उत्पत्ति 34

दीना ताहीं भ्रष्ट करया जाणा

1 एक दिन लिआ की बेट्टी दीना, जो याकूब तै पैदा होई थी, उस देश*34:1 उस देश कनान देश की छोरियाँ तै मिलण गई थी। 2 फेर उस देश के प्रधान हिब्बी हमोर के बेट्टे शेकेम नै उस ताहीं देख्या, अर उस ताहीं ले जाकै उसकै गेल्या कुकर्म करकै उस ताहीं भ्रष्ट कर दिया। 3 फेर उसका मन याकूब की बेट्टी दीना पै आ ग्या, अर उसनै उस छोरी तै प्यार की बात करी, अर उसतै प्यार करण लाग्या। 4 आखर म्ह शेकेम नै अपणे पिता हमोर तै कह्या, "इस ताहीं मेरी घरआळी होण कै खात्तर बातचीत कर।" 5 जिब याकूब नै या बात सुणी के शेकेम नै मेरी बेट्टी दीना ताहीं अशुद्ध कर दिया सै, पर उसके बेट्टे उस बखत पशुआं कै गैल मदानां म्ह थे, इस करकै वो उनकै आण तक चुप-चाप रह्या। 6 फेर शेकेम का पिता हमोर लिकड़कै याकूब तै बातचीत करण कै खात्तर उसकै धोरै गया। 7 अर याकूब के छोरे या सुणदे ए मैदान तै घणे उदास अर छो म्ह होकै आए; क्यूँके शेकेम नै याकूब की बेट्टी कै गेल्या कुकर्म करकै इस्राएल के घराने तै बेकूफी का इसा काम करया था, जिसका करणा ठीक न्ही था। 8 पर हमोर नै उन सबतै कह्या, "मेरे बेट्टे शेकेम का मन थारी बेट्टी पै आया सै, ज्यांतै उसनै उसकी घरआळी होण कै खात्तर दे द्यो। 9 अर म्हारै बीच म्ह रहया करो, ताके म्हारै अर थारै बीच म्ह बेट्टे-बेटियाँ का ब्याह होन्दा रहवै। 10 अर म्हारै बीच म्ह बसे रहो; अर यो देश थारै स्याम्ही पड़या सै; इस म्ह रहकै लेण-देण करो, अर इसकी धरती नै अपणे खात्तर ले ल्यो।" 11 फेर शेकेम नै भी दीना के पिता अर भाईयाँ तै कह्या, "जै मेरै पै थारी अनुग्रह की निगांह हो, तो जो कुछ थम मेरै तै कहो, वो मै देऊँगा। 12 थम मेरै तै कितना ए मोल या बदला क्यूँ ना माँग्गो, फेर भी मै थारे कहे कै मुताबिक देऊँगा; पर उस छोरी नै मेरी घरआळी होण कै खात्तर मन्‍नै दे द्यो।"

13 फेर न्यू सोचकै के शेकेम नै म्हारी भाण दीना ताहीं अशुद्ध करया सै, याकूब के छोरयां नै शेकेम अर उसकै पिता हमोर ताहीं छळ कै गैल यो जवाब दिया, 14 "हम इसा काम न्ही कर सकदे, के किसे बिना खतना आळे माणस नै अपणी भाण द्याँ; क्यूँके इसतै म्हारी बदनामी होवैगी। 15 इस बात पै तो हम थारी मान लेवांगे के म्हारी ढाळ थारे म्ह तै हरेक माणस का खतना करया जावै। 16 फेर हम अपणी बेटियाँ थारै ब्याह देवांगे, अर थारी बेटियाँ हम ब्याह लेवांगे, अर थारै गैल बसे भी रहवांगै, अर हम दोन्‍नु एक ए कबिल्‍लै के माणस हो जावागें। 17 पर जै थम म्हारी बात नै ना मानकै अपणा खतना न्ही कराओगे, तो हम अपणी छोरी नै लेकै उरै तै चले जावागें।"

18 उसकी इस बात पै हमोर अर उसका बेट्टा शेकेम खुश होगे। 19 अर वो जवान जो याकूब की बेट्टी नै घणा चाहवै था, इस काम नै करण म्ह उसनै देर न्ही करी। वो तो अपणे पिता कै सारे कुण्बे म्ह घणा आदरणीय था। 20 इस करकै हमोर अर उसका बेट्टा शेकेम अपणे नगर के फाटक कै धोरै जाकै सारे नगर के रहणियाँ ताहीं या समझाण लाग्गे; 21 के देक्खो, "वे माणस तो म्हारै गैल मिलकै रहणा चाहवै सैं; इस करकै उननै इस देश म्ह रहकै लेण-देण करण द्यो; देक्खो, यो देश उनकै खात्तर भी घणाए सै; फेर हम उनकी बेटियाँ नै ब्याह लेवैगें, अर अपणी छोरियाँ नै उन ताहीं दिया करागें। 22 वे माणस सिर्फ इस बात पै म्हारै गैल रहण अर एक ए कबिल्‍लै के माणस हो जाण नै राज्जी सैं ताके उनकी तरियां म्हारे सारे माणसां का भी खतना करया जावै। 23 के उनकी भेड़-बकरी, अर गां-बळध बल्के उनकै सारे पशु अर धन-दौलत म्हारी न्ही हो जावैगी? इतणाए करां के हम उनकी बात मान ल्यां, तो वे म्हारै गैल रहवैगें।" 24 इस करकै जितने उस नगर कै फाटक तै लिकड़ै थे, उन छोट्टे-बड़े सारया नै हमोर की अर उसकै बेट्टे शेकेम की बात मान्‍नी; अर हरेक माणस का खतना करया गया, जितने उस नगर कै फाटक तै लिकड़ै थे।

25 खतने के तीसरे दिन, जिब वे माणस दर्द म्ह पड़ै थे, तो इसा होया के शिमोन अर लेवी याकूब कै दो बेट्याँ नै, जो दीना कै भाई थे, अपणी-अपणी तलवार लेकै उस नगर म्ह बेधड़क होकै बड़गे अर सारे माणसां ताहीं मार गेरया। 26 हमोर अर उसके बेट्टे शेकेम ताहीं उननै तलवार तै मार गेरया, अर दीना ताहीं शेकेम कै घर तै लिकाड़ लेगे। 27 नगर के माणसां नै मारण कै बाद याकूब के बाक्‍की छोरयां नै नगर म्ह चढ़कै उस ताहीं इस करकै लूट लिया के उस म्ह उनकी भाण अशुद्ध करी गई थी। 28 उननै भेड़-बकरी, गां-बळध, अर गधे, अर नगर अर मदानां म्ह जितना धन था ले लिया। 29 वे उनके सारे धन नै, अर उनकै बाळ-बच्‍चे, अर बिरबानियाँ नै भी बन्धक बणाकै लेगे, बल्के हरेक घर म्ह जो कुछ था, उस ताहीं उननै लूट लिया। 30 फेर याकूब नै शिमोन अर लेवी तै कह्या, "थमनै जो इस देश के रहण आळे कनानियाँ अर परिज्जियाँ के मन म्ह मेरै खिलाफ नफरत पैदा कराई सै, इसतै थमनै मेरै ताहीं संकट म्ह गेरया सै, क्यूँके मेरै गेल्या तो थोड़े ए माणस सै, इस करकै इब वे कठ्ठे होकै मेरै पै चढ़ैंगे, अर मन्‍नै मार गेरैगें, तो मै अपणे कुण्बे समेत सत्यानाश हो ज्याऊँगा।" 31 पर उननै कह्या, "के वो म्हारी भाण कै गेल्या वेश्या की तरियां बरताव करै के?"