1 Isusul lã-dzãsi a ucenitsilor a lui: "Un avut avea ca icunom a aveariljei a lui un om tsi fu cãtigursit ti hãrgiuirea a aveariljei a lui. 2 Atumtsea elu lu acljimã sh-lji dzãsi: ‘Tsi easti aestã tsi ma avdu trã tini? Da-nji lugurii trã lucrul a tãu cã tini nu pots s-hii ma icunom.’ 3 Icunomlu dzãsi cu mintea a lui: ‘Nicuchirlu a meu va u ljea icunumia di la mini. Tsi s-fac? Si sap nu pot, s-mi fac dicunjar nj-yini arushini. 4 Mini shtiu tsi va s-fac tsi oaminjlji s-mi aproachi tu cãsili a lor, cãndu va mi scoatã ca icunom.’ 5 Ashãtsi lã acljimã un cãti un atselji tsi lji avea mprumut a nicuchirlui a lui sh-lji dzãsi a protlui: ‘Cãt lji hãrzãeshti a nicuchirlui a meu?’ 6 Elu lj-apãndisi: ‘Unã sutã di misuri di untulemu.’ Icunomlu lj-dzãsi: ‘Ljea muluyia a ta, apunã-ti sh-trãoarã scrii tsindzãtsi.’ 7 Deapoea ntribã un altu: ‘Ma tini cãt lj-ai mprumut?’ Elu lj-apãndãsi: ‘Unã sutã di misuri di grãn.’ Atumtsea icunomlu lj-dzãsi: ‘Ljea muluyia a ta shi scrii optudzãtsi.’ 8 Nicuchirlu alãvdã icunomlu atsel nindreptu, cã avea lucratã cu mintimenilji. Hiljilji a etiljei aishtei suntu ma mintimenji di hiljilji a lunjinãljei cu unu-alantu. 9 Trã atsea mini ma vã dzãc: Fãtsets oaspi cu averili a locului, cã cãndu s-ascapã avearea, s-vã aproachi tu cãsili di daima. 10 Cai easti pistimen tu njitsi, easti pistimen sh-tu mãri, sh-cai easti nindreptu tu njitsi, easti nindreptu sh-tu mãri. 11 Macã nu avets fut pistimenji tu averili atseali nindrepti, cai va s-vã pistipseascã tu averili di-alihea? 12 Sh-macã nu avets fut pistimenji tu averili a unui altu, cai va s-vã da avearea a voastra? 13 Vãrã huzmichear nu poati s-huzmitipseascã la doi nicuchiri. Elu, icã va aurascã unlu sh-alantu va lu va, icã va si s-leagã cu unlu sh-alantu va lu dispretsueascã. Nu putets s-huzmitipsits sh-a Dumnidzãlui sh-a pãrãlui."

14 Fariseilji tsi eara tãmãchear di pãradzi avdza itsido sh-arãdea cu Isusul. 15 Atumtsea elu lã dzãsi: "Voi hits atselji tsi nãintea a oaminjlor vã aspunets ndreptsã, ma Dumnidzãlu li cunoashti ininjli a voastri, cã atsea tsi easti anãltsat la oaminjlji easti urutã nãintea al Dumnidzãu."

16 "Legea sh-scriturili a prufitsilor agiumsirã pãnã tu chirolu al Ioan. Deapoea s-dimãndã amirãriljea a Dumnidzãlui sh-tuts s-cilistiseascã s-intrã aclo. 17 Cu tut atsea, ma lishor easti s-chearã loclu sh-tserlu, dicãt s-chearã macari un punctu di lege. 18 Caitsido tsi alasã muljearea a lui shi ljea unã altã, ncalcã curunea. Atsel tsi si nsoari cu unã muljeari alãsatã di bãrbatlu, ncalcã curunea."

19 "Eara un om avut, tsi s-nvishtea cu stranji di purpurã sh-suptsãri scumpi sh-cathi dzuã fãtsea chefi pri uspetsuri. 20 La usha a lui shidea un oarfãn, acljimat Lazar, tsi truplu lu avea mplinã di pledzi, 21 sh-vrea s-fãnãtea cu sãrmili tsi cãdea di measa a avutlui. Sh-cãnjilji yinea sh-alindzea pledzili. 22 Oarfãnlu muri sh-anghilji lu dusirã ningã di Abraham. Muri sh-avutlu sh-lu ngruparã. 23 Tu Colasi iu ma trãdzea munduirili, sculã ocljilji sh-vidzu di diparti Abrahamul cu Lazarul ningã nãsu. 24 Atumtsea elu grãi cu boatsi analtã sh-dzãsi: ‘Tate Abraham, s-tsã hibã njilã di mini, sh-pitreatsi Lazarul s-moalji dzeaditlu a lui tu apã shi s-nji audã limba, cã ma mi munduescu multu tu aestu foc.’ 25 Ma Abrahamul lj-dzãsi: ‘Hilje, adu a minti cã tini li loash bunili a tali tu bana a ta, iarã Lazarul atseali aralili. Tora elu s-hãrseashti sh-tini ti mundueshti. 26 Sh-pristi tuti, namisa di noi sh-di voi easti unã ahãndami mari, tsi atselji tsi vor s-treacã di aoa cãtrã voi nu poatã. Tutashã vãrã nu poati s-treacã di aclo cãtrã noi.’ 27 Avutlu lj-dzãsi: ‘Atumtsea, tate, tsã fac rigeai s-lu pitretsi la casa a tatãlui a meu. 28 Am tsintsi frats shi s-lã dimãndã tra s-nu yinu sh-elji aoa tu aestu loc trã munduiri.’ 29 Abrahamul lj-apãndisi: ‘Elji au Moisiul sh-Prufitsilji, prindi s-ascultã atselji.’ 30 Elu dzãsi: ‘Nu, tate Abraham, ma macã va s-ducã vãrã di mortsãlji la nãshi, elji va s-mitãnjiuseascã.’ 31 Atumtsea Abrahamul lj-dzãsi: ‘Macã nu ascultã Moisiul sh-Prufitsilji, atumtsea nu va s-cãndãrseascã sh-macã vãrã om si nyeadzã dit mortsã.’"