1 Munifwate nene ngita nene pendikumufwata Kilisito.

2 Vakolo vangu, ndikuvanjuma kwakuva mukundiwuka na mukolela mawulanicho gendivawulaniche nyenye. 3 Ila ndisaka muchele kuva Kilisito nde mutuwe va kila mgosi na mgosi nde mutuwe va mdala vake na Nguluvi nde mutuwe va Kilisito. 4 Suwe, kila mgosi yeifunya na yeilanducha unanzi va Nguluvi kuno agubike mutuwe vake, uyo akumgavila nyoni Kilisito. 5 Na mdala yeifunya awu kulanducha unanzi va Nguluvi ngajila kugubika mutuwe vake, akumgavila nyoni mgosi vake, uyo yeigita ndeni iwana na mdala yeimoga fwili chake. 6 Mdala yeseigubika mutuwe vake, ngiba amoge fwili chake. Ila nde nyoni kwa mdala kumoga fwili chake, suwe ngiba agubike kituwe kyake. 7 Se ngiba mgosi kugubika mutuwe vake, kwakuva mwene ndi mufanu na mkomi va Nguluvi. Ila mdala iwonesa akumginya mgosi vake. 8 Mgosi seakawumbilwe kuhuma kwa mdala, ila mdala akahumbilwe kuhuma kwa mgosi. 9 Mgosi seakawumbilwe kwakuva lya mdala, ila mdala akawumbilwe kwakuva lya mgosi. 10 Ndeni, mdala igubika mutuwe vake, iveche kimanyilo lya umwimike pakyanya lyake na kwakuva lya ndumindumi va kuluhano. 11 Ila kwa kwiwunga na Mtwa, mdala akumuhuvilela mgosi na mgosi akumuhuvila mdala. 12 Ngita ndeni mdala kahumile kwa mgosi, ndeni ndeni mgosi ibabwa na mdala. Ila kila kinu kihuma kwa Nguluvi.

13 Muswitiliche mwavene, wuli, ndingiba kwa mdala kumsuka Nguluvi ngajila kugubika mutuwe vake? 14 Wuli, mawumbile gya asili segiwonesa wachi kuva mgosi kuvecha na fwili chitali ndi nyoni kwa mwene? 15 Ila kwa mdala kuvecha na fwili chitali, ndi uginyange kwa mwene. Kwakuva agavilwe fwili chitali neke, chimugubike. 16 Ngita munu yeyonda yeisaka kupinja lukani ulu, nefwe twihela mawulanicho ngita ago, vala lipinga lya vanu vevamudikiye Kilisito, lihela mawulanichi ngita ago.

17 Pendave kuvagavila malagilicho aga, sendikuvanjuma, kwakuva pemwikwilundasa semugita makani manofu, ila mugita makani manjanganifu. 18 Tandi, ndipulike pemwitang'ana mulipinga lya vanu vevamudikile Kilisito, mukwinenga, ila muago gendipulike gangi ndi ga undakyene. 19 Kwa undakyene damwinenga pagati lyenu neke vala vevagehe va Nguluvi vachelwe. 20 Ndakyene, pemwitang'ana pamwi, se muliya kyakula kya Mtwa ngita peing'ang'wa! 21 Kwakuva pemwilia kila yumwi iliya ngajila kuvagavila vangi. Ndeni, vamonga venu vana njala na vangi vagalile. 22 Wuli, semwiwesa kulya na kunyuwa pakaye lyenu! Awu mukulibeda lipinga lya vanu vevamudikiye Kilisito na kuvagudisa avo sevihela kinu? Mwisaka, ndivalongile liki? Ndivanjume? Hamu, sendikuvanjuma kwa makani ago.

23 Kwakuva, ndikawanuke kuhuma kwa Mtwa mawulanicho gyendivagavile nyenye, Mtwa Yesu pamiye wuwula, peyave Yesu kubatwa, akautegula libumunda, 24 akamsuka Nguluvi, peamalile kumusuka, akaudumule, akilonga, "Ugu ndi muvili vangu kwakuva lyenu, mugite ndeni kwa kundiwiwuka nene." 25 Ndeni ndeni akanyamuwe kikombe kya difwayi, akilonga, "Iki ndi kikombe kya lyagano limiya yeiwoneswa kwa danda lyangu. Mugite ndeni, kila pemunyuwa kwa kundiwiwuka nene." 26 Kwakuva kila pemuliya libumunda ugu na kunywela kikombe ikyo, mwilanducha kufuwa kwa Mtwa, mbaka daiwuya. 27 Ndeni, kila munu yealiya libumunda ilyo awu kunywela kikombe ikyo kya Mtwa kwa ng'asi yeing'ang'wa, daavecha agitile sambi kwakuva abedile muvili na danda lya Mtwa. 28 Suwe, kila munu ayilolele yumwene, pambele nde ang'ang'wa kuliya libumunda na kunywela kikombe ikyo. 29 Kwakuva yeilya na kunywela ngajila kuchela muvili va Mtwa ndi kinu liki, alya na kunywela lihigo lwake yumwene. 30 Kuhumana na ilyo mugati lyenu, vagehe vatamwa na vasosovafu vangi vafuwe. 31 Ila ngita ngatuyilolele vavene ngatuhigilwe na Nguluvi. 32 Ila petwihigwa na Mtwa, twiwulanichwa tuveche vasanzi na tubihile kuhingwa pamwi na vanu se vakumchela Nguluvi.

33 Nondee, vakolo vangu, pemwitang'ana kulya kyakulya kya Mtwa, kila yumwi amchinde mweyage na mukwibuse kwa lukelo. 34 Na ngita kugehe na munu yeyonda yeagehe na njala, aliye kukaye lyake, neke pemutang'ana mubihile kuhigwa na Nguluvi. Na gangi gegisigaliye, dandilonga pendikwacha.