1 फिरी यहोवाए मूसे सेइं ज़ोवं, 2 "इस्राएली लोकन सेइं ज़ो कि अवं तुश्शो परमेशर यहोवा आईं। 3 तुस मिस्र मुल्खेरे रीति-रूवाज़ां केरे मुताबिक, ज़ैस मां तुस रहते थिये, न च़ेलथ; ते कनान मुल्खेरे रीति-रूवाज़ां केरे मुताबिक भी न च़ेलथ, ज़ैड़ी अवं तुसन नेने लगोरोईं। ते न तैन मुल्खां केरे विधन पुड़ च़ेलथ। 4 मेरे नियमन मेन्नथ, ते मेरी विधन मेनतां तैन पुड़ च़ेलथ। अवं तुश्शो परमेशर यहोवा आईं। 5 एल्हेरेलेइ तुस मेरे नियमन ते मेरी विधन लगातार मन्ते रेइयथ। ज़ै मैन्हु तैन मन्नेलो तै तैन केरे वजाई सेइं ज़ींतो रालो। अवं यहोवा आईं।

6 "तुसन मरां कोई अपने कोन्ची नेड़ेरी रिश्तेदार कौन्शी सेइं जिसमानी रिश्तो न बनाए। अवं यहोवा आईं। 7 अपनि अम्मा सेइं जिसमानी रिश्तो बनेइतां अपने बाजी बेइज़्ज़त न केरथ, तै त तुश्शी अम्मा आहे, एल्हेरेलेइ तुस तैस सेइं जिसमानी रिश्तो न बनेइयथ। 8 अपनि बेबानी अम्मा सेइं भी जिसमानी रिश्तो न बनेइयथ; किजोकि तैस सेइं तुश्शी बाजी केरि बेइज़्ज़ती भोल्ही। 9 अपनि बेइनी सेइं जिसमानी रिश्तो न बनेइयथ चाहे बेबानी, चाहे तै घरे मां पैदा भोवरी भोए चाहे बेइर। 10 अपनि पोट्लड़ी या अपने धिहोड़ी सेइं जिसमानी रिश्तो न बनेइयथ, तैन केरो जिसम त मन्ना तुश्शो आहे। 11 तुश्शी बेबानी बेइन ज़ै तुश्शे बाजी सेइं पैदा भोइ, तै तुश्शी बेइन आहे, एल्हेरेलेइ तुस तैस सेइं जिसमानी रिश्तो न बनेइयथ। 12 अपने बूजी सेइं जिसमानी रिश्तो न बनेइयथ; तै त तुश्शे बाजी केरि नेड़ेरी रिश्तेदारे। 13 अपनि मैसी सेइं जिसमानी रिश्तो न बनेइयथ; किजोकि तै तुश्शी अम्मरी नेड़ेरी रिश्तेदारे। 14 अपने चाचेरी कौन्शी सेइं जिसमानी रिश्तो न बनेइयथ, तै त तुश्शी चाची आहे। 15 अपनि नुश्शी सेइं जिसमानी रिश्तो न बनेइयथ तै त तुश्शे मट्ठेरी कौन्शे, एल्हेरेलेइ तैस सेइं जिसमानी रिश्तो न बनेइयथ। 16 अपनि भैभी सेइं जिसमानी रिश्तो न बनेइयथ; तै त तुश्शे ढ्लाएरी ड्लाहोरी कौन्शे। 17 कोन्ची कौन्शी ते तैसेरी कुई दूईयन सेइं जिसमानी रिश्तो न बनेइयथ, ते तैसेरी पोट्लड़ी या तैसेरी धिहोड़ी अपनि कौन्शां केरतां तैस सेइं जिसमानी रिश्तो न बनेइयथ; तैना त नेड़ेरी रिश्तेदार आन; एरू कम केरनू महापापे। 18 ते अपनि कौन्शरी बेइन भी अपनि कौन्श बनेइतां तैसेरी सौक न बनेइयथ कि पेइली कौन्श त ज़ींतीए एल्हेरेलेइ तैस सेइं जिसमानी रिश्तो न बनेइयथ।

19 "फिरी ज़ांतगर कोई कौन्श अपने माहवारी एजनेरे वजाई सेइं अशुद्ध राए तांतगर तैस कां तैस सेइं जिसमानी रिश्तो बनानेरे लेई न गेइयथ। 20 फिरी अपने रिश्तेदारां केरे कौन्शन सेइं कुकर्म केरतां अशुद्ध न भोइयथ। 21 अपने बच्‍चन मरां कोन्ची मोलेक* देबतेरे लेई होमबलि केरतां न च़ैढ़थ, ते न अपने परमेशरेरू नवं अपवित्र भोने देइयथ; अवं यहोवा आईं। 22 कौन्शां केरो ज़ेरो मड़दन सेइं जिसमानी रिश्तो न रेखथ; तैन त भिट्टू कम्मे। 23 कोन्ची किसमेरे जानबरन सेइं जिसमानी रिश्तो बनेइतां अशुद्ध न भोइयथ, ते न कोई कौन्श जानबरेरे सामने एल्हेरेलेइ खड़ी भोए कि तैस सेइं कुकर्म केरे; ई त उलटी गल्‍ले।

24 "एरू-एरू कोई भी कम केरतां अशुद्ध न भोइयथ, किजोकि ज़ैन कौमन मरां अवं तुश्शे सामनेरां कढने पुड़ आईं तैना एरां-एरां कम्मां केरतां अशुद्ध भोइ जेवरिन; 25 ते तैन केरो मुल्ख भी अशुद्ध भोइ जेवरोए, इस वजाई अवं तैस पुड़ तैसेरे अधर्मेरी सज़ाह देताईं, ते तै मुल्ख अपने रानेबालन उतारते। 26 इस वजाई सेइं तुस लोक मेरी विधन ते नियमन लगातार मन्ते रेइयथ, ते चाहे देशी, चाहे तुसन सेइं साथी रानेबालो परदेशी भोए, तुसन मरां कोई भी एरू भिट्टू कम न केरे; 27 किजोकि एरे सब भिट्टे कम्मन तैस मुल्खेरे मैन्हु ज़ैना तुसन करां पेइले तैस मां रहते थिये, तैना केरते थिये, इस्से सेइं तै मुल्ख अशुद्ध भोइ जेवरोए। 28 हुनी एरू न भोए कि ज़ैस रीति सेइं ज़ै कौम तुसन करां पेइली तैस मुल्खे मां रहती थी, तै तैनी उतारोरिए, तैस्से तरीके ज़ैखन तुस तैस अशुद्ध केरथ, त तै तुसन भी उतारेलो। 29 ज़ेत्रे एरू कोई भिट्टू कम केरेले तैना सब मैन्हु अपने लोकन मरां अलग किये गाले। 30 ई हुक्म ज़ै मीं तुश्शे मन्नेरे लेई दित्तोरोए, तैस तुस मन्ते रेइयथ, ते ज़ैना भिट्टे रीति-रुवाज़ तुसन करां पेइले च़लते एवरिन, तैन मरां कोन्ची पुड़ न च़ेलथ, ते न तैन केरे वजाई सेइं अशुद्ध भोइयथ। अवं तुश्शो परमेशर यहोवा आईं।"