1 फेर उसनै अपणे घर के प्रबन्‍धक तै हुकम दिया, "इन माणसां कै बोरयां म्ह जितनी खाण-पीण की चीज समा सके उतणी भर दे, अर एक-एक जन के रपिये उसकै बोरे कै मुँह पै धरदे। 2 अर मेरा चाँदी का कटोरा छोट्टे भाई कै बोरे कै मुँह पै उसकै नाज के रपियाँ कै गेल्या धरदे।" यूसुफ के इस हुकम कै मुताबिक उसनै करया। 3 सबेर होन्दे वे माणस अपणे गधां सुधा बिदा करे गए। 4 वे नगर तै लिकड़े ए थे, अर ज्यादा दूर न्ही जाण पाए थे के यूसुफ नै अपणे घर के प्रबन्‍धक तै कह्या, "उन माणसां का पिच्छा कर, अर उनतै मिलकै उनतै कह, ‘थमनै भलाई कै बदले बुराई क्यूँ करी सै? 5 के यो वो बरतन कोनी जिसम्ह मेरा माल्‍लिक अंगूर का रस पिया करै सै, अर जिसतै उसनै शकुन मिलै सै? जो थमनै करया सै वो आच्छा काम कोनी।’"

6 फेर घर के प्रबन्‍धक नै उनका पिच्छा करकै उन ताहीं पकड़ लिया, अर उसनै येए बात उनतै कही। 7 पर वे उसतै बोल्‍ले, "हे म्हारै प्रभु, तू इसी बात क्यूँ कहवै सै? इसा काम करणा तेरे दास्सां तै दूर रहवै। 8 देख, जो रपिये म्हारै बोरयां कै मुँह पै लिकड़े थे, जिब हमनै उस ताहीं कनान देश तै ल्याकै तेरे ताहीं दे दिया, फेर भला, तेरे माल्‍लिक कै घर म्ह तै हम कोए चाँदी या सोन्‍ने की चीज किस तरियां चुराण की हिम्मत कर सकां सां? 9 जै तेरे दास्सां म्ह तै जिस किसे कै धोरै वो लिकड़ै, तो वो मार दिया जावै, अर हम भी अपणे उस प्रभु के गुलाम हो जावां।" 10 प्रबन्‍धक नै कह्या, "थम सही कहों सों, जिसकै धोरै वो लिकड़ै वो मेरा गुलाम बणैगा; अर थम बेकसूर ठहरोगे।" 11 इसपै वे तावळ करकै अपणे-अपणे बोरे ताहीं नीच्‍चै धरती पै धरकै उननै खोलण लाग्गे। 12 फेर प्रबन्‍धक टोह्ण लाग्या, अर बडे़ भाई कै बोरे तै लेकै छोट्टे भाई कै बोरे ताहीं टोह्या: अर कटोरा बिन्‍यामीन कै बोरे म्ह मिल्या। 13 फेर उननै अपणे-अपणे कपड़े पाड़े, अर अपणा-अपणा बोरा गधा पै लादकै उलटे नगर म्ह बोहड़गे। 14 जिब यहूदा अर उसके भाई यूसुफ कै घर म्ह पोहचे, तो यूसुफ उड़ैए था, फेर वे उसकै स्याम्ही धरती पै गिरगे, ताके उनपै दया हो। 15 यूसुफ नै उनतै कह्या, "थमनै यो किसा काम करया सै? के थम न्ही जाणो थे के इसतै मै शकुन बिचारया करुँ सूं?" 16 यहूदा नै कह्या, "हम अपणे स्वामी तै के कहवां? हम के कहकै खुद नै बेकसूर ठहरावां? परमेसवर नै तेरे दास्सां के अधर्म ताहीं पकड़ लिया सै। हम, अर जिसकै धोरै तेरा कटोरा लिकड़या सै वो भी, हम सब इब अपणे स्वामी के गुलाम ए सां।" 17 पर यूसुफ नै कह्या, "इसा तो मै न्ही कर सकदा, जिस माणस कै धोरै कटोरा लिकड़या सै, वोए मेरा गुलाम होवैगा; अर थम अपणे पिता कै धोरै खुशी तै चले जाओ।"

18 फेर यहूदा उसकै धोरै जाकै कहण लाग्या, "हे मेरै स्वामी, तेरे दास नै अपणे स्वामी तै एक बात कहण की इजाजत दे, अर तेरा छो तेरे दास पै ना भड़कै; क्यूँके तू तो फिरौन कै बराबर सैं। 19 मेरै स्वामी नै अपणे दास्सां तै बुझ्झया था, ‘के थारा पिता या भाई सैं?’ 20 अर हमनै अपणे स्वामी तै कह्या, ‘हाँ, म्हारा बुढ़ा पिता सै, अर उसकै बुढ़ापे म्ह एक छोट्टा सा बाळक भी सै, पर उसका भाई मरग्या सै, ज्यांतै वो इब अपणी माँ का एक्ला ए रहग्या सै, अर उसका पिता उसतै भोत घणा प्यार करै सै।’ 21 फेर तन्‍नै अपणे दास्सां तै कह्या था, ‘उसनै मेरै धोरै ले आओ, ताके मै उसनै देख सकूँ।’ 22 फेर हमनै अपणे स्वामी तै कह्या था, ‘वो छोरा अपणे पिता नै छोड़ न्ही सकदा; न्ही तो उसका पिता मर जावैगा।’ 23 पर तन्‍नै अपणे दास्सां तै कह्या, ‘जै थारा छोट्टा भाई थारे गैल ना आवै, तो थम मेरै स्याम्ही फेर ना आईयो।’ 24 इस करकै जिब हम अपणे पिता तेरे दास कै धोरै गए, तो हमनै उसतै अपणे स्वामी की बात कही। 25 फेर म्हारै पिता नै कह्या, ‘फेर जाकै म्हारै खात्तर थोड़ी-सी खाण-पीण की चीज मोल ले आओ।’ 26 हमनै कह्या, ‘हम न्ही जा सकदे, हाँ, जै म्हारा छोट्टा भाई म्हारै गैल जावैगा, तो हम जावांगे; क्यूँके जै म्हारा छोट्टा भाई म्हारै गैल न्ही गया, तो हम उस आदमी कै स्याम्ही न्ही जाण पावांगे।’ 27 इस करकै तेरे दास म्हारे पिता नै म्हारे तै कह्या, ‘थम तो जाणो सो के मेरी घरआळी तै दो बेट्टे पैदा होए थे। 28 अर उन म्ह तै एक तो मन्‍नै छोड़ ए गया, अर मन्‍नै मान लिया, के वो किसे जानवर नै पाड़ दिया होगा; अर जद तै मै उसका मुँह न्ही देख पाया। 29 इस करकै जै थम इब इसनै भी मेरी आँखां तै दूर ले जाओगे, अर कोए मुसीबत इसपै आण पड़े, तो थारे कारण मै इस बुढ़ापे म्ह दुख कै गेल्या अधोलोक म्ह उतर जाऊँगा।’ 30 इस करकै जै मै अपणे पिता तेरे दास कै धोरै पोहचू, अर यो छोरा गैल ना रहवै, तो उसकी जान जो इस्से म्ह अटकी रहवै सै, 31 इस कारण, न्यू देखकै के छोरा कोनी, वो जिब्बे मर जावैगा। फेर तेरे दास्सां कै कारण तेरा दास म्हारा पिता, जो बुढ़ापे की अवस्था म्ह सै, दुख कै गेल्या अधोलोक म्ह उतर जावैगा। 32 फेर तेरा दास मै अपणे पिता कै धोरै न्यू कहकै इस छोरे का जिम्मेवार होया सूं, ‘जै मै इस ताहीं तेरे धोरै न्ही पोंहचा पाऊँ, तो मै जिन्दगी भर तेरा कसूरवार ठहरूँगा।’ 33 इस करकै इब तेरा दास इस छोरे कै बदले अपणे स्वामी का दास होकै रहण की इजाजत पावै, अर यो छोरा अपणे भाईयाँ कै गैल जाण दिया जावै। 34 क्यूँके छोरे कै बिना मै किस तरियां अपणे पिता कै धोरै जा सकूँगा; इसा ना हो के मेरे पिता पै जो दुख पड़ण आळा सै, वो मन्‍नै देखणा पड़ै।"