1 फेर याकूब नै अपणा राह लिया, अर पूर्वियाँ कै देश* म्ह आया। 2 अर उसनै आन्दे होए निगांह करकै के देख्या, के मैदान म्ह एक कुआँ सै, अर उसकै धोरै भेड़-बकरियाँ के तीन टोळ बैठ्ठे होए सैं; क्यूँके जो पत्थर उस कुएँ कै मुँह पै धरया रहवै था, जिस म्ह तै भेड़-बकरियाँ तै पाणी प्याया जावै था, वो भारी था। 3 अर जिब सारे टोळ ओड़ै कठ्ठे हो जान्दे फेर पाळी उस पत्थर नै कुएँ कै मुँह पै तै लुढ़का कै भेड़-बकरियाँ ताहीं पाणी प्यान्दे, अर फेर पत्थर नै कुएँ कै मुँह पै न्यू का न्यू धर दिया करदे। 4 फेर याकूब नै पाळीयाँ तै पूच्छया, "हे मेरै भाईयो थम कित्त के सो?" उननै कह्या, "हम हारान नगर कै सां।" 5 फेर उसनै उनतै पूच्छया, "के थम नाहोर कै पोते लाबान नै जाणो सो?" उननै कह्या, "हाँ, हम उसनै जाणा सां।" 6 फेर उसनै उनतै पूच्छया, "के वो राज्जी-खुशी सै?" उननै कह्या, "हाँ, राज्जी-खुशी सै अर वा देख, उसकी बेट्टी राहेल भेड़-बकरियाँ नै लिये होए चाल्‍ली आवै सै।" 7 उसनै कह्या, "देक्खो, इब्बे तो दिन घणाए सै, पशुआं के कठ्ठे होण का बखत न्ही; इस करकै भेड़-बकरियाँ नै पाणी प्याकै दुबारै ले जाकै चराओ।" 8 पर उननै कह्या, "हम इब्बे इसा न्ही कर सकदे, जिब सारे टोळ कठ्ठे होवै सै, फेर पत्थर कुएँ कै मुँह तै लुढ़काया जावै सै, अर फेर हम भेड़-बकरियाँ नै पाणी प्यावां सां।"

9 उनकी या बातचीत होरी थी, तो राहेल जो पशु चराया करदी, अपणे पिता की भेड़-बकरियाँ नै लिये होए आई। 10 अपणे मामा लाबान की बेट्टी राहेल नै, अर उसकी भेड़-बकरियाँ ताहीं भी देखकै याकूब नै धोरै जाकै कुएँ कै मुँह पै तै पत्थर लुढ़का कै अपणे मामा लाबान की भेड़-बकरियाँ तै पाणी प्याया। 11 फेर याकूब नै राहेल ताहीं चुम्या, अर जोर-जोर तै रोया। 12 अर याकूब नै राहेल तै बता दिया, के मै तेरी बुआ का छोरा अर तेरा भाई सूं, यानिके रिबका का बेट्टा सूं। तो उसनै भाजकै अपणे पिता तै कह दिया। 13 अपणे भाण्जे याकूब की खबर पान्दे ए लाबान उसतै मिलण नै भाज्या, अर उस ताहीं गळे तै लाकै चुम्या, फेर अपणे घरां ले आया। अर याकूब नै लाबान ताहीं जो उसकै गैल बित्या था वो सब कुछ बता दिया, के वो हारान देश क्यूँ आया सै। 14 फेर लाबान नै याकूब तै कह्या, "तू तो सच म्ह मेरी हाड्डी अर माँस सै।" अर याकूब एक महिन्‍ने तक उसकै गेल्या रह्या।

15 फेर लाबान नै याकूब तै कह्या, "भाई-बन्धु होण कै कारण तेरे तै मुफ्त सेवा कराणी मेरै खात्तर ठीक कोनी; इस करकै बता के मै तन्‍नै सेवा के बदलै म्ह के देऊँ?" 16 लाबान की दो बेट्टी थी, जिन म्ह तै बड्डी का नाम लिआ अर छोट्टी का राहेल था। 17 लिआ की तो धुन्धळी आँख थी, पर राहेल रुपवती अर सुथरी थी।

18 इस करकै याकूब नै, जो राहेल तै प्यार करया करदा, कह्या, "मै तेरी छोट्टी बेट्टी राहेल कै खात्तर सात साल तेरी सेवा करुँगा।" 19 लाबान नै कह्या, "उस ताहीं किसे दुसरे माणस नै देण तै तेरे ताहीं देणा आच्छा होवैगा; इस करकै मेरै धोरै रह।" 20 पर याकूब नै राहेल कै खात्तर सात साल ताहीं सेवा करी; अर वे उस ताहीं राहेल के प्यार कै कारण थोड़े-से दिनां कै बराबर जाण पड़े।

21 एक दिन याकूब नै लाबान तै कह्या, "मेरी सेवा का बखत पूरा हो लिया सै, इसकै अपणी बेट्टी नै मेरे ताहीं पत्नी बणण कै खात्तर दे, ताके मै उसकै गैल जिन्दगी बिताऊँ।" 22 फेर लाबान नै उस जगहां के सारे माणसां ताहीं बुलाकै कठ्ठा करया, अर एक भोज दिया। 23 उस दिन साँझ कै बखत वो अपणी बेट्टी लिआ नै याकूब कै धोरै लेग्या, अर वो उसकै धोरै गया। 24 लाबान नै अपणी बेट्टी लिआ तै उसकी दास्सी होण कै खात्तर अपणी दास्सी जिल्पा दे दी। 25 जिब सबेर होई तो उसनै लिआ ताहीं देख्या, इस करकै उसनै लाबान तै कह्या, "यो तन्‍नै मेरै गैल के करया सै? मन्‍नै तेरे गेल्या रहकै जो तेरी सेवा करी, तो के राहेल कै खात्तर न्ही करी? फेर तन्‍नै मेरै तै क्यूँ इसा छळ करया सै?" 26 लाबान नै कह्या, "म्हारै इसा रीति-रिवाज न्ही, के बड्डी बेट्टी तै पैहल्या छोट्टी का ब्याह करदे।"

27 "इसका सप्ताह तो पूरा कर*; फेर मै अपणी दुसरी बेट्टी भी तन्‍नै और सात साल की सेवा कै बदलै म्ह दे दियुँगा।" 28 याकूब नै इसाए करया, अर लिआ के सप्ताह ताहीं पूरा करया; फेर लाबान नै और सात साल सेवा कै बदलै उस ताहीं अपणी बेट्टी राहेल भी दे दी, ताके वा उसकी घरआळी हो। 29 लाबान नै अपणी बेट्टी राहेल की दास्सी होण कै खात्तर अपणी दास्सी बिल्हा ताहीं भी दे दिया। 30 फेर याकूब राहेल कै धोरै भी गया, अर उसका प्यार लिआ तै घणा राहेल पै होया, अर उसनै लाबान खात्तर और सात साल उसकी सेवा करी।

31 जिब यहोवा नै देख्या के याकूब लिआ तै प्यार न्ही करदा, तो उसनै उसकी कोख खोल दी, पर राहेल बाँझ रही। 32 इस तरियां लिआ गर्भवती होई, अर उसकै एक छोरा पैदा होया, अर उसनै न्यू कहकै उसका नाम रूबेन धरया, "यहोवा नै मेरै दुख पै निगांह करी सै, इब मेरा पति मेरै तै जरुर प्यार करैगा।" 33 वा फेर गर्भवती होई, अर उसकै एक बेट्टा और पैदा होया; फेर उसनै न्यू कह्या, "यो सुणकै के मै अप्रिय सूं यहोवा नै मेरै ताहीं यो भी छोरा दिया।" इस करकै उसनै उसका नाम शिमोन धरया। 34 वा फेर गर्भवती होई, अर उसकै एक और छोरा पैदा होया; अर उसनै कह्या, "इब तो मन्‍नै अपणे पति खात्तर तीन छोरे पैदा करे सै।" इस करकै इब तो वो जरुर मेरे तै प्यार करैगा, इस कारण उसका नाम लेवी धरया। 35 अर वा फेर गर्भवती होई, अर उसकै एक और छोरा पैदा होया; अर उसनै कह्या, "इबकै तो मै यहोवा का धन्यवाद करुँगी।" इस करकै उसनै उसका नाम यहूदा धरया; फेर उसकी कोख बन्द होगी।