उत्पत्ति 20:3-7

3 रात नै परमेसवर नै सपने म्ह अबीमेलेक कै धोरै आकै कह्या, "सुण, जिस जनान्‍नी ताहीं तन्‍नै राक्ख लिया सै, उसकै कारण तू मर जावैगा, क्यूँके वो सुहागण सै।" 4 पर अबीमेलेक उसकै धोरै न्ही गया था; इस करकै उसनै कह्या, "हे प्रभु, के तू बेकसूर जात्तां नै भी घात करैगा? 5 के उस्से नै खुद आप मेरै तै न्ही कह्या, ‘वा मेरी भाण सै?’ अर उस जनान्‍नी नै भी खुद कह्या, ‘वो मेरा भाई सै,’ मन्‍नै तो अपणे मन की खराई अर अपणे बरतावै की सच्‍चाई तै यो काम करया।" 6 परमेसवर नै उसतै सपने म्ह कह्या, "हाँ, मै भी जाणु सूं के अपणे मन की खराई तै तन्‍नै यो काम करया सै अर मन्‍नै तेरे ताहीं रोक्‍के भी राख्या के तू मेरै खिलाफ पाप ना करै; इस्से कारण मन्‍नै तेरे ताहीं उसतै छूण न्ही दिया। 7 इस करकै इब उस माणस की घरआळी नै उसतै उलटा देदे; क्यूँके वो नबी सै, अर तेरे खात्तर प्रार्थना करैगा, अर तू जिन्दा रहवैगा पर जै तू उस ताहीं न्ही देवैगा तो याद राक्ख, के तू, अर जितने तेरे माणस सैं, सारे मर जावैंगे।"