1 Suwe, kutigila kyakulya kya kutambikila ming'omong'omo.

Ndichela mlonga kuva, "Nefwe vonda tugehe na luchelo." Ila luchelo ulo ukuvagita vanu vayidumbe, ila lukelo ukuvagangamicha volofu muludikilo. 2 Munu yeihocha kuva ichela kinu, ndakyene uyo seichela kinu kyokyonda ngita peing'ang'wa kuchelwa. 3 Ila ngita munu akumkela Nguluvi, munu uyo ichelwa na Nguluvi.

4 Ndeni, kutigila kyakulya kyekihechelwa tambiko kwa ming'omongomo, twichela kuva ming'omong'omo sekinu muinyi, twichela kuva kwihela valungulu vangi, ila Nguluvi agehe yumwi hela. 5 Ata ngita figehe finu fyefikemelwa valungulu vangu muinyi awu kuluhano na ata ngita kovali, valungulu volofu na vatwa volofu, 6 ila kwa nefwe agehe Nguluvi yumwi hela, mwene nde Daada yeaumbile finu fyonda na nefwe twikala neke tumugundamikile mwene. Kangi agehe Mtwa yumwi hela, nde Yesu Kilisito, kuchumbila mwene finu fyonda fiwumbilwe na nefwe twikwikala kwa ng'asi lyake. 7 Ila sekila vanu vonda vichela undakyene ugo, kwakuva vagehe volofu vevachoviye kugundamikila ming'omong'omo, mbaka nondee peviliya fyakulya ifyo, vakwiwona ngita vitambikilwe ming'omong'omo. Ndeni, vakwiwona vigita sambi, kwakuva sevakangiye muludikilo. 8 Ila kyakula sekiwesa kutuvika pepi na Nguluvi. Ata ngita tuliya kyakula setupwemuka na kinu na ata ngita tuliya setwikongelechwa kinu.

9 Ila mwilolele, upekesu venu ubihile kuvagita vangi, vevagehe na ludikilo usosovafu mubihile kuvagita vagite sambi. 10 Kwakuva munu munya ludikilo sosovafu, peakulola veve munya luchelo wiliya kyakula ikyo mugati lya kaye lya ming'omong'omo, wuli, seukumdobocha kulya kyakulya kyekitambikilwe ming'omong'omo? 11 Ndeni, uyo lukolo vako msosovafu va numbula ambalye Kilisito akafuwe kwajili lyake, daiyaga kwakuva lya luchelo lwako. 12 Ngita mukuvagita vakolo venu vagite sambi na kuvalemacha numbula chawo, damuvecha mumkosiye Kilisito. 13 Ndeni, ngita kila kyendiliya kikumgita lukolo vangu agite sambi, sendiliya ng'odo huchi, neke ndibihile kumgita mdikila mweyangu, agite sambi.