1 Tin, nɛ tsɛɛtsɛ, bɔn-nyɛɛg bam, é ghɛŋ mɛ nadi pɛ daa len ɛ, mɛ nabɛ ɛ́ ààlii nɛ nen dáa mɛ di elii nɛ bot ɛ di nɛ Sisim Zɛɛb ɔ. Ye nabɛ ɛ́, mɛ eelii nɛ nen dáa bot ɛ bɔs, bot ɛ di náá, bɛ ɛ́ etɔlɔɔ tɔ ɛdum ɛ koŋ nɛ Klisto ɔ. 2 É ghɛŋ tak, mɛ nadee bin ɛ́ mɛdii mɛ mɛbel. Mɛ nabɛ ɛ́ ààdee bin nɛ edee na lyel-lyel etɛɛ náá, bi tok nɛ ghwyil ɛnyaab edee na lyel-lyel. Bela náá, nenak yak, bi dinaa ààpabela ghwyil tak, 3 etɛɛ náá, bi dinaa nɛ mɛfulu mɛ bot ɛ bɔs. Bi dinaa nɛ zok nɛ mɛwɔ pak’en! Esesɛɛ binek djas ààlyaal tin náá, bi ɛ́ nɛ mɛfulu mɛ bot ɛ bɔs é? Yenek djas lyaal ɛ́ náá, bi kɛ ɛ́ tɔ ɛkwosak ɛ epuud.

4 É sok mot ngɔt pak’en di eke náá: «Mam ɛ́ mot ɛ Pɔl», dhiiti náá: «Mam ɛ́ mot ɛ Apolɔs» ɛ, bi ààbee náá, bi sa tin ɛ́, dáa bot ɛ bɔs’ak é?

5 É di’enek, Apolɔs ɛ́ zɛ? Pɔl ɛ́ zɛ? Bisɔ djas ɛ́ bot ɛ mɛsa ɛ Zɛɛb, bi dhaŋ ɛ é ze yes etɛɛ náá, bi needum koŋ nɛ Zɛɛb. Tin, mot nɛ mot sa ɛ́ mɛsa mɛ Ghɛŋ nadjɛ nyɛ ɛ. 6 Mam nabɛ ɛ́ bhek tɔ bɔs, Apolɔs kaso ɛ́ mɛdii. É di’enek, Zɛɛb ɛ́ di esa náá bhek wyee. 7 Deenek, mot di ebɛ bhek ɔ, nɛ mot di eso mɛdii kɔ bhek ɔ, bɛ ààval dhiiti sonok. Yɛ ɛ́ Zɛɛb mot di esa náá, bhek wyee ɔ, di eval. 8 É di’enek, mot di ebɛ bhek ɔ, nɛ mot di eso mɛdii kɔ bhek ɔ, bɛ ɛ́ djala. Tin, Zɛɛb aadjɛ mot nɛ mot efute ɛ́ dum nɛ mɛsa mɛ. 9 Deenek, bis ɛ́ bot ɛ mɛsa ɛ Zɛɛb, tin, biyɔ kadi ɛ́, pyeeb ɛ Zɛɛb.

Biyɔ pe ɛ́ baadi ndjaa-Zɛɛb. 10 É di’enek, dáa ɛkɛɛ ɛ Zɛɛb nadjɛaa mɛ ɛ, mɛ eesum ghus-zumal ndjaa dáa tɛtɛ sumel mendjaa. Nenak yak, dhiiti mot eesum epap kɔ ghus-zumal tak. Tin, mot nɛ mot ɛkobaka nɛ tyee nyɛ di esum ɛ. 11 Etɛɛ náá, ghus-zumal naazesumel: Yɛ ɛ́ Yezu Klisto. É di’enek, dhiiti mot tok nɛ ghwyil ɛbaakan dhiiti ghus-zumal sis. 12 Tin, kɔ ghus-zumal tak, bɛdhiiti bot ɛ́ nɛ ghwyil ɛ sum yɔbɔ nɛ ɛkok ɛ lɔɔd, nɛ gwooz di esaaa nɛ yɛ epata ɛ, nɛ mɛkok mɛ mɛtaŋ. Yɛ kabɛ bɛdhiiti bot ɔɔ, bɛ ɛ́ nɛ ghwyil ɛsum nɛ ele, nɛ esɔsela eka nɛghu nɛ mɛbo. 13 Tin, dwoo epɛ́ɛ, mɛsa mɛ mot nɛ mot aanyen popoopwon. Etɛɛ náá, dwoo lɛɛg aadi ɛ́ nɛ boo du, tin, du tak ɛ́ waalyaal kwaambi mɛsa mɛ mot nɛ mot nasa ɛ. 14 Ndjaa mot ɛ dikaa, da yɛ ɛ́ pyet nɛ mɛgoo mɛ du ɔɔ, tin, mot tak aabela efute e mɛsa mɛ. 15 Tin, ndjaa mot ɛ kadikaa, da yɛ ɛ́ bik nɛ mɛgoo mɛ du ɔɔ, mot yenɔk aanàbela efute e mɛsa mɛ. É di’enek, tsik’ɛ aadi ɛ́ dáa mot pɛkaa tɔ ngel du ɛ.

16 Deenek, bi nɛ gu ɛnyɔɛpe náá, bi ɛ́ ndjaa-Zɛɛb, tin, Sisim Zɛɛb ɛ́ tɔ len. 17 É di’enek, mot ɛ pul ndjaa-Zɛɛb ɔɔ, Zɛɛb aatwak nyɛ. Etɛɛ náá, ndjaa-Zɛɛb ɛ́ dɛɛ, tin yɛ ɛ́ biyɔ ɛ di ndjaa-Zɛɛb tak.

18 Tin, sa mot ààkɔɔ nyel’ɛ: Mot ngɔt tɔ len ɛ di nɛ egeka náá, nyɛ ɛ́ tsoŋ mot é mis mɛ bot ɛ bɔs’ak ɔɔ, ye goka ɛ́ nyɛ di mot mɛlyet é mis mɔɔ, étɛp nyɛ neebela tɛtɛ etsoŋ. 19 Etɛɛ náá, etsoŋ e bot ɛ bɔs ɛ́ dhatyee mɛlyet é mis ɛ Zɛɛb. Tin, Ekwyala lɛɛ ɛ́ náá: «Zɛɛb mɛt bɛtsoŋ ɛ bot ɛ́ nɛ laab mɛkpa mɛ nuub’ɔɔ met.» 20 Deenek, Ekwyala baalɛɛ ɛ́ náá: «Ghɛŋ nɛ gu esiiza e bɛtsoŋ ɛ bot, nyɛ nɛ gu náá, yɛ ààval dhiiti sonok* v. 20: Mɛd 94.11..» 21 Tin, yɛ ààgoka náá, mot ghɛɛ nyel kɔ ɛsu ɛ bot ɛ epuud. Etɛɛ náá, djas ɛ́ yebɔ: 22 ye nakoozodi Pɔl, Apolɔs, Pyɛɛd, nɛghu bhwak djas, tsik nɛghu ɛsyee, ɛwala bot di’aak nɛghu yii di ezyɛ’enek, djas ɛ́ yebɔ. 23 Tin, bi ɛ́ bot ɛ Klisto, Klisto kadi ɛ́ mot ɛ Zɛɛb.