क्यूँ मर ज्यां? क्यूँके इसी बड्डी आग तै हम भस्म हो जावांगे; अर जै हम अपणे परमेसवर यहोवा का शब्द फेर सुणा, फेर तो मरे ए जावांगे। 26 क्यूँके सारे प्राणियाँ म्ह तै कौण इसा सै जो म्हारै ढाळ जिन्दा अर आग कै बिचाळै तै बोलदे होए परमेसवर का शब्द सुणकै भी जिन्दा बच्या रहवै? 27 इस करकै तू धोरै जा, अर जो कुछ म्हारा परमेसवर यहोवा कहवै उस ताहीं सुण ले; फेर जो कुछ म्हारा परमेसवर यहोवा कहवै उसनै म्हारै तै कहिये; अर हम उसनै सुणांगें अर उसनै मान्‍नागें।"

28 "जिब थम मेरै तै ये बात कहण लागरे थे फेर यहोवा नै थारी बात सुणी; फेर उसनै मेरै तै कह्या, ‘इन माणसां नै जो-जो बात तेरै तै कही सै वो मन्‍नै सुणी सै; इननै जो कुछ कह्या सै वो सही ए कह्या। 29 भला होंदा के उनका मन सदा इसाए बण्या रहवै, के वे मेरा भय मान्दे होए मेरे सारे हुकमां पै चाल्दे रहवैं, जिसतै उनकी अर उनकी पीढ़ी की सदा भलाई होन्दी रहवै! 30 इस करकै तू जाकै उनतै कह दे, के अपणे-अपणे डेरयां म्ह बोहड़ जाओ। 31 पर तू उरै मेरै धोरै खड्या रह, अर मै वे सारे हुकम अर विधियाँ अर जिन नै तन्‍नै उन ताहीं सिखाणा होगा तेरै तै कहूँगा, जिसतै वे उननै उस देश म्ह जिसका हक मै उननै देण पै सूं मान्‍नै।’ 32 इस करकै थम अपणे परमेसवर यहोवा के हुकम कै मुताबिक करण म्ह चौकसी करियो; ना तो दाएँ मुड़ियो अर ना बाएँ। 33 जिस राह पै चाल्‍लण का हुकम थारे परमेसवर यहोवा नै थारै ताहीं दिया सै उन सारे राह पै चाल्दे रहियो, के थम जिन्दा रहो, अर थारा भला हो, अर जिस देश के थम हकदार होवैगें उस म्ह थम घणे दिनां कै खात्तर बणे रहो।"