उत्पत्ति 25

अब्राहम के और दुसरे वंशज

1 फेर अब्राहम नै कतूरा नाम की एक जनान्‍नी तै ब्याह कर लिया। 2 उसतै जिम्रान, योक्षान, मदना, मिद्यान, यिशबाक, अर शूह पैदा होया। 3 योक्षान तै शेबा अर ददान पैदा होया; अर ददान के वंश म्ह अश्शूरी, लतूशी, अर लुम्मी माणस होए। 4 मिद्यान के बेट्टे एपा, एपेर, हनोक, अबीदा, अर एल्दा होए, ये सारी कतूरा की औलाद*25:4 औलाद वंशज होई। 5 अब्राहम नै इसहाक तै तो अपणा सब कुछ दिया। 6 पर अपणी सारी रखैल के बेट्टयाँ ताहीं, थोड़ा-थोड़ा देकै अपणे जिन्दे जी अपणे बेट्टे इसहाक कै धोरै तै पूरब देश की ओड़ रहण खात्तर भेज दिए।

अब्राहम की मौत

7 अब्राहम एक सौ पचत्तर साल तक जिन्दा रहया। 8 अब्राहम की उम्र घणी होण के कारण यानिके पूरे बुढ़ापे की अवस्था म्ह प्राण छोड़ दिए; अर वो अपणे पूर्वजां म्ह जा मिल्या। 9 अर उसकै बेट्टे इसहाक अर इश्माएल नै, हित्ती सोहर के बेट्टे एप्रोन की मम्रे के स्याम्ही आळी जगहां म्ह, जो मकपेला की गुफा थी, उस म्ह उस ताहीं माट्टी दी; 10 यानिके जो जगहां अब्राहम नै हित्तियाँ तै मोल ली थी; उस्से म्ह अब्राहम, अर उसकी घरआळी सारा, दोनुआ तै माट्टी दी गई। 11 अब्राहम के मरण कै बाद परमेसवर नै उसके बेट्टे इसहाक ताहीं जो लहैरोई नाम के कुएँ कै धोरै रहवै था, आशीष दी।

इश्माएल की वंशावली

12 अब्राहम का बेट्टा इश्माएल जो सारा की मिस्री दास्सी हाजिरा तै पैदा होया था, उसकी या पीढ़ी सै। 13 इश्माएल के बेट्याँ के नाम अर पीढ़ी या सै: यानिके इश्माएल का जेठ्ठा बेट्टा नबायोत, फेर केदार, अदबएल, मिबसाम, 14 मिश्मा, दूमा, मस्सा, 15 हदद, तेमा, यतूर, नापीश, अर केदमा। 16 इश्माएल के बेट्टे येए होए, अर इन्हे कै नाम्मां कै मुताबिक इनकै गाम बसगे, अर उन बस्तियाँ म्ह के बारहा अपणे-अपणे कुल कै प्रधान होए। 17 इश्माएल एक सौ सैंतीस साल तक जिन्दा रह्या; फेर उसनै प्राण छोड़ दिए, अर वो*25:17 अपणे पूर्वजां म्ह जा मिल्या अपणे मरे होए माणसां म्ह जा मिल्या। 18 अर उसके वंश हवीला प्रान्त तै लेकै शूर प्रान्त तक, जो मिस्र देश के पूरब देश तै अश्शूर कै राह म्ह सै, बसगे; अर वोए उनका हिस्सा*25:18 वोए उनका हिस्सा वो अपणे पूर्वी देश के रिश्तेदारां म्ह रह्ये उनकै सारे माणसां म्ह पड़या।

याकूब अर एसाव का जन्म

19 अब्राहम के बेट्टे इसहाक की पीढ़ी या सै: अब्राहम तै इसहाक पैदा होया; 20 अर इसहाक नै चाळीस साल का होकै रिबका ताहीं, जो पद्दनराम कै वासी, अरामी बतूएल की बेट्टी, अर अरामी लाबान की भाण थी, ब्याह लिया। 21 इसहाक की घरआळी तो बाँझ थी, इस करकै उसनै उसकै कारण यहोवा तै बिनती करी; अर यहोवा नै उसकी बिनती सुणी, इस तरियां उसकी घरआळी रिबका गर्भवती होई। 22 उसकै गर्भ म्ह छोरे आप्पस म्ह लिपटकै एक दूसरा नै मारण लाग्गे। फेर उसनै कह्या, "मेरी जो इसीए हालत रहवैगी तो मै किस तरियां जिन्दा रहूँगी?" अर वा यहोवा की मर्जी बुझण नै गयी।

23 फेर यहोवा नै उसतै कह्या,

"तेरे गर्भ म्ह दो देशां की जात सैं,

अर तेरी कोख तै लिकड़दे ए दो

राज्य के माणस न्यारे-न्यारे होवैगें

अर एक राज्य के माणस दुसरे तै

घणे सामर्थी होवैगें अर बड़ा

बेट्टा छोट्टे के अधीन होवैगा।"

24 जिब उसकै बाळक पैदा होण का बखत आया, तो उसनै बेरा लाग्या, के उसकै गर्भ म्ह जुड़मा बच्‍चें सैं। 25 पैहला जो पैदा होया वो लाल लिकड़या, अर उसकी सारी देह पै काम्बळ की ढाळ रुंग थे; इस करकै उसका नाम एसाव*25:25 एसाव घणे बाळ आळा अर उसका लाल शरीर कै कारण उसनै एदोम भी कह्या जावै था धरया गया। 26 पाच्छै उसका भाई अपणे हाथ तै एसाव की एड़ी पकड़े होए पैदा होया; अर उसका नाम याकूब धरया गया। जिब रिबका नै उनतै जन्म दिया तब इसहाक साठ साल का था।

एसाव के जरिये पहलौठे का हक बेचणा

27 फेर वे छोरे बढ़ण लाग्गे अर एसाव तो बणवासी होकै चलाक शिकार खेलण आळा होग्या, पर याकूब सीध्धा माणस था, अर तम्बूआं म्ह रह्या करै था। 28 इसहाक एसाव का शिकार करया होया माँस खाणा पसन्द करया करै था, ज्यांतै वो उसतै प्यार करै था; पर रिबका याकूब तै प्यार करै थी।

29 एक दिन याकूब खाणे के खात्तर दाल पकावै था; अर एसाव मैदान तै थक्या होया आया। 30 फेर एसाव नै याकूब तै कह्या, "वो जो लाल चीज सै, उस्से लाल चीज म्ह तै मन्‍नै किमे खुवा, क्यूँके मै थक रह्या सूं।" इस्से कारण उसका नाम एदोम भी पड़या। 31 याकूब नै कह्या, "अपणा जेठ्ठा होण का हक आज मेरै हाथ बेच दे।" 32 एसाव नै कह्या, "देख, मै तो इब्बे भूख के मारे मरण पै सूं ज्यांतै जेठ्ठा होण का हक तै मन्‍नै के फायदा होवैगा?" 33 याकूब नै कह्या, "मेरे तै इब्बे कसम खा," आखर म्ह उसनै उसतै कसम खाई, अर अपणा जेठ्ठा होण का हक याकूब कै हाथ बेच दिया। 34 इसपै याकूब नै एसाव तै रोट्टी अर पकाई होई मसूर की दाळ दी; अर उसनै खाया-पिया, फेर उठकै चल्या गया। इस तरियां एसाव नै अपणा जेठ्ठा होण का हक निकम्मा जाण्या।