1 फेर यूसुफ नै फिरौन कै धोरै जाकै या खबर दी के, "मेरा पिता अर मेरे भाई, अर उनकी भेड़-बकरी, गां-बळध अर जो कुछ उनका सै, सारे कनान देश तै आ ग्ये सैं; अर इब्बे तो वे गोशेन प्रान्त म्ह सैं।" 2 फेर उसनै अपणे भाईयाँ म्ह तै पाँच जन फिरौन कै स्याम्ही खड़े कर दिए। 3 फिरौन नै उसकै भाईयाँ तै पूच्छया, "थारा काम-धन्धा के सैं?" उननै फिरौन तै कह्या, "तेरे दास पाळी सै, अर म्हारे पूर्वज भी इसे तरियां पाळी थे।" 4 फेर उननै फिरौन तै कह्या, "हम इस देश म्ह परदेशी की ढाळ रहण खात्तर आये सां; क्यूँके कनान देश म्ह भारी अकाळ होण कै कारण तेरे दास्सां की भेड़-बकरियाँ खात्तर चारा न्ही रहया; इस करकै अपणे दास्सां नै गोशेन प्रान्त म्ह रहण का हुकम दे।" 5 फेर फिरौन नै यूसुफ तै कह्या, "तेरा पिता अर तेरे भाई तेरे धोरै आ ग्ये सैं, 6 अर मिस्र देश तेरे स्याम्ही पड़या सै; इस देश का जो सबतै खुला हिस्सा हो, उस म्ह अपणे पिता अर भाईयाँ नै बसा दे; यानिके वे गोशेन प्रान्त म्ह ए रहे; अर जै तन्‍नै बेरा सै, के उन म्ह तै मेहनती आदमी सैं, तो उननै मेरे पशुआं के अधिकारी ठहरा दे।" 7 फेर यूसुफ नै अपणे पिता याकूब तै फिरौन कै स्याम्ही खड्या करया; अर याकूब नै फिरौन तै आशीर्वाद दिया। 8 फेर फिरौन नै याकूब तै पूच्छया, "तेरी उम्र कितनी होई सै?" 9 याकूब नै फिरौन तै कह्या, "मन्‍नै तो एक सौ तीस साल परदेशी होकै अपणा जीवन बिता लिया सै; मेरे जीवन कै दिन थोड़े अर दुख तै भरे होए भी थे, अर मेरै बाप-दाद्दे परदेशी होकै जितने दिन तक जिन्दा रहे उतने दिन का मै इब्बे न्ही होया।" 10 अर याकूब फिरौन नै आशीर्वाद देकै उसकै धोरै तै चल्या गया। 11 फेर यूसुफ नै अपणे पिता अर भाईयाँ ताहीं बसा दिया, अर फिरौन के हुकम कै मुताबिक मिस्र देश कै आच्छे तै आच्छे हिस्से म्ह, यानिके रामसेस नाम के परदेस म्ह, धरती देकै उन ताहीं सौप दिया। 12 अर यूसुफ अपणे पिता का, अर अपणे भाईयाँ अर पिता के सारे कुण्बे का, हरेक कै बाळकां की गिणती कै मुताबिक, खाणा दे-देकै उनका पालन-पोषण करण लाग्या।

13 उस सारे देश म्ह खाण नै कुछ न्ही रहया; क्यूँके अकाळ घणा भारी था, अर अकाळ कै कारण मिस्र देश अर कनान दोन्‍नु देश कमजोर होगे। 14 अर जितना रपियाँ मिस्र देश अर कनान देश म्ह था, सब ताहीं यूसुफ नै उस नाज कै बदले, जो उनकै रहणीये मोल लेवै थे कठ्ठा करकै फिरौन कै घर म्ह पोहचा दिया। 15 जिब मिस्र देश अर कनान देश का रपिया खतम होग्या, तो सारे मिस्री यूसुफ कै धोरै आ-आकै कहण लाग्गे, "म्हारे ताहीं खाण-पीण का समान दे, के हम रपिये के ना रहण तै तेरे रहंदे होए मर जावां?" 16 यूसुफ नै कह्या, "जै रपिये ना हों तो अपणे पशु दे द्यो, अर मै उनकै बदलै थमनै खाण नै दियुँगा।" 17 फेर वे अपणे पशु यूसुफ कै धोरै ल्याए; अर यूसुफ उन ताहीं घोड़े, भेड़-बकरी, गां-बळध अर गधां कै बदलै खाण नै देण लाग्या: उस साल म्ह वो सारी जात कै पशुआं कै बदलै खाणा देकै उनका पालन-पोषण करदा रहया। 18 वो साल तो बीतग्या; फेर आगले साल म्ह उननै उसकै धोरै आकै कह्या, "हम अपणे स्वामी तै या बात लह्को के न्ही राक्खैगें के म्हारे रपिये खतम होगे सै, अर म्हारे सारी ढाळ के पशु म्हारै स्वामी कै धोरै आ लिया सैं; इस करकै इब म्हारै स्वामी कै स्याम्ही म्हारी देह अर धरती नै छोड़कै और कुछ कोनी रहया। 19 हम तेरे देखदे क्यूँ मरां, अर म्हारी धरती क्यूँ उजड़ जावै? हमनै अर म्हारी धरती नै खाण-पीण के समान कै बदलै मोल ले, ताके हम अपणी धरती सुधा फिरौन के गुलाम हो, अर हमनै बीज दे, ताके हम मरण ना पावां, बल्के जिन्दा रहवां, अर धरती ना उजड़े।"

20 फेर यूसुफ नै मिस्र देश की सारी धरती ताहीं फिरौन कै खात्तर मोल लिया; क्यूँके उस खतरनाक अकाळ कै पड़ण तै मिस्र के माणसां नै अपणा-अपणा खेत बेचणा पड़या। इस तरियां सारी धरती फिरौन की होगी। 21 अर एक सिरे तै लेकै दुसरे सिरे तक, सारे मिस्र देश म्ह जो प्रजा रहवै थी, उस ताहीं उसनै नगरां* म्ह ल्याकै बस्या दिया। 22 पर पुजारियाँ की धरती उसनै मोल न्ही ली; क्यूँके पुजारियाँ कै खात्तर फिरौन की ओड़ तै रोज खाणे का बन्दोबस्त होया करै था, अर रोज जो खाणा फिरौन उन ताहीं देवै था, वोए वे खावैं थे; इस कारण उननै अपणी धरती बेचणी न्ही पड़ी। 23 फेर यूसुफ नै प्रजा कै माणसां तै कह्या, "सुणो, मन्‍नै आज कै दिन थारे ताहीं अर थारी धरती तै भी फिरौन कै खात्तर मोल ले लिया सै; देक्खों, थारै खात्तर उरै बीज सै, इसनै धरती म्ह बोओ। 24 अर जो कुछ उगै उसका पाचवां हिस्सा फिरौन नै दियो, बाकी च्यार हिस्से थारे रहवैंगें, ताके थम उसनै अपणे खेत्तां म्ह बोओ, अर अपणे-अपणे बाळ-बच्‍चे अर घर के और माणसां गैल खाया करियो।" 25 उननै कह्या, "तन्‍नै म्हारै ताहीं बचा लिया; म्हारै प्रभु कै अनुग्रह की निगांह म्हारै पै बणी रह, अर हम फिरौन कै गुलाम होकै रहवांगे।" 26 इस तरियां यूसुफ नै मिस्र देश की धरती कै बारै म्ह इसा नियम बणाया, के फिरौन उपज का पाँचवाँ हिस्सा लेवैगा, जो आज तक चाल्या आवै सै के सिर्फ पुजारियाँ की ए धरती पै फिरौन का हक न्ही होया।

27 इस्राएली मिस्र देश कै गोशेन परदेस म्ह रहण लाग्गे; अर ओड़ै की धरती उनकै अधिकार म्ह थी, अर वे फूल्‍लै-फळै, अर घणे बढ़गे। 28 मिस्र देश म्ह याकूब सत्रहा साल जिन्दा रहया इस तरियां याकूब की पूरी उम्र एक सौ सैंताळीस साल की होई।

29 जिब इस्राएल के मरण का दिन नजदिक आ ग्या, फेर उसनै अपणे बेट्टे यूसुफ तै बुलवाकै कह्या, "जै तेरा अनुग्रह मेरै पै हो, तो अपणा हाथ मेरी जाँघ कै तळै धरकै कसम खा, के तू मेरै गेल्या भलाई अर सच्‍चाई का बरताव करैगा, अर मन्‍नै मिस्र देश म्ह माट्टी न्ही देवैगा। 30 जिब मै* अपणे पूर्वजां कै गैल सो जाऊँगा, तो तू मन्‍नै मिस्र देश तै ठा कै उन्हे कै कब्रिस्तान म्ह दफनावैगा।" फेर यूसुफ नै कह्या, "जरुर मै तेरे कहे होए वचन कै मुताबिक करुँगा।" 31 फेर उसनै कह्या, "मेरे तै कसम खा।" तो यूसुफ नै उसतै कसम खाई। फेर इस्राएल नै खाट कै सिरहाणै की ओड़ सिर झुकाकै परमेसवर का धन्यवाद करया।