1 "फेर हम मुड़कै बाशान के राह तै चढ़ चाल्‍ले; अर बाशान*3:1 बाशान बाशान का क्षेत्र का ओग नाम का राजा अपणी सारी पलटन समेत म्हारा मुकाबला करण नै लिकड़ आया, के एद्रेई म्ह युद्ध करै। 2 फेर यहोवा नै मेरै तै कह्या, ‘उसतै ना डरै; क्यूँके मै उस ताहीं सारी पलटन अर देश सुधा तेरै हाथ म्ह कर दियुँगा; अर जिसा तन्‍नै हेशबोन कै रहणीया एमोरियां के राजा सीहोन तै करया सै उस्से तरियां ए उसतै भी करिये।’ 3 इस तरियां म्हारे परमेसवर यहोवा नै सारी पलटन समेत बाशान के राजा ओग ताहीं भी म्हारै हाथ म्ह कर दिया; अर हम उस ताहीं उरै तक मारदे रहे के उन म्ह तै कोए भी न्ही बच्या। 4 उस्से बखत हमनै उनकै सारे नगरां ताहीं ले लिया, कोए इसा नगर न्ही रहया जिस ताहीं हमनै उनतै ना लिया हो, इस तरियां अर्गोब का सारा देश, जो बाशान म्ह ओग कै राज्य म्ह था अर उस म्ह साठ नगर थे, वो म्हारै बस म्ह आ ग्या। 5 ये सारे नगर गढ़आळे थे, अर उनकै ऊँची-ऊँची शहरपनाह, अर फाटक, अर बेंड़े थे, अर इननै छोड़ बिना चारदीवारी कै भी घणे नगर थे। 6 अर जिसा हमनै हेशबोन के राजा सीहोन के नगरां तै करया था उस्से तरियां ए हमनै इन नगरां तै भी करया, यानिके सारे बसै होए नगरां ताहीं बिरबानियाँ अर बाळकां समेत सत्यानाश कर दिया। 7 पर सारे घरेलू पशु अर नगर की लूट हमनै अपणी कर ली। 8 इस तरियां हमनै उस बखत यरदन नदी कै इस पार रहणीये एमोरियां के दोन्‍नु राजाओं कै हाथ तै अर्नोन के नाळे तै लेकै हेर्मोन पर्वत ताहीं का देश ले लिया। 9 (हेर्मोन ताहीं सीदोनी माणस सिर्योन, अर एमोरी माणस सनीर कहवै सैं।) 10 समथर देश के सारे नगर, अर सारा गिलाद, अर सल्का, अर एद्रेई ताहीं जो ओग के राज्य के नगर थे, सारा बाशान म्हारै बस म्ह आ ग्या। 11 जो रपाई रहगे थे, उन म्ह तै सिर्फ बाशान का राजा ओग रहग्या था, उसकी चारपाई जो लोहे की सै वो तो अम्मोनियाँ कै रब्‍बाह नगर म्ह पड़ी सै, साधारण आदमी कै हाथ कै हिसाब तै उसकी लम्बाई नौ हाथ की अर चौड़ाई च्यार हाथ की सै।"

12 "जो देश हमनै उस बखत अपणे अधिकार म्ह ले लिया वो न्यू सै, यानिके अर्नोन के नाळे कै किनारे आळे अरोएर नगर तै लेकै सारे नगरां समेत गिलाद कै पहाड़ी देश का आध्धा भाग, जिस ताहीं मन्‍नै रूबेनियाँ अर गादियाँ तै दे दिया, 13 अर गिलाद का बच्या होया भाग, अर सारा बाशान, यानिके अर्गोब का सारा देश जो ओग कै राज्य म्ह था, वो मन्‍नै मनश्शे के आध्धे गोत्र ताहीं दे दिया। (सारा बाशान तो रापाइयाँ का देश कुह्वावै सै। 14 अर मनश्शेई याईर नै गशूरियाँ अर माकावासियाँ की हद तक अर्गोब का सारा देश ले लिया, अर बाशान के नगरां का नाम अपणे नाम पै हब्बोत्याईर*3:14 हब्बोत्याईर यायर एक गाम धरया, अर वोए नाम आज ताहीं बण्या सै।) 15 अर मन्‍नै गिलाद देश माकीर तै दे दिया, 16 अर रूबेनियाँ अर गादियाँ ताहीं मन्‍नै गिलाद तै लेकै अर्नोन के नाळे ताहीं का देश दे दिया, यानिके उस नाळे कै बिचाळै उनकी हद ठहराई, अर यब्बोक नदी तक जो अम्मोनियाँ की हद सै; 17 अर किन्‍नेरेत तै लेकै पिसगा की ढलाण कै तळै के अराबा कै ताल तक, जो खारा ताल भी कुह्वावै सै, अराबा अर यरदन नदी की पूरब कान्ही का सारा देश भी मन्‍नै उन्हे ताहीं दे दिया।"

18 "उस बखत मन्‍नै तेरे ताहीं यो हुकम दिया, ‘थारे परमेसवर यहोवा नै तेरे ताहीं यो देश दिया सै के उस ताहीं अपणे अधिकार म्ह राक्खो; थम सारे योद्धा हथियारबन्द होकै अपणे भाई इस्राएलियाँ कै आग्गै-आग्गै के परली ओड़ चाल्‍लों। 19 पर थारी बिरबान्‍नी, अर बाळ-बच्‍चे, अर पशु, जिननै मै जाणु सूं के भोत घणे तो सैं, वो सारा कुछ थारै नगरां म्ह जो मन्‍नै तेरे ताहीं दिये सै रह ज्यां। 20 अर जिब यहोवा थारे भाईयाँ नै उसाए आराम दे जिसा के उसनै थारै ताहीं दिया सै, अर वे उस देश के हकदार हो जावै जो थारा परमेसवर यहोवा उननै यरदन नदी के परली ओड़ देवै सै; फेर थम भी अपणे-अपणे हक की धरती पै जो मन्‍नै थारै ताहीं दी सै बोहड़ जाओगें।’ 21 फेर मन्‍नै उस्से बखत यहोशू तै चेतावनी देकै कह्या, ‘तन्‍नै अपणी आँखां तै देख्या सै के तेरे परमेसवर यहोवा नै इन दोन्‍नु राजाओं तै के-के करया सै; उस्से तरियां ए यहोवा उन सारे राजाओं तै करैगा जिन म्ह तू परली ओड़ पार होकै जावैगा। 22 उनतै ना डरिये; क्यूँके जो थारी ओड़ तै लड़ण आळा सै वो थारा परमेसवर यहोवा सै।’"

23 "उसे बखत मन्‍नै यहोवा तै गिड़गिड़ाकै बिनती करी, 24 ‘हे प्रभु यहोवा, तू अपणे दास नै अपणी महिमा अर बलवन्त हाथ दिखाण लाग्या सै; सुर्ग म्ह अर धरती पै इसा कौण देवता सै जो तेरे जिसे काम अर वीरता कै काम कर सकै? 25 ज्यांतै मन्‍नै परली ओड़ पार जाण दे के यरदन नदी कै परली ओड़ उस बढ़िया देश नै, यानिके उस उत्तम पहाड़ अर लबानोन नै भी देखण पाऊँ।’ 26 पर यहोवा थारै कारण मेरै तै नाराज होग्या, अर मेरी न्ही सुणी; बल्के यहोवा नै मेरै तै कह्या, ‘बस कर; इस बारै म्ह फेर कदे मेरै तै बात ना करिये। 27 पिसगा पहाड़ की चोट्टी पै चढ़ जा, अर पूर्व, पश्चिम, उत्तर, दक्षिण, चौगरदे ताहीं निगांह करकै उस देश नै देख ले; क्यूँके तू इस यरदन नदी कै परली ओड़ जाण न्ही पावैगा। 28 अर यहोशू नै हुकम दे, अर उस ताहीं धीरज बन्धाकै मजबूत कर; क्यूँके इन माणसां कै आग्गै-आग्गै वोए परली ओड़ पार जावैगा, अर जो देश तू देक्खैगा उस ताहीं वोए उनका खुद का हिस्सा करा देगा।’ 29 फेर हम बेतपोर कै स्याम्ही की तराई म्ह ठहरे रहे।"