1 Ndiwesa kuvecha na umwimike va kulonga ng'ombelo chongofu cha vanu na ata cha vandumindumi va kuluhano kwa Nguluvi, ila ngita ndihela lukelo, ndiwana na lichwi lya lidebe lyelihela kinu na kyowo cha ngengele. 2 Ndeni ndeni, ngandivecha na umwimike va kupulika na kulonga unanzi kuhuma kwa Nguluvi na ndeni ndeni ngandicheliye lupwepo londa lwa Nguluvi na kuchela makani gyonda, kangi ngandivechile na ludikilo lukomi lwa kuhecha fidunda, ila ngita ndihela lukelo nene sekinu. 3 Kangi, ngandihecha finu fyangu fyonda kuvagavila vahangala na kuhecha muvili vangu unyanywe lyoto, ngita ndihela lukelo, seitanga kinu.

4 Munya lukelo uhuvilila na itanga vangi na munya lukelo ihela wifu na seakwidumba vala seihela kidada. 5 Munya lukelo akuvaginya vangi na seigita kuhocha makani gyake na munya lukelo seikumgita munu avipe kisatu na munya lukelo seiwuwika mahofu. 6 Munya lukelo seikedukila magito mahofu, ila akedukila magito ga undakyene. 7 Munu munya lukelo seidenyeka numbula na seileka kudikila na ihendelela kuhuvilila gyonda na seileka kuhuvilila.

8 Munu munya lukelo figono fyonda ihendelela kuwonesa lukelo. Ila fupo fingi figehe na mwiso vake, ngita fila umwimike va kupulika na kulonga unanzi va Nguuvi na kunywanga ng'ombelo miya na luhala, fyonda dafichumba. 9 Kwakuva kwa chipindi ichi tuchela makani madodo hela kuhuma kwa Nguluvi na tuwesa kulanducha makani madodo gegitugachela kuhuma kwa Nguluvi! 10 Ila kyekikamilike pekikwacha, fila fyonda sefikamile dafivecha sekinu.

11 Pendikali mwana ndikaywangile ngita mwana, ndachelige ngita mwana, ndahochile ngita mwana, pendikulile ndikalekile makani gya uwana. 12 Ila nondee tukwilola ngita petukwilola mulindala, ila pambele datukwilola unofu hilo. Nondee, ndichela hela ludodo, ila pambele dandichela gyonda ngita Nguluvi peakundichela nene.

13 Ndena, makani aga gadatu gakwikala mbepali, ludikilo na luhuvililo na lukelo na mugati gya ago leligehe likomi hilo ndi lukelo.