1 एक्सां शमूएले शाऊले सेइं ज़ोवं, "यहोवा अपने इस्राएली लोकन पुड़ हुकूमत केरनेरे लेई तेरू अभिषेक केरनेरे लेई अवं भेज़ोरोईं; एल्हेरेलेइ हुनी यहोवारी गल्‍लां शुन। 2 सेनां केरो यहोवा इन ज़ोते, ‘मीं याद एइते* कि अमालेकी लोकेईं इस्राएली लोकन सेइं कुन कियोरूए; ज़ैखन इस्राएली लोक मिस्र मुल्खे मरां एवरे थिये, तैखन तैनेईं बत्ती मां तैन केरो मुकाबलो कियो।✝ 3 एल्हेरेलेइ हुनी तू गेइतां अमालेकी लोकन मार, ते ज़ैन किछ तैन केरू आहे तैस बगैर दया केरतां नाश केर; मड़द, कौन्श, बच्‍चे, दुद्ध पीते बच्‍चे, गोरू, गब्बां, ऊँट, गधे सेभन मार।’"

4 तैखन शाऊले लोक कुजेइतां अकोट्ठे किये, ते तैना तलाईम नगरे मां गणे, ते तैना 200000 इस्राएली सिपाही, ते 10000 यहूदी सिपाही थिये। 5 तैखन शाऊले अमालेक नगरेरे* नेड़े गेइतां वैदी मां हमलो केरनेबाले सिपाही बिशाले। 6 ते शाऊले तैन इलाकन मां रानेबाले केनी लोकन सेइं ज़ोवं, "तैट्ठां नश्शा, अमालेकी लोकां केरे मझ़ाटेरां निस्सी गाथ कि एरू न भोए कि अवं तैन सेइं साथी तुश्शो भी अन्त केरि छ़ेड्डी; किजोकि तैन सेइं सारे इस्राएली केरे मिस्र मुल्खे मरां एंइते बार दया हिरेवरी थी।" ते केनी लोकां केरे ते अमालेकी लोकां केरे मझ़ाटेरां निस्सी जे। 7 तैखन शाऊले हवीला नगरे करां लेइतां शूर नगरे तगर ज़ैन मिस्र मुल्खेरे पूरबेरे पासे अमालेकी लोक मारे। 8 ते तैन केरो राज़ो अगाग ज़ींतो ट्लाव, ते तैसेरे सारे लोक तलवारी सेइं नाश किये। 9 पन अगागे पुड़, ते रोड़ी करां रोड़ी भैड्डां-छ़ेल्‍ली, बेछ़ी-दांत, निगर जानबरन, ते गबड़ां, ते ज़ैन किछ रोड़ू थियूं, तैन पुड़ शाऊले ते तैसेरे लोकेईं नरमी की, ते तैन नाश केरनू न चाव; पन ज़ैन किछ घटिया ते निकम्मू थियूं तैसेरो तैनेईं नाश कियो।

10 तैखन यहोवा शमूएले सेइं ज़ोवं, 11 "अवं शाऊले राज़ो बनाने करां पसताने लगोरोईं; किजोकि तैनी मीं पत्ती च़लनू छ़ेडी दित्तेरूए, ते मेरे हुक्म नईं मन्नोरे।" तैखन शमूएलेरो क्रोध भड़को; ते तै पूरी राती यहोवा कां प्राथना केरने लगो। 12 ज़ैखन शमूएल शाऊले सेइं मिलनेरे लेई झ़ेझ़ां उठो; तैखन शमूएले इन ज़ोवं, "शाऊल कर्मेल नगरे जो एवरो थियो, ते अपने लेई अक यादगार बनाई, ते हेंठतां गिलगाल नगरे जो च़ेलि जेव।" 13 तैखन शमूएल शाऊले कां जेव, ते शाऊले तैस सेइं ज़ोवं, "तीं यहोवारे तरफां बरकत मैल्हे; मीं यहोवारो हुक्म पूरो कियो।" 14 शमूएले ज़ोवं, "फिरी भैड्डां-छ़ेल्‍ली केरि इना लेरां, ते बेछ़ी-दांत केरि आवाज़ ज़ै अवं शुन्ने लगोरोइं, एन किजो भोने लगोरूए?" 15 शाऊले ज़ोवं, "तैना त अमालेकी लोकन करां इड़ी एवरेन; मतलब प्रजारे लोकेईं रोड़े करां रोड़ी भैड्डां-छ़ेल्‍ली ते बेछ़ी-दांत तेरे परमेशर यहोवा जो बलि केरनेरे लेई आनोरेन; ते बाकी सब असेईं पूरे तरीके सेइं नाश कियोरूए।" 16 तैखन शमूएले शाऊले सेइं ज़ोवं, "रुकी गा! ते ज़ै गल यहोवाए अज़ राती मीं सेइं ज़ोवरीए तै अवं तीं सेइं ज़ोताईं।" तैनी ज़ोवं, "ज़ो।"

17 शमूएले ज़ोवं, "ज़ैखन तू एपनी नज़री मां निकड़ो थियो, तैखन कुन तू इस्राएलेरे गोट्लन मां प्रधान न थियो? ते कुन यहोवाए इस्राएली लोकन पुड़ हुकूमत केरनेरे लेई तेरू अभिषेक नईं कियोरू? 18 ते यहोवाए तू अक खास कम केरनेरे लेई भेज़ो, ते ज़ोवं, ‘गेइतां तैन पापी अमालेकी लोकन नाश केर, ते ज़ैखन तगर तैना मिटी न गान, तैखन तगर तैन सेइं लड़तो रेइयां।’ 19 फिरी तीं केसेरे लेई यहोवारी ऐह गल टेलतां लूटी पुड़ ट्लुटतां तैन कम कियूं ज़ैन यहोवारी नज़र मां बुरूए?"

20 शाऊले शमूएले सेइं ज़ोवं, "पक्‍के मीं यहोवारी गल मेनतां ज़ेरां यहोवाए अवं भेज़ो तेरहां अवं च़लो, ते अमालेकी लोकां केरो राज़ो अगाग आनोरोए, ते अमालेकी लोक नाश किये। 21 पन सिपाही लूटी मरां भैड्डां-छ़ेल्‍ली, ते बेछ़ी-दांत, मतलब खतम भोनेरी रोड़ी-रोड़ी चीज़ां गिलगाले मां तेरे परमेशर यहोवा कां बलि च़ाढ़नेरे लेई ऐनोरीन।" 22 शमूएले ज़ोवं,

"कुन यहोवा होमबलि, ते मेलबलि सेइं एत्रो खुश भोते,

ज़ेत्रो कि अपनि गल मन्ने सेइं खुश भोते?

शुन, मन्नू त बलि च़ाढ़ने करां ते ध्याने सेइं शुन्नू दांतां ते हुड़ां केरे मैंझ़न करां रोड़ूए।

23 हेर, बगावत केरनी ते जैदूगिरे करां पुछ़नू अक बराबर पापे,

ते ज़िद केरनी मूरतन ते कुल देबतेरी पूज़ा केरनी बराबरे।

तीं ज़ै यहोवारी गल निकम्मी समझ़ोरीए,

एल्हेरेलेइ तैनी तू राज़ो भोनेरे लेई निकम्मो समझ़ोरोस।"

24 शाऊले शमूएले सेइं ज़ोवं, "मीं पाप कियोरोए; मीं त अपने लोकां केरो डर मेनतां तैन केरि गल्‍लां शुन्तां यहोवारो हुक्म ते तेरी गल्‍लां केरि बगावत कियोरीए। 25 पन हुनी मेरे पाप माफ़ केर, ते मीं साथी वापस एई, कि अवं यहोवारी आराधना केरि।" 26 शमूएले शाऊले सेइं ज़ोवं, "अवं तीं साथी वापस न एज्जी; किजोकि तीं यहोवारी गल निकम्मी समझ़ोरीए, ते यहोवा तू इस्राएली केरो राज़ो भोनेरे लेई निकम्मो समझ़ोरोस।" 27 तैखन शमूएल गानेरे लेई फिरो, ते शाऊले तैसेरे चोगेरो अक कूनो ट्लाव, ते तै छ़िंदोइ जेव। 28 तैखन शमूएले तैस सेइं ज़ोवं, "अज़ यहोवा इस्राएली केरू राज़ छ़िन्दतां थुसोड़ोरूए, ते एक्‍की मैन्हु दित्तोरू ज़ै तीं करां रोड़ोए। 29 ते ज़ै इस्राएलेरी ताकतरो ज़िरियोए तै न त झूठ ज़ोए ते न पसताए; किजोकि तै मैन्हु नईं, कि पसताए।" 30 तैनी ज़ोवं, "मीं पाप त कियोरोए; फिरी भी मेरे लोक ते बुज़ुर्ग ते इस्राएली केरे सामने मेरी आदर केर, ते मीं साथी वापस एई, कि अवं तेरे परमेशर यहोवारी आराधना केरि।" 31 तैखन शमूएल मुड़तां शाऊले पत्ती जेव; ते शाऊले यहोवारी आराधना की।

32 तैखन शमूएले ज़ोवं, "अमालेकी केरे राज़े अगागे मीं कां इरां आनां।" तैखन अगाग आनन्दे सेइं इन ज़ोइतां तैस कां जेव, "सच़्च़े मौतरो दुख बीती जेव।" 33 शमूएले ज़ोवं, "ज़ेन्च़रे कौन्शां तेरी तलवार सेइं बेऔलाद भोवरिन, तेरही तेरी अम्मा कौन्शन मां बेऔलाद भोल्ही।" तैखन शमूएले अगाग राज़ेरे गिलगाल नगरे मां यहोवारे सामने टुक्ड़े-टुक्ड़े किये।

34 फिरी शमूएल रामाह जो च़ेलि जेव; ते शाऊल अपने नगर गिबा जो अपने घरे जेव। 35 ते शमूएले अपने ज़िन्दगी भर शाऊले सेइं फिरी मुलाकात न की, किजोकि शमूएल शाऊलेरे लेई मातम केरतो राव। ते यहोवा शाऊले इस्राएली केरो राज़ो बनेइतां पसतातो थियो।