उत्पत्ति 22

अब्राहम की परीक्षा

1 इन बात्तां कै बाद इसा होया के परमेसवर नै, अब्राहम तै न्यू कहकै उसकी परीक्षा ली, "हे अब्राहम!" उसनै कह्या, "देख, मै उरै सूं।" 2 परमेसवर नै कह्या, "अपणे बेट्टे नै यानिके अपणे इकलौते बेट्टे इसहाक नै, जिसतै तू प्यार करै सै, गैल लेकै मोरिय्याह देश म्ह चल्या जा, अर ओड़ै उसनै एक पहाड़ कै उप्पर जो मै तन्‍नै बताऊँगा होमबलि करकै चढ़ा।" 3 आखर म्ह अब्राहम तड़कैए-तड़कै उठ्या अर अपणे गधे पै काठी कसकै अपणे दो नौक्‍कर, अर अपणे बेट्टे इसहाक ताहीं गैल लिया, अर होमबलि कै खात्तर लाकड़ी चीर ली; फेर लिकड़कै उस जगहां की ओड़ चाल पड़या, जिसका जिक्र परमेसवर नै उसतै करया था। 4 अर तीसरे दिन अब्राहम नै आँख ठाकै उस जगहां ताहीं दूर तै देख्या। 5 अर उसनै अपणे नौकरां तै कह्या, "गधे कै धोरै ए ठहरे रहो; मै अर मेरा बेट्टा इसहाक ओड़ै दण्‍डवत करकै, फेर थारे धोरै बोहड़ आवागें।" 6 फेर अब्राहम नै होमबलि की लाकड़ी ले अपणे बेट्टे इसहाक पै लाद्दी, अर आग अर छुरी ताहीं अपणे हाथ म्ह लिया; अर वे दोन्‍नु कठ्ठे चाल पड़े। 7 इसहाक नै अपणे पिता अब्राहम तै कह्या, "हे पिता," उसनै कह्या, "हे मेरै बेट्टे, के बात सै?" उसनै कह्या, "देख, आग अर लाकड़ी तो सैं; पर होमबलि कै खात्तर भेड़ कित्त सै?" 8 अब्राहम नै कह्या, "हे मेरै बेट्टे, परमेसवर होमबलि की भेड़ का इन्तजाम आप्पे करैगा।" अर वे दोन्‍नु गैल-गैल आग्गै चाल्दे गये।

9 वे उस जगहां पै पोहचे जो परमेसवर नै उस ताहीं बताई थी; फेर अब्राहम नै ओड़ै वेदी बणाकै लाकड़ियाँ ताहीं चुण-चुणकै धरया, अर अपणे बेट्टे इसहाक नै बाँधकै वेदी पै धरी लाकड़ियाँ कै उप्पर लिटा दिया। 10 फेर अब्राहम नै हाथ बढ़ाकै छुरी ले ली ताके अपणे बेट्टे नै बलि करै। 11 फेर यहोवा के दूत नै सुर्ग तै उस ताहीं कै कह्या, "हे अब्राहम, हे अब्राहम!" उसनै कह्या, "देख, मै उरै सूं।" 12 उसनै कह्या, "उस छोरे पै हाथ ना बढ़ावै, अर उसकै कुछ ना करै; क्यूँके तन्‍नै जो मेरै तै अपणे बेट्टे, बल्के अपणे इकलौते बेट्टे ताहीं भी, न्ही राख छोड्या; इसतै इब मै जाण ग्या सूं, के तू परमेसवर का भय मान्‍नै सै।" 13 फेर अब्राहम नै आँख ठाकै और के देख्या, के उसकै पाच्छै एक मिंढा अपणे सीन्गां तै एक झाड़ी म्ह फँस रहया सै; आखर म्ह अब्राहम नै जाकै उस मिंढे ताहीं लिया, अर अपणे बेट्टे की जगहां पै होमबलि करकै चढ़ाया। 14 अब्राहम नै उस जगहां का नाम यहोवा यिरे*22:14 यिरे वो परमेसवर जो सब कुछ देवै सै धरया, इसकै मुताबिक आज ताहीं भी कह्या जावै सै, "यहोवा कै पहाड़ पै इन्तजाम करया जावैगा।"

15 फेर यहोवा कै दूत नै दुसरी बार सुर्ग तै अब्राहम नै रुक्‍का मारकै कह्या, 16 "यहोवा की या वाणी सै, के मै अपणी ए या कसम खाऊँ सूं के तन्‍नै जो यो काम करया सै के अपणे बेट्टे, बल्के अपणे इकलौते बेट्टे नै भी, न्ही राख छोड्या; 17 इस करकै मै पक्‍का तन्‍नै आशीष दियुँगा; अर जरुर तेरी पीढ़ी नै अकास के तारागण, अर समुन्दर तट कै रेत के कणां की ढाळ अनगिणत करुँगा, अर तेरी पीढ़ी दुश्मनां कै नगरां के अधिकारी होवैगें; 18 अर धरती की सारी जात तेरी पीढ़ी कै कारण आशिषित होवैगीं: क्यूँके तन्‍नै मेरी बात मान्‍नी सै।" 19 फेर अब्राहम अपणे नौकरां कै धोरै बोहड़ आया, अर वे सारे बेर्शेबा ताहीं गैल-गैल गये; अर अब्राहम बेर्शेबा म्ह रहण लाग्या।

नाहोर की पीढ़ी

20 इन बात्तां कै बाद इसा होया के अब्राहम नै यो सन्देस मिल्या, "मिल्का कै तेरे भाई नाहोर के जरिये सन्तान पैदा होई सैं।" 21 मिल्का के बेट्टे तो ये होए, यानिके उसका जेठ्ठा ऊस, अर ऊस का भाई बूज, अर कमूएल, जो अराम का पिता होया। 22 फेर केसेद, हज़ो, पिल्दाश, यिद्लाप, अर बतूएल। 23 इन आठवाँ ताहीं मिल्का नै अब्राहम के भाई नाहोर कै जरिये जन्म दिया। अर बतूएल तै रिबका पैदा होई। 24 फेर नाहोर कै रूमा नाम की एक रखैल भी थी; जिसतै तेबह, गहम, तहश, अर माका, पैदा होए।