1 दाऊदेरे मट्ठे सुलैमान इस्राएलेरे राज़ेरी कहावतां:

2 इन कहावतां केरो पढ़नेबालो अक्ल ते शिक्षा हासिल केरे,

ते समझ़री गल्‍लां समझ़े,

3 ते अक्लमन्द ज़िन्दगी गुज़ारने मां माहिर,

ते धर्म, न्याय ते बगैर तरफदैरारे बारे मां अनुशासन हासिल केरे;

4 ताके सिद्धे-सादन होशियारी,

ते जुवाने ज्ञान ते तमीज़ मैल्हे;

5 कि अक्लमन्द शुन्तां अपनु ज्ञान बधाए,

ते समझ़दारे अक्लरो उपदेश मैल्हे,

6 ज़ैस सेइं तैना कहावतन ते मसालन,

ते अक्लमन्दा केरि गल्‍लां ते तैन केरे भेदन समझ़न।

7 यहोवारो डर मन्नो अक्लरी शुरुआते;

अक्ल ते शिक्षाई बेवकूफ लोक घटिया समझ़तन।

8 हे मेरे मट्ठा, अपने बाजी केरि शिक्षा शुन,

ते अपने अम्मरी शिक्षाई न शार;

9 किजोकि तैन मन्ना तेरे क्रोड़रे लेई शोभारू ताज,

ते तेरे गलेरे लेई माला भोल्ही।

10 हे मेरे मट्ठा, अगर पापी लोक तीं शिखालन,

त तैन केरि गल न मेन्नां।

11 अगर तैना ज़ोन, "असन सेइं साथी च़ल,

कि अस केन्चेरो कत्ल केरनेरे लेई बिश्शम, ते अस बेकसूर लोकन पुड़ हमलो केरम;

12 अस तैन्न ज़ींते निगलम, ज़ेन्च़रे पाताल सझ़र लोकन निगलते,

ते तैन्न कब्री मां पेवरे मरोरे लोकां केरे ज़ेरे बनाम।

13 असन हर किसमेरी कीमती चीज़ां मैल्हेली,

अस अपने घरन लूटरे माले सेइं* भरमेले;

14 तू इश्शो हिस्सेदार भोइ गा,

इश्शो सेब्भी केरो अक्‍के बेटवो भोए,"

15 पन हे मेरे मट्ठा तू तैन सेइं साथी तैन केरे बत्तां न च़ेलां,

बल्के तैन केरि बत्ती मां पव भी नईं रखनो;

16 किजोकि तैना बुराई केरने जो दौड़तन,

ते कत्ल केरनेरे लेई जल्दी केरन।

17 किजोकि ज़ैखन च़ुड़ोलोवं तकतू भोए तैखन जाल बिछ़नेरो कोई फैइदो नईं;

18 ते इना लोक त अपनो खून केरनेरे लेई बिशतन,

ते अपने प्राणन मारनेरे लेई ताकी मां रहतन।

19 सब लालच़ी लोकां केरि चाल एरी भोतीए;

तैन केरो प्राण लालच़ेरे वजाई सेइं नाश भोइ गाते।

20 अक्ल सड़की मां उच्‍ची आवाज़ी सेइं ज़ोतीए;

ते चौकन मां प्रचार केरतीए;

21 तै उच्‍ची ठारी पुड़ बज़ारां केरि भीड़ी मां हक देतीए;

तै नगरेरे फाटकन* मां खड़ी भोइतां, इन ज़ोतीए:

22 "हे अज्ञानी लोकव, तुस किताली तगर अज्ञानता सेइं प्यार रखेले?

ते हे मज़ाक बनाने बालव, तुस किताली तगर मज़ाक बनाने सेइं खुश राले?

हे बेवकूफव, तुस किताली तगर ज्ञाने सेइं बैर रखेले?

23 तुस मेरी डांट शुन्तां मन फिराथ;

शुना, अवं अपनि आत्मा तुश्शे लेई उलटाली;

अवं तुसन अपनु ज्ञान देइली।

24 मीं त हक दित्ती पन तुसेईं इन्कार कियो,

ते मीं तुसन कुजानेरे लेई हथ* अग्रोवं किये, पन केन्चे ध्यान न दित्तू,

25 बल्के तुसेईं मेरी सारी सलाह न शुनी,

ते मेरी झ़िड़करी कीमत न ज़ानी;

26 एल्हेरेलेइ अवं भी ज़ैखन तुसन पुड़ आफत एज्जेली तैखन हस्सेली;

ते ज़ैखन तुसन पुड़ डर एज्जे, तैखन अवं मज़ाक बनाली।

27 ज़ैखन तूफानेरो ज़ेरो तुसन पुड़ खतरो एज्जेलो,

ते मुसीबत तूफानेरी ज़ेरि एज्जेली,

ते तुस मुसीबत ते मुश्किली मां फसेले, तैखन अवं मज़ाक बनाली।

28 तैस वक्ते तैना मींजो हक देले, ते अवं न शुनेली;

तैना मीं दिले सेइं त तोपेले, पन हासिल न केरि सकेले।

29 किजोकि तैनेईं ज्ञाने सेइं बैर कियो,

ते यहोवारो डर मन्नो तैन्न रोड़ो न लग्गो।

30 तैनेईं मेरी सलाह न मन्नी

बल्के मेरी सब झ़िड़कां घटिया सेमझ़ी।

31 एल्हेरेलेइ तैना अपनि केरनरो फल एप्पु भुगतेले,

ते एपनी योजनारे फले सेइं भेरोले।

32 किजोकि अज्ञानी लोकां केरू टेपलोनू, तैन केरे मारे गानेरी वजा भोल्ही,

ते बे फिक्र रानेरी वजाई सेइं बेवकूफ लोक नाश भोल्हे;

33 पन ज़ै मेरी शुनेलो, तै निडर बस्सोरो रालो,

ते मुसीबती करां बे फिक्र भोइतां सुखे सेइं रालो।"