1 Vakolo vangu ndisaka muwiwuke kuva vala vagogolo vetu vonda yevalongochwe na Musa vevagubikwe na lifunde lya inyanza, vakahagime muinyanza. 2 Pevalongochwe na lifunde na kuchumba pagatigati lya inyanza, vonda vakali vabatisilwe vakavechile vanu va Musa. 3 Vonda vakaliye kyakulya kila kila kyekikahumile kuluhano kwa Nguluvi, 4 na vonda vakanyuwe gala malenga gya kimuhe, kwakuva vakanyuwe kuhuma muliganga, liganga ilyo nde Kilisito. 5 Ila volofu vamonga vawo sevakumkelesa Nguluvi na Nguluvi akavadochile na mafimba gyawo chikalutala kukwelu.

6 Suwe, makani ago ndi mufanu kwa nefwe, neke gatulakilele tubihile kudobokela uhofu ngita pevagitile vawo. 7 Mubihile kufunya ming'omong'omo ngita vamonga vawo pevakali, ngita peisimbilwe mumasimbo gya Nguluvi, "Vanu vakaliye na kunyuwa, vakaimile na kukina kwa nyoni." 8 Tubihile kugona ngita pevagitile vamonga vawo, mbaka vakafuwe vanu elufu isilini na chidatu kwa kigono kimwi. 9 Tubihile kumgecha Mtwa ngita pevakamgechile vamonga vawo na vakalumile na lyoka na va kafuwe. 10 Mubihile kung'ong'oleka ngita vamonga vawo pevakang'ong'oleka, navo vakadochilwe na mdocha.

11 Suwe makani aga gevapatile nde mufanu kwa vanu vangi, gakasimbilwe neke kutukalila nefwe vetwikwikala figono ifi fya mwiso.

12 Yeikwihocha imile unofu muludikilo, ayilolele neke abihile kuguwa. 13 Magecho gyemunagyo nde galagala gyevanagyo vanu vonda. Ila Nguluvi ndi mndakyene va kila lukani, mwene dasekuvaleka mugechwe hilo. Pemugechwa, Nguluvi akuvagavila ludali lwa kuhuvilila na ng'asi lya kuhega.

14 Ndeni, vakolo vangu, mubihile kukumbanikila ming'mong'omo. 15 Ndiywanga na nyenye vanu vene luhala, muhoche unofu aga gyendilonga. 16 Petukumuhongecha Nguluvi kwa kikombe kila kya lufunyo, kya kuwanganiswa na usembe lya danda lya Kilisito na libubunda lila lyetuketula, wuli, natilo lyake sekwiwunga na muvili va Kilisito? 17 Kwakuva libumunda ndi limwi, ila nefwe tugehe vongofu, ila ndi muvili umwi, kwakuva twevonda tuliya libumunda ulo.

18 Muvalolele avo Vaisilaleli veviliya usembe mukaye lya Nguluvi, wuli, sevawunganiswe na kindangavala kya maganga kya kuhechela litambiko? 19 Kyendisaka kulonga ndi iki, wuli, kyakula kyekitambikilwe ming'omong'omo ndi kinu? Awu na ago ming'omong'omo ndi kinu? 20 Ata ludodo! Kyendilonga ndikuva usembe vevihecha vanu sevamchele Nguluvi vakuvahechela mahoka, vala se Nguluvi. Ndakyene sendikela nyenye muwungine na mahoka. 21 Semwing'ang'wa kunywela kikombe kya Mtwa na kikombe kya mahoka, semung'ang'wa kuliya pamesa lya Mtwa na pamesa lya mahoka. 22 Wuli, mwing'ang'a kumvipisa Mtwa? Wuli, tugehe na ludali hilo kuchumba mwene?

23 Vanu vangi mugati lyenu vilonga, finu fyonda fidikilwe, ila sefyonda fitanga, ila nene ndilonga ata ngita finu fyonda fidikilwe, ila se finu fyonda fitanga kuchenga ludikilo. 24 Munu yeyonda abihile kusaka njowo chechikumutanga yumwe, ila uvatange vanu vangi.

25 Muliye kyekyonda kyekiguchwa musoko ngajila kuhucha wucha neke mubihile kugunika munumbula chenu, 26 kwakuva isimbilwe mumasimbo ga Nguluvi, "Inyi na fyonda fyefigehe ndi fya Mtwa."

27 Ngita munu yesemuidikila Kilisito, akuvalalika muhelele kuliya na nyenye mwisaka kuhelela, suwe, muliye fyonda fyeavavikile ngajila kuwucha wucha neke mubihile kwilata munumbula chenu. 28 Ila munu akivalongela. "Kyakula iki kihechilwe muming'omong'omo," Suwe, mubihile kuliya, kwakuva lya munu uyo yeavalongile abihile kwilata munumbula lyake na nyenye mubihile kwilata munumbula chenu. 29 Ndilonga aga, kwakuva lya kwilataka munumbula, ila se malato genu nyenye, ila ndi malato kwa yula yeavalongiye.

Damukunihucha, "Wuli, kwilata kwa munu yungi gakuniswitilicha nene kinu kya kugita? Ndiwesa kugita kyendikela. 30 Ndikumuhongecha Nguluvi kabula lya kuliya kyakula, ngita ndigita ndeni, kwa liki, ndiwoneka ndigita nongwa?"

31 Suwe, kinu kyekyonda kyemugita iveche kulya awu kunyuwa, mugite gyonda kwa kumkelesa Nguluvi. 32 Mubihile kuvagita vanu vangi vagite mahofu kwa Vayawudi awu kwa vanu se Vayawudi awu kwa lipinga lya vanu vevamudikiye Kilisito. 33 Muveche ngita nene, ndigecha kuvagitila vanu vonda manofu, ila sekwakuva lya kwitanga yumwene, ila kwakuva lya kuvatanga vanu vangi neke vaweswe kulowoliwa.