उत्पत्ति 21

इसहाक का जन्म

1 यहोवा नै जिसा कह्या था उस्से तरियां ए सारा की सुधि लेकै उसकै गेल्या अपणे वचन कै मुताबिक करया। 2 सारा अब्राहम तै गर्भवती होकै उसकै बुढ़ापे म्ह उस्से बताए होए बखत पै जो परमेसवर नै उसतै तय करया था, एक बेट्टा पैदा होया। 3 अब्राहम नै अपणे बेट्टे का नाम जो सारा तै पैदा होया था उसका नाम इसहाक धरया। 4 अर जिब उसका बेट्टा इसहाक आठ दिन का होया, तो उसनै परमेसवर के हुकम कै मुताबिक उसका खतना करया। 5 जिब अब्राहम का बेट्टा इसहाक पैदा होया तो वो सौ साल का था। 6 अर सारा नै कह्या, "परमेसवर नै मेरै ताहीं प्रफुल्‍लित करया सै; इस करकै सारे सुणण आळे भी मेरै गेल्या प्रफुल्‍लित होवैगें।" 7 फेर उसनै यो भी कह्या, "के कोए कदे अब्राहम तै कह सकै था, के सारा छोरे नै दूध प्यावैगी? पर देक्खों, मेरै तै उसकै बुढ़ापे म्ह एक बेट्टा पैदा होया।" 8 अर वो छोरा बढ़या, अर उसका दूध छुटाया गया; अर इसहाक कै दूध छुड़ाण कै दिन अब्राहम नै बड़ा भोज करया।

हाजिरा अर इश्माएल का लिकाड़या जाणा

9 फेर सारा नै मिस्री हाजिरा का बेट्टा, जो अब्राहम तै पैदा होया था, हाँस्सी करदा होया दिखाई दिया। 10 इस कारण उसनै अब्राहम तै कह्या, "इस दास्सी नै उसके बेट्टे सुधा लिकाड़ दे: क्यूँके इस दास्सी का बेट्टा मेरे बेट्टे इसहाक कै गेल्या साझी न्ही होवैगा।" 11 या बात अब्राहम नै अपणे बेट्टे कै कारण बुरी लाग्गी। 12 पर परमेसवर नै अब्राहम तै कह्या, "उस छोरे अर अपणी दास्सी कै कारण बुरा ना मान; जो बात सारा तेरे तै कहवै, उस ताहीं मान, क्यूँके जो तेरी पीढ़ी कुह्वावैगी वो इसहाक तै ए चाल्‍लैगी। 13 दास्सी के बेट्टे तै भी मै एक जात्ति पैदा करुँगा ज्यांतै के वो तेरी पीढ़ी सै।"

14 इस करकै अब्राहम नै सबेरै तड़कै उठकै रोट्टी अर पाणी की भरी चमड़े की थैल्‍ली भी हाजिरा ताहीं दी, अर उसकै कंधे पै धरी, अर उसकै छोरे ताहीं भी उसतै देकै उस ताहीं बिदा करया। वा चली गई, अर बेर्शेबा के जंगळ-बियाबान म्ह भटकण लाग्गी। 15 जिब थैल्‍ली का पाणी खतम होग्या, तो उसनै छोरे ताहीं एक झाड़ी कै तळै छोड़ दिया। 16 अर खुद उसतै तकरीबन सौ मीटर की दूरी पै जाकै उसकै स्याम्ही न्यू सोचकै बैठ गई, "मन्‍नै छोरे की मौत देखणी ना पड़ै।" फेर वा उसकै स्याम्ही बैठकै रुक्‍के मार-मारकै रोण लाग्गी। 17 परमेसवर नै उस बाळक के रोण की आवाज सुणी; अर उसके दूत नै सुर्ग तै हाजिरा ताहीं पुकार कै कह्या, "हे हाजिरा, तेरै के होया? मत डर; क्यूँके जड़ै तेरा बेट्टा सै ओड़ै तै उसकी आवाज परमेसवर नै सुणी सै। 18 उठ, अपणे छोरे नै ठा अर अपणे हाथ म्ह ले; क्यूँके मै उसकै जरिये एक बड़ी जात बणाऊँगा।" 19 फेर परमेसवर नै उसकी आँख खोल दी, अर उस ताहीं एक कुआँ दिखाई पड़या; फेर उसनै जाकै थैल्‍ली पाणी तै भरकै बेट्टे तै पिलाया। 20 अर परमेसवर उसके बाळक कै गैल रह्या; अर जिब वो बड़ा होया, तो जंगळ-बियाबान म्ह रहन्दे-रहन्दे धनुषधारी बणग्या। 21 वो पारान नाम के जंगळ-बियाबान म्ह रह्या करै था; अर उसकी माँ नै उसकै ब्याह खात्तर मिस्र देश तै एक छोरी मँगवाई।

अबीमेलेक गैल अब्राहम का करार

22 उन दिनां म्ह इसा होया के अबीमेलेक अपणे सेनापति पीकोल ताहीं गैल लेकै अब्राहम तै मिलण आया अर उसतै कहण लाग्या, "जो कुछ तू करै सै उस म्ह परमेसवर तेरे गैल रहवै सै; 23 इस करकै इब मेरै तै उरै इस बारै म्ह परमेसवर की कसम खा के तू ना तो मेरै तै छळ करैगा, अर ना कदे मेरै पीढ़ी तै करैगा, पर जिसी दया मन्‍नै तेरे पै करी सै, उस्से तरियां ए तू भी मेरै पै अर इस देश पै, जिस म्ह तू रहवै सै, दया करैगा।" 24 अब्राहम नै कह्या, "हाँ मै कसम खाऊँ सूं।" 25 अर अब्राहम नै अबीमेलेक ताहीं एक कुएँ कै बारै म्ह जो अबीमेलेक के नौकरां नै जोर-जबरदस्ती तै ले लिया था, उल्हाणा दिया। 26 फेर अबीमेलेक नै कह्या, "मै न्ही जाण्दा के किसनै यो काम करया; अर तन्‍नै भी मेरै ताहीं न्ही बताया, अर ना मन्‍नै आज तै पैहल्या इसकै बारै म्ह किमे सुण्या।" 27 फेर अब्राहम नै भेड़-बकरी, अर गां-बळध अबीमेलेक ताहीं दिए; अर उन दोनुआ नै आप्पस म्ह करार करया। 28 अब्राहम नै सात बच्‍चियाँ ताहीं झुण्ड तै न्यारा करया। 29 अबीमेलेक नै अब्राहम तै पूच्छया, "इन सात बच्‍चियाँ का, जो तन्‍नै न्यारी कर राक्खी सैं, इसका के मतलब सै?" 30 उसनै कह्या, "तू इन सात बच्‍चियाँ नै इस बात की गवाही जाणकै मेरै हाथ्थां तै ले के मन्‍नै यो कुआँ खोद्या सै।" 31 उन दोनुआ नै, जो उस जगहां आप्पस म्ह कसम खाई, इस्से कारण उस जगहां का नाम बेर्शेबा पड़या। 32 जिब उननै बेर्शेबा*21:32 बेर्शेबा इसका मतलब सै कसम का कुआँ म्ह सदा खात्तर करार करया, फेर अबीमेलेक अर उसका सेनापति पीकोल, उठकै पलिश्तियाँ कै देश म्ह बोहड़गे। 33 फेर अब्राहम नै बेर्शेबा म्ह झाऊ का एक दरखत लगाया, अर ओड़ै यहोवा तै जो सनातन परमेसवर सै, प्रार्थना करी। 34 अब्राहम पलिश्तियाँ के देश म्ह घणे दिनां तक परदेशी होकै रह्या।