1 फेर लाबान कै बेट्टयाँ की ये बात याकूब कै सुणण म्ह आई के, "याकूब नै म्हारै पिता का सब कुछ खोस लिया सै, अर म्हारे पिता के कारण उसनै या धन-सम्पत्ति हासिल होई सै।" 2 अर याकूब नै लाबान कै मुँह देखकै ताड़ लिया, के उसका बरताव पैहल्या की तरियां प्यार का कोनी। 3 फेर यहोवा नै याकूब तै कह्या, "अपणे बाप-दाद्याँ कै देश अर अपणी जन्म-भूमि म्ह बोहड़ ज्या, अर मै तेरे गैल रहूँगा।" 4 फेर याकूब नै राहेल अर लिआ ताहीं, मदानां म्ह अपणी भेड़-बकरियाँ कै धोरै बुलवाकै कह्या, 5 "थारे पिता का मुँह देखकै म्ह समझ ग्या, के वो मन्‍नै पैहल्या की तरियां इब प्यार कोनी करदा; पर मेरै पिता का परमेसवर मेरै गैल सै। 6 अर थम भी जाणो सो, के मन्‍नै थारे पिता की सेवा पूरे तन-मन तै करी सै। 7 फेर भी थारे पिता नै मेरै तै छळ करकै मेरी मजदूरी ताहीं दस बार बदल्या सै; पर परमेसवर नै उस ताहीं मेरा नुकसान न्ही करण दिया। 8 जिब उसनै कह्या, ‘चित्तीआळे बच्‍चे तेरी मजदूरी ठैहरैगें,’ फेर सारी भेड़-बकरी चित्तीआळे ए जाम्मण लाग्गी, अर जिब उसनै कह्या, ‘धारीआळे बच्‍चे तेरी मजदूरी ठैहरैगें,’ फेर सारी भेड़-बकरी धारीआळे जाम्मण लाग्गी। 9 इस तरियां तै परमेसवर नै थारे पिता के पशु लेकै मेरै ताहीं दे दिए। 10 भेड़-बकरियाँ कै ग्याभण होण कै बखत मन्‍नै सपने म्ह के देख्या, के जो बकरे बकरियाँ पै चढ़रे थे, वे धारीआळे, चित्तीआळे, अर धब्बेदार सैं। 11 फेर परमेसवर के दूत नै सपने म्ह मेरै तै कह्या, ‘हे याकूब,’ फेर मन्‍नै जवाब दिया, ‘के हुक्म सै।’ 12 तब दूत नै कह्या, ‘आँख ठाकै उन सारे बकरयां ताहीं जो बकरियाँ पै चढ़ रहे सैं, देख, के वे धारीआळे, चित्तीआळे, अर धब्बेदार सैं; क्यूँके जो कुछ लाबान तेरे तै करै सै, वो मन्‍नै देख्या सै। 13 मै उस बेतेल का परमेसवर सूं, जड़ै तन्‍नै एक खम्भे पै तेल गेरया था, अर मेरी मन्‍नत मान्‍नी थी। इब चाल, इस देश तै लिकड़कै अपणी जन्म-भूमि म्ह बोहड़ ज्या।’"

14 फेर राहेल अर लिआ नै उसतै कह्या, "के म्हारै पिता कै घर म्ह इब भी म्हारा कुछ हिस्सा या भाग बच्या सै? 15 के हम उसकी निगांह म्ह पराये न्ही ठहरी? देख, उसनै म्हारै ताहीं तो बेच दिया, अर म्हारै रपियाँ नै भी खा बैठ्या सै। 16 इस करकै सच म्ह ए परमेसवर नै म्हारै पिता का जो धन ले लिया सै, वो म्हारा, अर म्हारै बाळकां का सै; इब जो कुछ परमेसवर नै तेरे तै कह्या सै, वोए कर।"

17 फेर याकूब नै अपणे बाळकां तै अर बिरबानियाँ ताहीं ऊँटां पै चढ़ाया; 18 अर जितने पशु वो पद्दनराम म्ह कठ्ठा करकै अमीर होया था, सारया नै कनान म्ह अपणे पिता इसहाक कै धोरै जाण के विचार तै, त्यारी करण लाग रहया था। 19 लाबान तो अपणी भेड्डां की ऊन कतरण कै खात्तर चल्या गया था, अर राहेल अपणे पिता के घर के देवत्यां नै चुरा लेगी। 20 आखर म्ह याकूब लाबान अरामी कै धोरै तै चोरी तै भाजणा चाहवै था, उसतै कोनी बताया के मै चल्या जाऊँगा। 21 वो अपणा सब कुछ लेकै फरात नदी नै पार करकै अपणा मुँह गिलाद कै पहाड़ी देश की ओड़ करकै चाल्या।

22 अर तीसरे दिन लाबान नै खबर मिली के याकूब भाज ग्या सै। 23 इस करकै उसनै अपणे भाईयाँ ताहीं लेकै उसका सात दिन तक पिच्छा करया, अर गिलाद कै पहाड़ी देश म्ह उस ताहीं जा पकड्या। 24 फेर परमेसवर नै रात नै सपने म्ह अरामी लाबान कै धोरै आकै कह्या, "सावधान रह, तू याकूब तै ना तो भला कहिये अर ना बुरा।" 25 अर लाबान याकूब कै धोरै पोहच ग्या। याकूब नै अपणा तम्बू गिलाद नाम के पहाड़ी देश म्ह खड्या कर राख्या था; अर लाबान नै भी अपणे भाईयाँ कै गेल्या अपणा तम्बू उस्से पहाड़ी देश म्ह खड्या करया। 26 फेर लाबान याकूब तै कहण लाग्या, "तन्‍नै यो के करया, के मेरै धोरै तै चोरी तै चल्या आया, अर मेरी बेटियाँ ताहीं इसा ले आया, जणु कोए युद्ध म्ह तलवार की नोक पै कैदी बणाकै ल्याया हों? 27 तू क्यूँ बिना बताए भाज आया, अर मेरै तै बिना कुछ कहे मेरै धोरै तै चोरी तै चल्या आया; न्ही तो मै तन्‍नै खुशी की गेल्या गान्दे बजान्दे, अर गीत गुवा कै बिदा करदा? 28 तन्‍नै तो मेरे तै अपणे बेट्टे-बेटियाँ ताहीं चुम्ण भी न्ही दिया? न्यू करकै तन्‍नै बेकूफी करी सै। 29 थारा नुकसान करण की ताकत मेरै हाथ म्ह तो सै; पर थारे पिता के परमेसवर नै मेरै तै बीत्ती रात म्ह कह्या, ‘सावधान रह, याकूब तै ना तू भला कहिये अर ना बुरा।’ 30 भला, इब तू अपणे पिता कै घर का बड़ा अभिलाषी होकै चल्या आया, पर मेरे देवत्यां नै तू क्यूँ चुरा ल्याया सै?" 31 याकूब नै लाबान तै जवाब दिया, "मै न्यू जाणकै डर ग्या था, के कदे तू अपणी बेटियाँ नै जबरदस्ती मेरै तै खोस ना लेवै। 32 जिस किसे कै धोरै तू अपणे देवत्यां नै पावै, वो जिन्दा न्ही बचैगा। मेरै धोरै तेरा जो कुछ लिकड़ै, उसनै भाई-बन्धुआं कै स्याम्ही पिच्छाणकै ले-ले।" क्यूँके याकूब न्ही जाणै था के राहेल घर के देवत्यां नै चुरा ल्याई सै।

33 न्यू सुणकै लाबान, याकूब अर लिआ अर दोनु दासियाँ के तम्बूआं म्ह गया; अर कुछ न्ही मिल्या। फेर लिआ के तम्बू म्ह तै लिकड़कै राहेल के तम्बू म्ह गया। 34 राहेल तो घर के देवत्यां नै जो ऊँट की काठी म्ह धरकै उनपै बैठ्ठी थी। लाबान नै उसके सारे तम्बू म्ह टटोळण पै भी उन ताहीं न्ही पाया। 35 राहेल नै अपणे पिता तै कह्या, "हे मेरे पिता; इसतै नाराज ना हो, के मै तेरे स्याम्ही कोनी उठी; क्यूँके मै मासिक धर्म तै सूं।" आखर म्ह उसकै टोह्या-टाई करण पै भी घर के देवत्यां की मूर्त उसनै न्ही मिली।

36 तो याकूब छो म्ह होकै लाबान तै झगड़ण लाग्या, अर कह्या, "मेरा के कसूर सै? मेरा के पाप सै, के तन्‍नै इतणा छो म्ह होकै मेरा पिच्छा करया सै? 37 तन्‍नै जो मेरा सारा समान टटोळकै देख्या, फेर भी तन्‍नै अपणे घर के सारे समान म्ह तै के मिल्या? कुछ मिल्या हो तो उस ताहीं उरै अपणे अर मेरे भाईयाँ कै स्याम्ही धरदे, अर वो हम दोनुआं कै बिचाळै न्याय करै। 38 इन बीस साल्‍लां तै मै तेरे धोरै रह्या; इन म्ह ना तो तेरी भेड़-बकरियाँ कै गर्भ गिरे, अर ना तेरे मिंढयाँ का माँस मन्‍नै कदे खाया। 39 जिस भी जंगळी जानवरां नै पाड़ गेरया उस ताहीं के मै तेरे धोरै न्ही ल्याया करदा, उसका नुकसान मै ए ठाया करदा; चाहे दिन म्ह चोरी होन्दा चाहे रात म्ह, तू मेरै तै उस ताहीं ले लिया करदा। 40 मेरी तो या हालत थी के दिन म्ह तो घाम अर रात म्ह पाळा मन्‍नै खाग्या; अर नींद मेरी आँखां तै भाज जाया करदी। 41 बीस साल ताहीं मै तेरे घर म्ह रह्या; चौदहा साल तो मन्‍नै तेरी दोन्‍नु बेटियाँ खात्तर, अर छः साल तेरी भेड़-बकरियाँ खात्तर तेरी सेवा करी; अर तन्‍नै मेरी मजदूरी ताहीं दस बार बदल्या। 42 मेरे पिता का परमेसवर यानी के अब्राहम का परमेसवर, जिसका भय इसहाक भी मान्या करदा, जै मेरी ओड़ ना होन्दा, तो पक्‍का तू इब मन्‍नै खाल्‍ली हाथ भेजदा। मेरै दुख अर मेरै हाथ्थां की मेहनत नै देखकै परमेसवर नै बीत्ती होई रात म्ह तेरे ताहीं डाँट्या।"

43 लाबान नै याकूब तै कह्या, "ये बेटियाँ तो मेरी ए सैं, अर ये बेट्टे भी मेरै ए सैं, अर ये भेड़-बकरी भी मेरै ए सैं, अर जो कुछ तन्‍नै दिक्खै सै वो सारा मेरा ए सै, पर इब मै अपणी इन बेटियाँ अर इनके बाळकां तै के कर सकूँ सूं? 44 इब आ, मै अर तू दोन्‍नु आप्पस म्ह करार करा, अर वो मेरै अर तेरै बिचाळै गवाही बणी रहवै।" 45 फेर याकूब नै एक पत्थर लेकै उसका खम्बा खड्या करया। 46 फेर याकूब नै अपणे भाई-बन्धुआं तै कह्या, "पत्थर कठ्ठा करो," न्यू सुणकै उननै पत्थर कठ्ठे करकै एक ढेर लगाया, अर उड़ै ढेर के धोरै उननै खाणा खाया। 47 उस ढेर का नाम लाबान नै तो जैगर सहादुथा, पर याकूब नै गिलियाद* धरया। 48 लाबान नै कह्या, "यो ढेर आज तै मेरै अर तेरै बिचाळै गवाही रहवैगा।" इस कारण उसका नाम गिलियाद धरया गया, 49 अर उस खम्भे का नाम मिस्पा* धरया; क्यूँके उसनै कह्या, "जिब हम एक दुसरे तै दूर रहवां, तो यहोवा मेरी अर तेरी देख-भाळ करदा रहवै। 50 जै तू मेरी बेटियाँ नै दुख दे, या उनकै सिवा और बिरबान्‍नी ब्याह ले, तो म्हारै गेल्या कोए माणस तो न्ही रहवैगा; पर देख मेरै अर तेरै बिचाळै परमेसवर गवाह रहवैगा।" 51 फेर लाबान नै याकूब तै कह्या, "इस ढेर नै देख अर इस खम्भे नै भी देख, जिन ताहीं मन्‍नै अपणे अर तेरे बिचाळै खड्या करया सै। 52 यो ढेर अर यो खम्बा दोन्‍नु इस बात कै गवाह रहवै के नुकसान करण की इच्छा तै ना तो मै इस ढेर ताहीं लाँघकै तेरे धोरै जाऊँगा, ना तू इस ढेर अर इस खम्भे ताहीं लाँघकै मेरै धोरै आवैगा। 53 अब्राहम अर मेरे दाद्दे नाहोर अर उनके पिता; तीन्‍नु का जो परमेसवर सै, वोए हम दोनुआं कै बिचाळै न्याय करै।" फेर याकूब नै उसकी कसम खाई जिसका डर उसका पिता इसहाक मान्या करदा। 54 अर याकूब नै उस पहाड़ पै बलि चढ़ाई अर अपणे भाई-बन्धुआं ताहीं खाणा खाण कै खात्तर बुलाया, फेर उननै खाणा खाकै पहाड़ पै रात बिताई। 55 सबेरै-सबेरै लाबान उठ्या, अर अपणे बेट्टे-बेटियाँ ताहीं चूमकै अर आशीर्वाद देकै चल दिया, अर अपणे जगहां म्ह बोहड़ ग्या।