1 फेर परमेसवर नै नूह अर उसकै बेट्याँ तै आशीष दी अर उनतै कह्या, "फूल्‍लो-फळो अर बढ़ो अर धरती म्ह भर जाओ। 2 थारा डर अर भय धरती के सारे पशुआं, अर अकास के सारे पंछियाँ, अर धरती पै के सारे रेंगण आळे जन्तुआं, अर समुन्दर की सारी मछलियाँ पै बण्या रहवैगा उनपै थारा अधिकार होवैगा मै उननै थारे हाथ म्ह सौंप्पू सूं। 3 सारे चाल्‍लण आळे जन्तु थारा खाणा होवैगें; जिस तरियां मन्‍नै थारे ताहीं हरे-हरे छोट्टे पौधें दिए थे, उस्से तरियां ए सारा किमे देऊँ सूं। 4 पर माँस नै प्राण समेत यानिके लहू समेत थम ना खाईयों। 5 अर पक्‍का मै थारा लहू यानिके प्राण का बदला ल्युँगा: सारे पशु, अर माणसां, तै मै बदला ल्यूँगा; माणस की जान का बदला मै एक-एक कै भाई-बन्धु तै ल्यूँगा। 6 जो कोए माणस का लहू बहावैगा उसका लहू माणस तै ए बहाया जावैगा क्यूँके परमेसवर नै माणस ताहीं अपणे स्वरूप कै मुताबिक बणाया सै। 7 अर थम तो फूल्‍लो-फळो अर बढ़ो अर धरती पै भोत घणे बाळक पैदा करकै उस म्ह भर जाओ।"

8 फेर परमेसवर नै नूह अर उसके बेट्याँ तै कह्या, 9 "सुणो, मै थारै गैल अर थारे बाद जो थारी पीढ़ी होवैगी, उसकै गैल भी करार करुँ सूं; 10 अर सारे जिन्दा प्राणियाँ तै भी जो थारै गैल सैं, यानी पंछी, घरेलू पशु, धरती के सारे जंगळी-पशु, अर धरती के जितने जीव-जन्तु जहाज तै लिकड़े सैं। 11 मै थारै गैल अपणा यो करार करुँ सूं के सारे प्राणी फेर जल-प्रलय तै नाश न्ही होवैगें, अर धरती का नाश करण कै खात्तर फेर जल-प्रलय न्ही होवैगा।" 12 फेर परमेसवर नै कह्या, "जो करार मै थारै गैल, अर जितने जिन्दा प्राणी थारे गैल सैं उन सबकै गैल भी युग-युग की पीढ़ियाँ कै खात्तर करुँ सूं; उसका यो निशान सै: 13 मन्‍नै बादळ म्ह अपणा धनुष धरया सै, वो मेरै अर धरती कै बीच करार का निशान होवैगा। 14 अर जिब मै धरती पै बादळ फैलाऊं फेर बादळ म्ह धनुष दिखाई देवैगा। 15 मेरा जो करार थारै अर सारे जिन्दा देहधारी प्राणियाँ कै गैल सै; उस ताहीं मै याद करुँगा, फेर इसा जल-प्रलय कदे भी न्ही आवैगा, जिसतै सब प्राणियाँ का नाश हो। 16 जिब भी बादळ म्ह जो धनुष होवैगा मै उसनै देखकै यो सदा के करार नै याद करुँगा, जो परमेसवर कै अर धरती पै के सारे जिन्दा देहधारी प्राणियाँ कै बीच करया सै।" 17 फेर परमेसवर नै आखर म्ह नूह तै कह्या, "जो करार मन्‍नै धरती के सारे प्राणियाँ कै गैल करया सै, उसका निशान योए सै।"

18 नूह के जो बेट्टे जहाज म्ह तै लिकडे़, वे शेम, हाम अर येपेत थे; अर हाम कनान का पिता होया। 19 नूह के येए तीन बेट्टे थे, अर उनका वंश सारी धरती पै फैलग्या।

20 नूह खेत्ती करण लाग्या: अर उसनै अंगूर के बाग लगाऐ। 21 अर वो दाखमधु पीकै मतवाळा होग्या; अर अपणे तम्बू कै भित्तर नंगा होग्या। 22 फेर कनान कै पिता हाम नै, अपणे पिता ताहीं नंगा देख्या, अर बाहर नै आकै अपणे दोन्‍नु भाईयाँ तै बता दिया। 23 फेर शेम अर येपेत दोनुआं नै कपड़ा लेकै अपणे कंध्यां पै धरया अर पाच्छै की ओड़ उलटा चालकै अपणे पिता का उघाड़ा तन ढक दिया अर वे अपणा मुँह पाच्छै करे होए थे इस करकै उननै अपणे पिता ताहीं उघाड़ा कोनी देख्या। 24 जिब नूह का नशा उतर ग्या, फेर उसनै जाण लिया के उसके छोट्टे बेट्टे नै उसकै गेल्या के करया सै।

25 इस करकै उसनै कह्या,

"कनान श्रापित हो:

वो अपणे भाई-बन्धुआं के गुलाम्मां का गुलाम हो।"

26 फेर उसनै कह्या,

"शेम का परमेसवर यहोवा धन्य सै,

अर कनान शेम का गुलाम हो।

27 परमेसवर येपेत के वंश नै फैलावै;

अर वो शेम कै तम्बूआं म्ह बसै,

अर कनान उसका गुलाम हो।"

28 जल-प्रलय कै बाद नूह साढ़े तीन सौ साल तक जिन्दा रह्या। 29 इस तरियां नूह की कुल उम्र साढ़े नौ सौ साल की होई; उसकै बाद वो मर ग्या।