1 Vakolo vangu, chipindi pendachile kwa nyenye, kudalika unanzi va undakyene va Nguluvi, sendikali ndilonga kuwonesa kuva ndiwesa kulonga unofu awu kwakuva ndigehe na uginyange. 2 Kwakuva ndikalamuwe pendivecha kwa nyenye ndilonge makani ga Yesu Kilisito hela, hilo ndilonge makani ga kufuwa kwa mwene pakipindilihicho ngajila kulonga makani gangi. 3 Pendikali kwa nyenye ndikali msosovafu na munya wogofi hilo. 4 Chipindi pendikali ndi wulanicha na kudalika sendikali ndilonga njowo neke nyenye muniwene ndigehe na uginyange, ila ludali cha muhe va Nguluvi chikali chiwonesa undakyene. 5 Ndikagitile ndeni neke ludikilo lwenu uveche kuhuvila ludali lwa Nguluvi na se uginyange va vanu.

6 Ila igehe uginyange yetukuilonga kwa vanu vevamudikile Kilisito hilo, ila seuginyange va inyi, vala vevakuitavala inyi iyi vagehe na mwiso va kutavala, 7 uginyange yetukuilonga nde uginyange va lupwepo lwa Nguluvi yeifiamichwe kwa vanu, ambavo Nguluvi akalongile kuhuma pamwandi neke kutugavila usanzi vetu. 8 Kwihela vatavala va inyi iyi yevachela uginyange ugu. Ngita ngavachela ngasevamvambile palipindilihicho Mtwa va kuginywa yeatavala kuluhano na muinyi. 9 Ngita peisimbilwe mumasimbo gya Nguluvi.

"Kwihela munu yeawesile kulolela vala kupulika,

vala kwihela munu yeiwesa kuhocha kyekihumila,

ago Nguluvi gyeagavikile kwa vala vevakumkela."

10 Ila nefwe Nguluvi atuwonisile makani ago, kuchumbila Muhe vake. Kwakuva Muhe vake ilolela kila kinu, ata makani gyegifyamilwe na Nguluvi. 11 Nde ani yeivesa kuchela mahocho ga munu, ngita se muhe vake munu uyo? Ndeni ndeni, kwihela munu yeichela makani gya Nguluvi ila Muhe vake. 12 Nondee, nefwe setukawanuke Muhe va inyi, ila tukawanuke Muhe veuhumile kwa Nguluvi neke atugite tuveche kugachela gala gyetugavilwe na Nguluvi.

13 Ila nefwe setulonga kwa makani gyetuwulanichwe kwa uginyange va munu, ila kwa makani gyetuwalanichwe na Muhe va Nguluvi, tukilonga makani gya Muhe kwa vala vanu vene Muhe va Nguluvi. 14 Munu yeihela Muhe va Nguluvi, seawesa kuwanuka makani gyegihuma kwa Muhe va Nguluvi. Vihocha kuva nde makani gya upufi. Seiwesa kuchela kwakuva ago chichelwa kwa lutango lwa Muhe va Nguluvi. 15 Ila munu yeilongochwa na Muhe va Nguluvi mwene ichela makani gyonda, ila vanu vangi sevawesa kumchela mwene. 16 Ngita peisimbilwe mumasimbo ga Nguluvi,

"Nde ani yeichela mahocho ga Mtwa?

Nde ani ivesa kumuwulanicha?"

Ila nefwe tunagyo mahocho gegihuma kwa Kilisito.