1 Yɛ ɛ́ etɛp tak ɛ di náá, ye goka ɛ́ mena pyetka ɛlyelɛpe tɔ mɛlyo mɛ mena nagwakeka ɛ, ekaab náá, mena ɛzɛkɛwo ze. 2 Deenek, bhaadal efofop nalɛɛ ɛ, moo mos ɛ́ nɛ mɛtaŋ, bot ɛ nasa maa-ɛlɔ ɔ, nɛ bot ɛ nadi ààlooba nɛ mɛkpa mɛ tak ɔ, naazebela feŋ bɛ di egoka nɛ yɛ ɛ. 3 Tin, menabɛlka bɛmet, mena aapɛkelka dáa tɔ yak feŋ, yɛ bɛ náá, mena ààbiska boo yak tsik na mɛtaŋ ɔɔ? Etɛɛ náá, Ghɛŋ nyɛ ɛmet nabɛ ɛ́ mot mɛkɛn ɛgoola tsik tak. Bot ɛ nagwak bhaadal tak ɔ, bɛ naabaŋa bis etsɛɛtsɛ e tak. 4 Zɛɛb nadi elyaal etsɛɛtsɛ e bhaadal tak nɛ bɛtɛ nɛ etseŋa, nɛ endem e mɛbwala, nɛ mɛvyɛkɛlɛ zɛnɔɔ mɛkɛɛ mɛ Sisim na Dɛɛ di edjɛ mot nɛ mot tɔ ɛkwosak ɛ Zɛɛb ɛ.

5 Etɛɛ náá, Zɛɛb nabɛ ɛ́ ààdjɛ ghwyil nɛ efofop náá, bɛ di bot aakɔk kɔ bhwak di ezyɛ yenek, yii mena di elii kɔ ɛsu ɛ tak’aak. 6 Deenek, ye nabɛ ɛ́ dhiiti mot nakaada náá:

«Zɛɛb, mot ɛ́ yɛ zɛ, étɛp esiiza bɔ needi kɔ lɛ?

Mɔn ɛ mot ɛ́ yɛ zɛ, étɛp wɔ neekwyɛɛg nyɛ?

7 Wɔ naasa náá, mot di si efofop ba ɛwala batsa.

Tin, wɔ naadjɛ nyɛ duma nɛ duu

8 wɔ naadjɛ nyɛ ghwyil ɛkɔk kɔ esa ee di kɔ ɛko ɛ bɔs djas ɛ✝.»

Yɛ bɛ náá, Zɛɛb naasa náá, mot di ekɔk kɔ esa ee di kɔ ɛko ɛ bɔs djas ɔɔ, ye kwyɛl ɛlɛɛ náá, ye tok nɛ sa wat Zɛɛb nasa náá, ye nàlooba nɛ nɛ. Deenek, é di mena dik’aak, mena dinaa ààpabee dáa esonok djas di elooba nɛ mot ɛ. 9 Nenak yak, Yezu mot nasilaa é ba mɔɔ ɛwala batsa si efofop ɔ, mena beeka nyɛ mos ɛ́ nɛ boo duu nɛ duma, kɔ ɛsu ɛ mezuk mɛ ɛsyee nyɛ nagwyɛ ɛ. Tin, tɔ enɛm nɛ embɛɛ Zɛɛb, nyɛ naadhaa é ze ɛsyee étɛp bot djas. 10 Etɛɛ náá, Zɛɛb ɛ́ mot nakus esonok djas di kɔ ɛko ɛ bɔs ɔ, djas ɛ́ yɛ. Nyɛ kwyɛl ɛ́ nyɛ needul bɛtɛ nɛ bɔn, bɛ neebela di tɔ duma yɛ. Étɛp tak, ye nagoka ɛ́ náá, nyɛ kwyɛɛg Yezu tɔ mezuk kɛkum pɛ mɛsik, etɛɛ náá, nyɛ needi mot di egoka nɛ ɛdjɛɛd bot pɛ ze tsik ɔ.

11 Deenek, Yezu mot di esa náá, bot di dɛɛ ɔ, nɛ bot ɛ moo bot ɛ edɛɛ ɔ, bɔɔ djas ɛ́ bɔn ɛ Sɛɛg ngɔt. Étɛp tak ɛ Yezu di ààdi nɛ sen ɛdjóo bɛ bɔn-nyɛɛg bɛ. 12 Nyɛ ke ɛ́ náá:

«Zɛɛb, mɛ ɛpekwyɛl ɛgoola din ɛ lɔ,

nɛ bɔn-nyɛɛg bam,

tɔ ɛdhuu ɛ bot ɛ zɛɛga mendjaala,

mɛ ɛpekwyɛl ɛdjeeb kɔ ɛsu ɛ lɔ✝.»

13 Yezu eebaazɛke náá:

«Mɛ waawa ɛbwaalel ɛ lam nɛ Zɛɛb.»

Nyɛ eebaazɛbil náá:

«Beea mɛ, mɛ ɛ́ bis nɛ bɔn ɛ Zɛɛb nadjɛ mɛ ɔ✝.»

14 Deenek, dáa ye di náá, bɔn tak nabyel ɛ, byela epuud nɛ ghiya ɛ, Yezu nyɛy pe nadi ɛ́ nyɛ moo dáa bɔɔ. Étɛp tak ɛ di náá, kɔ ɛsu ɛ ɛsyee ɛ lɛ, nyɛ naakwak dim mot mɛkɔŋ, mot nadi nɛ eghɛŋ kɔ esyee ɔ. 15 É di’enek, nyɛ naazɛpɛk bot tɔ bwoo ɛsyee nazemɛt bɛ, dáa ekwom membu nɛ mesee ɛ. 16 Etɛɛ náá, yɛ ɛ́ tsɛɛtsɛ, nyɛ nabɛ ɛ́ ààzyɛ étɛp ɛzɛkwyee efofop. Nyɛ nazyɛ ɛ́ étɛp ɛkwyee bot ɛ mɛbyel ɛ Abalaam✝. 17 Étɛp tak ɛ Zɛɛb nasa náá, nyɛ di tyee wat nɛ bɔn-nyɛɛg, étɛp nyɛ needi boo ghaa-Zɛɛb’ɔɔ na mbɛɛ lyem nɛ esosoob tɔ mɛsa mɛ Zɛɛb, étɛp Zɛɛb neepel mesyem mɛ bot ɛ bɔs djas. 18 É di’enek, dáa ye di náá, nyɛ nawaaa tɔ mɛbhowal ɛ, nyɛy nyɛ ɛmet naabee mezuk, nyɛ ɛ́ nɛ ghwyil kakwyee bot ɛ di tɔ mɛbhowal ɔ.