1 जिब राहेल नै देख्या के याकूब कै खात्तर मेरै तै कोए औलाद पैदा न्ही होन्दी, तो वा अपणी भाण तै जळण राक्खण लाग्गी, अर याकूब तै कह्या, "मन्‍नै भी बाळक दे, न्ही तो मै मर ज्यांगी।" 2 फेर याकूब नै राहेल तै छो म्ह होकै कह्या, "के मै परमेसवर सूं? तेरी कोख तो उस्से नै बन्द कर राक्खी सै।" 3 राहेल नै कह्या, "आछ्या, मेरी दास्सी बिल्हा मौजूद सै; उस्से कै धोरै जा, वा मेरै खात्तर बाळक जणैगी, अर मै उसकै जरिये माँ बण जाऊँगी।" 4 फेर राहेल नै उस ताहीं अपणी दास्सी बिल्हा पत्नी होण खात्तर दे दी; अर याकूब उसकै धोरै गया। 5 अर बिल्हा गर्भवती होई, अर याकूब तै उसकै एक छोरा पैदा होया। 6 फेर राहेल नै कह्या, "परमेसवर नै मेरा न्याय चुकाया अर मेरी सुणकै मेरे ताहीं एक छोरा दिया।" इस करकै उसनै उसका नाम दान धरया। 7 राहेल की दास्सी बिल्हा फेर गर्भवती होई अर याकूब तै एक और छोरा पैदा होया। 8 फेर राहेल नै कह्या, "मन्‍नै अपणी भाण कै गेल्या घणा मल्‍लयुद्ध करया अर इब मै जीतगी।" आखर म्ह उसनै उसका नाम नप्ताली धरया।

9 जिब लिआ नै देख्या के मै तो जाम्मण तै गई, फेर उसनै अपणी दास्सी जिल्पा ताहीं याकूब की पत्नी होण खात्तर दे दिया। 10 अर लिआ की दास्सी जिल्पा कै भी याकूब तै एक बेट्टा पैदा होया। 11 फेर लिआ नै कह्या, "बड़ी खुशनसीब सूं, मै!" इस करकै उसनै उसका नाम गाद धरया। 12 फेर लिआ की दास्सी जिल्पा कै याकूब तै एक और छोरा पैदा होया। 13 फेर लिआ नै कह्या, "मै बड़ी खुशनसीब सूं; जरुर बिरबान्‍नी मन्‍नै धन्य कहवैंगी।" इस करकै उसनै उसका नाम आशेर धरया।

14 गेहूँ की लामणी के दिनां म्ह रूबेन नै मैदान म्ह दूदाफळ* मिले, अर वो उननै अपणी माँ लिआ कै धोरै लेग्या, फेर राहेल नै लिआ तै कह्या, "अपणे बेट्टे कै दूदाफळां म्ह तै कुछ मन्‍नै दे।" 15 उसनै उसतै कह्या, "तन्‍नै जो मेरै पति ताहीं ले लिया सै, के इतणै तै सबर कोनी होया? के इब तू मेरै बेट्टे के दूदाफळ भी लेणा चाहवै सै?" राहेल नै कह्या, "आछ्या, तेरे बेट्टे के दूदाफळां कै बदलै वो आज रात नै तेरे गैल सोवैगा।" 16 साँझ नै जिब याकूब मैदान तै आण लागरया था, तो लिआ उसतै मिलण लिकड़ी, अर कह्या, "तन्‍नै मेरै ए धोरै आणा पड़ैगा, क्यूँके मन्‍नै अपणे बेट्टे कै दूदाफळ देकै तू साच्‍चए मोल ले लिया।" फेर वो उस रात उस्से कै गैल सोया। 17 फेर परमेसवर नै लिआ की सुणी, अर वा गर्भवती होई अर याकूब तै उसकै पाँचवाँ बेट्टा पैदा होया। 18 फेर लिआ नै कह्या, "मन्‍नै जो अपणे पति तै अपणी दास्सी दी, इस करकै परमेसवर नै मेरै ताहीं मेरी मजदूरी दी सै।" इस करकै उसनै उसका नाम इस्साकार* धरया। 19 लिआ फेर गर्भवती होई अर याकूब तै उसकै छठा छोरा पैदा होया। 20 फेर लिआ नै कह्या, "परमेसवर नै मेरै ताहीं आच्छा दान दिया सै; इब की बार मेरा पति मेरै गैल बण्या रहवैगा, क्यूँके मेरै उसतै छः छोरे पैदा हो लिए सैं।" इस करकै उसनै उसका नाम जबूलून धरया। 21 फेर उसकै बाद एक छोरी भी पैदा होई, अर उसनै उसका नाम दीना* धरया। 22 परमेसवर नै राहेल की भी सुधि ली, अर उसकी बात सुणकै उसकी कोख खोल्‍ली। 23 इस करकै वा गर्भवती होई अर उसकै एक छोरा पैदा होया; फेर उसनै कह्या, "परमेसवर नै मेरी बांझपण की बदनाम्मी ताहीं दूर कर दिया सै।" 24 इस करकै उसनै न्यू कहकै उसका नाम यूसुफ धरया, "परमेसवर मन्‍नै एक छोरा और भी देवैगा।"

25 जिब राहेल तै यूसुफ पैदा होया, फेर याकूब नै लाबान तै कह्या, "मन्‍नै बिदा कर के मै अपणे देश अर जगहां म्ह जाऊँ। 26 मेरी घरआळी अर मेरे बाळक, जिनकै खात्तर मन्‍नै तेरी सेवा करी सै, उननै मेरै ताहीं दे के मै चल्या जाऊँ; तन्‍नै तो बेरा सै के मन्‍नै तेरी किसी सेवा करी सै।" 27 लाबान नै उसतै कह्या, "जै तेरी निगांह म्ह मन्‍नै अनुग्रह पाया सै, तो उरैए रह जा; क्यूँके मन्‍नै अनुभव* तै जाण लिया सै के यहोवा नै तेरै कारण मेरै तै आशीष दी सै।" 28 फेर उसनै कह्या, "तू ठीक बता के मै तेरै तै के देऊँ, अर मै उसनै देऊँगा।" 29 उसनै उसतै कह्या, "तू जाणै सै के मन्‍नै तेरी किसी सेवा करी, अर तेरे पशु मेरै धोरै किस तरियां बढ़ते रहे। 30 मेरै आण तै पैहल्या वे कितणे थे अर इब कितणे हो गये सैं; अर यहोवा नै मेरै आणकै कारण तेरे ताहीं आशिषित करया सै। पर मै अपणे घर का काम कद करण पाऊँगा?" 31 उसनै फेर कह्या, "मै तेरे ताहीं के देऊँ?" याकूब नै कह्या, "तू मन्‍नै कुछ न्ही दे; जै तू मेरै खात्तर एक काम करै, तो मै फेर तेरी भेड़-बकरियाँ नै चराऊँगा, अर उनकी रुखाळ करुँगा। 32 मै आज तेरी सारी भेड़-बकरियाँ कै बिचाळै होकै लिकडूँगा, अर जो भेड़ या बकरी चित्तीआळी या चितकबरी हो, अर जो भेड़ काळी हो, अर जो कोए चितकबरी अर चित्तीआळी हो, उननै मै न्यारा करकै राक्खूँगा; अर मेरी मजदूरी की किम्मत वोए होवैगी। 33 अर जिब आग्गै तै मेरी मजदूरी का जिक्र तेरे स्याम्ही चाल्‍लै, तो मेरी ईमानदारी की याए गवाही होगी; यानिके बकरियाँ म्ह तै जो कोए ना चित्तीआळी ना चितकबरी हो, अर भेड्डां म्ह तै जो कोए काळी ना हो, जै मेरै धोरै लिकड़ै, तो चोरी की होवैगी।" 34 फेर लाबान नै कह्या, "तेरे कहण कै मुताबिक हो।" 35 उस्से दिन उसनै सारे धारीआळे अर चितकबरे बकरयां, अर सारे चित्तीआळी अर चितकबरी बकरियाँ नै, यानिके जिन म्ह कुछ धोळापण था, उननै अर सारी काळी भेड्डां ताहीं भी न्यारी करकै अपणे बेट्याँ कै हाथ्थां म्ह सौप दिया। 36 अर उसनै अपणे अर याकूब कै बिचाळै तीन दिन के राह का अन्तर ठहराया; अर याकूब लाबान की भेड़-बकरियाँ ताहीं चराण लाग्या।

37 फेर याकूब नै चिनार, बदाम, अर अर्मोन दरखत्तां की हरी-हरी छड़ी लेकै, उनके छिलके कित्ते-कित्ते तै छील कै, उन ताहीं धारीदार बणा दिया, ताके उन छड़ियाँ की सफेदी दिखाई देण लाग्गै। 38 अर फेर छीली होई छड़ियाँ ताहीं भेड़-बकरियाँ कै स्याम्ही उनकै पाणी पीण कै कठौत्यां म्ह खड्या करया; अर जिब वे पाणी पीण कै खात्तर आई फेर ग्याभण होगी। 39 छड़ियाँ कै स्याम्ही ग्याभण होकै, भेड़-बकरी धारीआळे, चित्तीआळे अर चितकबरे बच्‍चे जणी। 40 फेर याकूब नै भेड्डां कै बच्यां ताहीं न्यारा-न्यारा करया, अर लाबान की भेड़-बकरियाँ कै मुँह ताहीं चित्तीआळे अर सारे काळे बच्यां की ओड़ कर दिया; अर अपणे टोळां ताहीं उनतै न्यारा राख्या, अर लाबान की भेड़-बकरियाँ तै मिलण न्ही दिया। 41 अर जद-जद ठाड्डी भेड़-बकरी ग्याभण होवै थी, जिब-जिब याकूब उन छड़ियाँ ताहीं कठौताँ म्ह उनकै स्याम्ही धरदे था; जिसतै वे छड़ियाँ ताहीं देखदी होई ग्याभण हो जावै। 42 पर जिब कमजोर भेड़-बकरी ग्याभण होवै थी, तो वो उननै उनकै आग्गै न्ही राक्खै था। इसतै कमजोर-कमजोर लाबान की रहीं, अर ठाड्डी-ठाड्डी याकूब की होगी। 43 इस तरियां याकूब भोत धनवान होग्या, अर उसकै घणीए भेड़-बकरी, दास-दास्सी अर ऊँट अर गधे होगे।