1 Nene Paulo, ndikemeliwe kuvecha mnjagila va Yesu Kilisito ngita peikela Nguluvi. Baluwa iyi ndisimbile nene na lukolo lwetu Sositeni.

2 Tukuvasimbila nyenye lipinga lya vanu vemumdikiye Kilisito ukoya Kolindo. Nyenye nyemugitilwe vang'alile kwakwiwunga na Kilisito Yesu, muhaguliwe kuvecha vanu va Nguluvi pamwi na vanu vonda na konda vevakumusuka Mtwa vetu Yesu Kilisito yeagehe Mtwa venu na Mtwa vetu nefwe.

3 Ndikumsuka Nguluvi Daada vetu na Mtwa vetu Yesu Kilisito avagavile usanzi na lutengamaso.

4 Ndikumuhongecha Nguluvi vangu figono fyonda kwakuva lya nyenye, kwa usanzi vake yeavagavile kuchumbila Kilisito Yesu. 5 Kwa kwiwunga na Kilisito, Nguluvi avagavile kila kinu kyemung'ang'a na nondee mugehe na umwimike va kulonga kila kinu kyeasaka Nguluvi mulonge na kuchela kila kinu kyeasaka Nguluvi muchele. 6 Makani ago giwonesa kuva njowo cha Yesu Kilisito chetudalike kwa nyenye ndi cha undakyene, 7 ata semukapwemuka na fupo kuhuma kwa Muhe va Nguluvi pemuchindila kwa ng'elu ngomi kuwuya kwa Mtwa vetu Yesu Kilisito. 8 Nguluvi dakuvakangamicha ludali mbaka kumwiso neke mubihile kuwoneka na nongwa mukigono kila kya kuwuya kwa Mtwa vetu Yesu Kilisito. 9 Nguluvi daigita ago, kwakuva mwene ndi mndakyene. Mwene nde yeavakemeliye nyenye neke mwiwunge na Mwana vake Yesu Kilisito Mtwa vetu.

10 Ndeni, vakolo vangu muumwimike va Mtwa vetu Yesu Kilisito, ndikuvasuka nyenye vonda mubihile kwipinja kwa gala gyemwilonga neke kubihile kuvecha na mayaganiko pagati lyenu, muveche na lihocho limwi na natilo yimwi. 11 Vakolo vangu makani gyendipatile kuhuma kwa vanu vamonga va kukaye lya Kuloe gilonga vachi kuva kugehe na ndewo pagati lyenu. 12 Kila yumwi venu ilonga ndeni, "Nene ndikumfwata Paulo." Na yungi ilonga kuva nene ndikumfwata Apolo, yungi ilonga "Nene ndikumfwata Peteli." Na yungi ilonga "Nene ndikumfwata Kilisito". 13 Wuli, Kilisito agawanike? Wuli, Pauli nde yeavambilwe pakipindilihicho kwakuva lya nyenye? Awu mukabatiswe kwa litawa lya Paulo? 14 Ndikumuhongecha Nguluvi kwakuva sendikumbatisa munu yeyonda mugati lyenu ila Kilisipo na Gayo hela. 15 Kwihela munu yeivesa kulonga kuva abatiswe kwa litawa lyangu, 16 ena, ndikavabatise vanu vonda va kaye lya Sitefano, ila sendiwiwuka kuva ndikavabatisa na vanu vangi. 17 Kilisito seanilagiliche kuvabatisa vanu ila kudalika Njowo Nofu na ndigite ndeni se kwa kulonga njowo cha uginyange cha vanu cha kuvayovelecha, neke kufuwa kwa Kilisito pakipindilihicho kubihile kuyaganicha ludali chake.

18 Kwakuva unanzi va kufuwa kwa Kilisito Yesu palipindilihicho nde lukani lwa upufi kwa vala veviyaga, ila nefwe yetulowolilwa, unanzi uwo nde ludali lwa Nguluvi. 19 Ngita peisimbilwe mumasimbo gya Nguluvi,

"Dandihananga uginyange va vene uginyange

dandikana luhala, vevakwimbile."

20 Nondee, agehe kwiya mwene uginyange? Agehe kwiya muwulanichi va malagicho? Agehe kwiya yeivesa kwipinja chipindi ichi? Nguluvi agitile uginyange va inyi ugu kuvecha upufi.

21 Kwakuva muuginyange va Nguluvi, vanu sevawesa kumchela Nguluvi kwa kuhuvilila uginyange vawo. Ila Nguluvi akeliye kuvalowa vala vevadikila wula unanzi vetukuudalika, veukemilwe na vene uginyange kuva ndi upufi. 22 Vayahudi visaka vimanyilo neke vadikile na Vagiliki visaka uginyange neke vadikile. 23 Ila nefwe tukumlandula Kilisito yeavambilwe palipimdilihicho, unanzi ugu kwa Vayahudi ukuvagita vavipe na kwa vanu se Vayawudi nde upufi. 24 Ila kwa vala vonda vevakemeliwe na Nguluvi vaveche Vayawudi awu vaveche vanu se Vayawudi, Kilisito nde ludali lwa Nguluvi na uginyange va Nguluvi. 25 Kwakuva kyekiwonekana nde upufi va Nguluvi nde uginyange kuchumba uginyange va vanu na kila kyekiwoneka kuva nde usosovafu va Nguluvi, kigehe na ludali kuchumba ludali lwa vanu.

26 Vakolo vangu muwuwike chipindi Nguluvi peavakemeliye, volofu mugati venu vakali viwoneka ngita vihela uginyange pautalo lya vanu, kangi volofu semukachelilwe hilo na vanu, kangi semukababilwe mukaye cha vanu vakomi. 27 Ila Nguluvi akahagule makani gyegiwoneka na vanu kuva ndi gya upufi, neke avagavile soni vanu vene uginyange, kangi Nguluvi akahaguwe makani gyegiwoneka kwa vanu kuva gihela ludali neke avagavile soni vanu vene ludali, 28 Kangi Nguluvi akahaguwe makani gyegiwoneka kwa vanu kuva ndi ga panyi na kubedwa na veviwoneka kuva se kinu neke afihanange finu fyefiwoneka na vanu kuva ndi ngiba. 29 Nguluvi akagitile ndeni neke munu yeyonda abihile kwidumba pautalo lyake. 30 Nguluvi nde yeavawunganise nyenye na Kilisito Yesu. Nguluvi amgitile Kilisito aveche mginyange vetu. Kuchumbila mwene tudikilwa na Nguluvi, tuvecha vanu va Nguluvi yetukomboliwe. 31 Suwe, ngita peisimbilwe mumasimbo gya Nguluvi,

"Yeikela kwidumba,

na adumbe kwa kasi yeagitile Mtwa."