1 ज़ैखन मूसेरे शेरहे मिद्यान प्रदेशेरे याजके यित्रोए एन शुनू कि परमेशरे मूसे अपने इस्राएली लोकां केरे लेई कुन-कुन कियोरूए, ते केन्च़रे सेइं यहोवाए इस्राएली लोक मिस्र मुल्खे मरां केढतां आनोरेन। 2 तैखन मूसेरे शेरहे यित्रोए मूसेरी लाड़ी सिप्पोरा, ज़ै पेइले अपने बाजेरे घरे जो भेज़ोरी थी, 3 तै ते तैसारां दूईये मट्ठां भी आनां; एन मरां एकेरू नवं मूसे इन ज़ोइतां गेर्शोम *रखेरू थियूं, "अवं होरि मुल्खे मां परदेशी आईं।" 4 ते होरेरू नवं तैनी इन ज़ोइतां एलीएजेर *रख्खू, "मेरे बुज़ुर्गां केरो परमेशर मेरो मद्दतगार भोइतां तैने अवं फ़िरौनेरी तलवारी करां छुटेवरोइं।" 5 मूसेरी लाड़ी ते मट्ठां तैसेरे शेरहो यित्रोए साथी एन्हतां मूसे कां बियाबान ठैरी पुड़ अव, ज़ैड़ी परमेशरेरे पहाड़े कां तैनी अपनो डेरो लेवरो थियो। 6 ते एइतां तैने मूसे जो ई समाद भेज़ो, "अवं तेरो शेरहो यित्रो आईं, ते मीं तेरां दूईये मट्ठां ते तेरी लाड़ी तीं कांजो आनोरीए।" 7 मूसे ऐह खबर शुन्तां अपने शेरहे सेइं मिलनेरे लेई निस्सो, ते तैस कां झुको ते तैस फुम्मड़ी दित्ती; ते तैना एक्‍की होरेरो हाल चाल पुछ़तां डेरे पुड़ आए। 8 तैखन मूसे अपने शेरहे सेइं ज़ोवं, कि यहोवा इस्राएली केरे लेई फ़िरौन ते मिस्रन सेइं कुन-कुन कियूं, ते इस्राएली लोकेईं बत्तां कुन-कुन दुख झ़ैल्‍ले, फिरी यहोवा तैन्न केन्च़रे-केन्च़रे छुटातो अव। 9 तैखन यित्रो तैस सारे भलैइयरे वजाई सेइं ज़ै यहोवा इस्राएली लोकन सेइं कियोरी थी, कि तैना मिस्री लोकां केरे कब्ज़े मरां छुटेवरे थिये, खुश भोइतां ज़ोवं, 10 "धने यहोवा, ज़ैने तुसां फ़िरौन ते मिस्री लोकां केरे कब्ज़े मरां छुटेवरेथ, ते ज़ैने तुस लोक मिस्री केरे गुलैमी मरां छुटेवरेथ। 11 हुनी मीं पतो लग्गो कि यहोवा सब देबतन करां महाने किजोकि यहोवा मिस्री लोकन सेइं तेन्च़रे बर्ताव कियो ज़ेन्च़रे तैनेईं इस्राएली लोकन सेइं घमण्डे सेइं कियोरो थियो।" 12 तैखन मूसेरे शेरहे यित्रोए परमेशरेरे लेई होमबलि ते मेलबलि च़ाढ़ी, तैखन हारून इस्राएली केरे सब बुज़ुर्गन समेत मूसेरे शेरहे यित्रोए सेइं साथी परमेशर कां एइतां रोट्टी खाने अव।

13 दूइयोवं दिहाड़े मूसा लोकां केरो न्याय केरने बिश्शो, ते झ़ेझ़ां करां ड्लवझ़ी तगर लोक मूसेरे आसे पासे खड़े राए। 14 इन हेरतां कि मूसो लोकां केरे लेई कुन-कुन केरते, तैसेरे शेरहे ज़ोवं, "इन कुन कम्मे ज़ैन तू लोकां केरे लेई केरतस? कुन वजाहे कि तू अकैल्‍लो न्याय केरनेरे लेई बिशोरो रहतस, ते लोक झ़ेझ़ेरे देंते ड्लवझ़ी तगर तेरे आसे-पासे खड़े रहतन?" 15 मूसे अपने शेरहे जुवाब दित्तो, "एसेरी वजा ई आहे कि लोक मीं कां परमेशरे करां पुछ़नेरे लेई एइतन। 16 ज़ैखन भी तैन मां मुकदमो भोते, तैखन तैना मीं कां एइतन ते अवं तैन केरो न्याय केरताईं, ते परमेशरेरी विधि ते कानून तैन्न समझ़ताईं।" 17 मूसेरे शेरहे तैस सेइं ज़ोवं, "ज़ैन कम तू केरतस तैन ठीक नईं। 18 किजोकि इस सेइं तू ते तीं सेइं साथी इना लोक भी थकेले, ते इन कम तेरे लेई बड़ू भारीए; तू एन अकैल्‍लो न केरि सखस। 19 एल्हेरेलेइ अवं तीं सलाह देताईं, तू मेरी गल शुन, ते परमेशर तीं सेइं साथी राए। तू त इन लोकां केरे लेई परमेशरेरे सामने गातो रा, ते एन केरे मुकदमे परमेशरे कां तू पुज़ातो रा। 20 तैन परमेशरेरी विधि ते कानून शिखैलतां, ज़ैस बत्ती पुड़ ऐनेईं च़लनूए, ते एनेईं कुन केरनूए एन समझ़ातो रा। 21 फिरी तू एन सब लोकन मरां एरे मड़द च़ुन, ज़ैना काबल ते परमेशरेरो डर मन्नेबाले, सच़्च़े, ते अन्यायेरे फैइदे सेइं नफरत केरनेबाले भोन; एरे ज़ेरे लोकन हज़ार-हज़ार, शौव-शौव, पज़ा-पज़ा ते दश-दश मैन्हन पुड़ प्रधान रख। 22 ते तैना हर वक्त एन लोकां केरो न्याय केरन, ते सब बड़े-बड़े मुकदमे तीं कां आन्न, पन निक्‍के-निक्‍के मुकदमां केरो न्याय तैना एप्पु केरेले, तैखन तेरो भार पोल्‍लो भोल्हो, किजोकि ई बोझ तैना भी तीं सेइं साथी छ़ूले। 23 अगर तू एन्च़रे केरस, ते परमेशर तींजो एरहो हुक्म दे, त तू टिकोरो रानोस, ते इना सब लोक अपनि जगाई पुड़ सुखे सेइं पुज़नेन।"

24 अपने शेरहेरी ई गल मेनतां मूसे तैसेरे ज़ोनेरे मुताबिक कियूं। 25 एन्च़रे सेइं तैनी सब इस्राएली लोकन मरां काबल मड़द च़ुनतां तैना हज़ार-हज़ार शौव-शौव पज़ा-पज़ा दश-दश लोकन पुड़ प्रधान बनाए। 26 ते तैना सब लोकां केरो न्याय केरने लगे; ज़ै मुकदमो मुश्किल भोतो थियो, तैस तैना मूसे कां आनते थिये, ते सब निक्‍के मुकदमां केरो न्याय तैना एप्पु केरते थिये। 27 तैखन मूसे अपनो शेरहो भेज़ो, ते तै अपने मुल्खे जो वापस च़लो जेव।