1 Wuli, nene semunu yendigehe pekesu? Wuli, nene semnjagila? Wuli, nene sendikamuwene Yesu Mtwa vetu? Wuli, kasi yendiigitile nene sende ivagitile nyenye kumdikila Mtwa?

2 Ata ngita vanu vangi vakuniwona se mnjagila, ndakyene nene ndi mnjagila kwa nyenye, kwakuva ludikilo lwenu kwa Mtwa iwonesa kuva nene ndilagilichwe na Mtwa.

3 Ilyo nde luchowo lwangu kwa vala vanu vevakunipinja, 4 wuli, nefwe setung'ang'wa kugavilwa fyakuliya na finu fya kunyuwa? 5 Wuli, setung'ang'wa kuvanyamula vadala vetu yevamudikiye Kilisito mulugendo chetu, ngita pevagita vanjagila vangi na vakolo vake Mtwa na ata Kefa? 6 Awu ndi nene hela na Balinaba vetung'ang'wa kugita kasi kwajili lya kwikala kwa nefwe? 7 Wuli, ndi mpuga ani yeihelela kufita chipindi chonda kwa sendi chake yumwene? Wuli, mgima ani yeseiliya manunu gya mgunda vake va misabibu? Wuli, nde ani yeikwamila lipinga lya vang'ong'oko na seinyuwa mavele gya vang'oko vake?

8 Njowo ichi chendilonga semahocho ga vanu hela, ila ata malagilicho ga Musa gilonga ndeni ndeni. 9 Kwakuva isimbilwe mululagilicho lwa Musa, "Ubihile kumuwopa mlomo senga peiliya mabenelo." Wuli, Nguluvi pealongile ndeni akali iywanga makani ga senga? 10 Wuli, seakali ilonga ago kwakuva lya nefwe? Ena, kwakuva yula yeigima na yula yeibena vonda vavili vang'ang'wa kupata pono lya mabenelo ago. 11 Ikiva nefwe tuvyalile mbeyu lya Kimuhe munumbula chenu wuli, setung'ang'wa kupata finu fya kututanga mukwikala uku.? 12 Ngita nyenye mwikwidikila kuvagavila vangi finu fya kuvatanga kwikala, ndakyene ata nefwe mwing'ang'wa kwidikila kutugavila finu fya kututanga kwikala.

Ila nefwe setukuvaswitilicha fila finu fyemung'ang'wa kutugavila fya kwikala, ila tuhuvilila mukila kinu, neke tubihile kuvakanila vanu kudalika Njowo nofu cha Mtwa vetu Yesu Kilisito.

13 Wuli, semchela kuva yeikumbanikila mukaye lya Nguluvi, vilya kyakulya kuhuma mukaye ilyo? Wuli, vala vevigita kasi mukindangavala kya kuhechela usembe, viwanuka pono lya usembe yeihechwa? 14 Mtwa akalagiche ndeni, vevidalika Njowo Nofu vapate kyakulya kyao kuhumana na kasi ilyo.

15 Ila nene sendikasakile kinu ata kidodo. Na vala sendisimba neke nene ndigavilwe finu ifyo, kwa nene ngiba kufuwa kuliko kumgita munu yeyonda anikane kwinjuma kuva ndidalika Njowo nofu ngajila kuhombwa. 16 Ila pendidalika Njowo Nofu sendiwesa kwinjuma kwakuva ndi kasi lyangu lya kudalika. Dandikiwona, ngasendidalika Njowo Nofu! 17 Ngita ngandihaguwe yune kasi iyi, suwe, ngandihuvilila kuhombwa, ila nondee nding'ang'wa kuigita, kwakuva Nguluvi yeanigavile ndiigite. 18 Nondee kuhombwa kwa nene ndi kinu liki? Mahombo gyangu nde aga, kudalika Njowo Nofu ngajila kuhombwa, ngajila kusuka mahombo gyeging'ang'wa kuhombwa kwajili lya kudalika Njowo Nofu.

19 Ndeni, nene se msutu va munu yeyonda, ndigehe pekesu. Ila kwakuva lya kuvatanga vanu vangi vamudikile Kilisito, ndiyivikile kuva msutu va vanu vonda. 20 Kwa vayawudi ndikali ngita Myahudi neke nivatange neke ndivatange vala vevifwata lulagilicho lwa Musa vamudikiye Kilisito, kwakuva nene sendigehe panyi lya lugilicho lwa Musa, ila ndikayivikile panyi lya lulagilicho kwa vawo neke ndivapate vevagehe panyi lya lulagilicho. 21 Na kwa vala vevihela lulagilicho lwa Musa, ndikali ngita ndihela lulagilicho ulo, ila se ngita ndihela lulagilicho pautalo lya Nguluvi, ila ndilongochwa na lulagilicho lwa Kilisito neke ndivatange vala vevihela lulagilicho vamudikile Kilisito. 22 Kwa vala vevagehe vasosovafu muludikilo, ndikayidikile kuva msosovafu ngita vene neke ndivatange avo vasosovafu muludikilo. Ndikagitile kila kinu kwa vonda neke ndiwese kuvalowa vamonga vawo.

23 Ndigita aga gyonda kwakuva lya Njowo Nofu cha Nguluvi, neke ndiwese kuwanuka lufunyo chake pamwi na vangi. 24 Wuli, se mwichela kuva mumkino va kunyila, vonda vinyila ila yeiwanuka fupo agehe yumwi hela? Ndeni ndeni na nyenye munyile hilo neke muwese kuwanuka fupo. 25 Vanyila vakwikanila kwa kila kinu, suwe vawo vigita ndeni neke vawanuke fupo yeyihanangika, Ila nefwe twikanila neke tuwese kuwanuka fupo yeseyihanangika. 26 Ata nene sendinyila ngita munu yeihela natilo, kangi senditovana ngita munu yeitova ngajila natilo. 27 Ila ndikuugita muvili vangu uhuvilile kwa kuugudisa na kuwuchovelecha neke pendimalila kuvadalikila vanu vangi Njowo Nofu, ndibihile kukanwa pautalo lwa Nguluvi.