1 "Atumtsea amirãriljea a tserurilor va s-undzeascã cu dzatsi virghini, tsi li loarã cãndilili a lor sh-ishirã nãintea a dzinirlui. 2 Tsintsi di eali eara glari sh-tsintsi mintimeni. 3 Glarili, cãndu loarã cãndilili a lor, nu loarã cu nãsi sh-untulemlu. 4 Iarã mintimenili, deadun cu cãndilili, loarã sh-untulemlu tu vasili a lor. 5 Sh-metsi dzinirli ma s-amãna, lã vini somnu a tutulor sh-durnjirã. 6 Ma cãtrã njeadzã-noapti s-avdzã un griri: ‘Ia, ma yini dzinirli, ishits s-lu adunats!’ 7 Atumtsea tuti virghinili s-dishtiptarã shi ndreapsirã cãndilili a lor. 8 Sh-glarli lã dzãsirã a mintimenilor: ‘Dats-nã di untulemlu a vostru, cã cãndilili a noastri ma s-astingã.’ 9 Ma mintimenili apãndisirã: ‘Nu, cã nu va nã-agiungã, nitsi a noauã nitsi a voauã. Ma ghini njidzets la vindutorlji sh-acumpãrats.’ 10 Sh-cãndu eali s-dusirã s-acumpãrã, yini dzinirli. Virghinili tsi eara etimi, intrarã deadun cu nãsu la numtã, sh-usha si ncljisi. 11 Ma napoi vinirã sh-alanti virghini, dzãcãnda: ‘Doamne, doamne, discljidi usha.’ 12 Ma elu apãndisi: ‘Dealihea ma vã dzãc, cã nu vã cunoscu.’ 13 Trã atsea stats dishtiptat, cã nu shtits nitsi dzua nitsi oara cãndu va yinã."

14 "Amirãriljea a tserurilor undzeashti tutashã ca un om, tsi cãndu ma s-nchisea ti un cãlãtorii lã acljimã huzmichearlji sh-lã pistipsi a lor avearea a lui. 15 A unui lji deadi tsintsi talentsã, a altui doi sh-a altui un, a cuitsido dupã putearea a lui sh-fudzi pri cali. 16 Trãoarã atsel tsi avea loatã tsintsi talentsã s-dusi, sh-featsi pãzari sh-amintã tsintsi altsã. 17 Tutashã sh-atsel tsi avea loatã doi talentsã amintã doi altsã. 18 Iarã atsel tsi avea loatã un, s-dusi, disfeatsi unã groapã tu loc sh-ascumsi talentul a nicuchirlui a lui. 19 Dupã multu chiro, s-turnã nicuchirlu a huzmichearilor sh-featsi luguriili cu elji. 20 Sh-atsel tsi avea loatã tsintsi talentsã lj-ishi nãinti sh-lji adusi tsintsi altsã, dzãcãnda: ‘Doamne, tini nji ai pistipsitã tsintsi talentsã, ia cu atseali mini amintai tsintsi altsã.’ 21 Sh-nicuchirlu lj-dzãsi: ‘Bravo, huzmichear bun sh-pistimen. Tini fushi pistimen ti lucri njitsi, mini va ti bag pri mãri lucri. Haidi s-hãrseshti cu nicuchirlu a tãu!’ 22 Deapoea vini sh-atsel tsi avea loatã doi talentsã sh-dzãsi: ‘Doamne, tini nji ai pistipsitã doi talentsã. Ia, cu atseali mini amintai doi altsã.’ 23 Sh-nicuchirlu a lui lj-dzãsi: ‘Bravo, huzmichear bun sh-pistimen. Tini fushi pistimen tu lucri njitsi, mini va ti bag pri mãri lucri. Haidi s-hãrseshti cu nicuchirlu a tãu!’ 24 Tu bitisitã vini sh-atsel tsi avea loatã mash un talentu sh-dzãsi: ‘Doamne, mini lu shtiam cã eshti om aspru, tsi seatsiri aclo iu nu ai siminatã sh-adunji iu nu ai siminatã, 25 trã atsea avui fricã sh-mi dush sh-lu ascumshu talentul a tãu tu loc. Ia, mini ma ts-u tornu atsel tsi easti a tãu.’ 26 Sh-nicuchirlu apãndisi: ‘Huzmichear anapud sh-timbel! Tini lu shtiai cã mini seatsir aclo iu nu am siminatã sh-adun aclo iu nu am mpãrtsãtã. 27 Tini prindea s-lji-aveai datã pãradzli a meali la bancã sh-ashã, tu turnarea a mea mini va lji aveam loatã cu amintatic. 28 Trã atsea loats aishtui talentul shi dats-lu atsilui tsi ari dzatsi talentsã. 29 Cã atsilui tsi ari va lji si artirseascã ma multã sh-va aibã multu. Ma atsilui tsi nu ari, va-lj si ljea sh-atsea tsi ari. 30 Arucats-lu tu scutidlu di nafoarã aestu huzmichear arãu. Aclo va hibã plãngul sh-cãrtsãnirea a dintsãlor.’"

31 "Cãndu s-yinã Hiljiu a Omlui tu mãrirea a lui, deadun cu tuts anghilji, atumtsea va s-apunã pri thronlu a mãririljei a lui. 32 Sh-tuti natsiunili va s-adunã nãintea a lui, sh-elu va li dispartã unlu di alantu ashã cum disparti picurarlu oili di cãprili. 33 Sh-oili va li bagã di nandreapta a lui sh-cãprili di nastãnga. 34 Atumtsea Amirãlu va l-dzãcã atsilor tsi va hibã di nandreapta a lui: ‘Haidets ghinicuvintats a Tatãlui a meu. Mushtinits-u amirãriljea tsi s-featsi etimu trã voi di la adrarea a lumiljei. 35 Cã avui foami sh-nji deaditã ti mãcari, avui seati sh-nji deaditã ti beari, earam xen sh-mi priadunat, 36 earam dizviscut sh-mi nviscut, earam lãndzit sh-voi mi vindicat, earam tu hapsi sh-vinitã la mini.’ 37 Atumtsea ndreptsãlji va lji apãndiseascã: ‘Doamne, cãndu ti vidzum agiun sh-ti hrãnim, icã sitos shi s-deadimã ti beari? 38 Sh-cãndu ti vidzum xen sh-ti priadunãm, icã dizviscut sh-ti nviscum? 39 Sh-cãndu ti vidzum lãndzit icã tu hapsi sh-vinim la tini?’ 40 Sh-Amirãlu apãndisi: ‘Dealihea ma vã dzãc: Di cãti ori lji-u-avets faptã aestã a vãrui di aeshti fratsi a melji ma njitsi, aestã nji-u featsit a njia.’ 41 Deapoea elu va lã dzãcã sh-atsilor tsi va hibã di nastãnga: ‘Dipãrtats-vã di mini, blãstimats, tu foc di totãna, etimãsit ti draclu sh-anghilji a lui. 42 Cã aveam foami sh-nu nji deadit ti mãcari, avui seati sh-nu nji deadit ti beari, 43 earam xen sh-nu mi priadunat, dizviscut sh-nu mi nviscut, lãndzit sh-tu hapsi sh-nu vinit s-mi mutreat.’ 44 Atumtsea elji va lji apãndiseascã: ‘Doamne, cãndu ti vidzum cu foami icã cu seati, icã xen, icã dizviscut, icã lãndzit, icã tu hapsi sh-nu ti agiutãm?’ 45 Atumtsea elu va lã apãndiseascã: ‘Dealihea vã dzãc: Di cãti ori tsi nu lji-u avets faptã aestã a vãrui di aeshti ma njitsi, aestã nu nji-u avets faptã a njia.’ 46 Sh-elji va s-ducã tu munduiri di totãna, ma ndreptsãlji va aibã bana eternã."