1 Vakolo vangu, sendikaywangile na nyenye ngita vanu vemugehe na Muhe va Nguluvi. Ndikang'ang'ile kulonga na nyenye ngita vanu vevilongochwa na makani ga inyi, kangi ngita fyali vevikwikala mugati lya Kilisito. 2 Ndikavawulanicha mawulanicho mapefu kuchelwa ngita maye peakumgavila mavele mwana vake. Kwakuva semukawesile kuwanuka kyakula kigamu na ata nondee semuwesa kuwanuka mawulanicho makangafu ga Nguluvi. 3 Kwakuva mwikala ngita vanu vevilongochwa na makani ga muinyi. Mulolele pagati lyenu kugehe na wifu na ndewo, ago giwonesa kuva nyenye mulongochwa na makani ga muinyi na mwikala kwa fwata ludoboko cha inyi. 4 Yumwi venu peilonga, "Nene nde va Paulo", "Yungi nene nde va Apolo", Wuli, iyo seiwonesa kuva mukwikala ngita vanu va muinyi?

5 Apolo nde ani? Paulo nde ani? Nefwe nde vandumindumi va Nguluvi. Kila yumwi vetu igita kasi yeagavilwe na Mtwa. 6 Pendivalongile Njowo Nofu cha Nguluvi, ndikali ngita munu yeivyala mbeyu, ila Apolo akasukulila malenga, ila Nguluvi yeigita fimele na kukula. 7 Yeavyalile se kinu na yeasukulile malenga se kinu, ila kinu ndi Nguluvi kwakuva mwene yeagitile kila kinu fikule. 8 Yula yeavyalile na yeasukulile malenga vonda vakali na natilo limwi, ila kila yumwi iwanuka fupo lyake kuhumana na kasi yeigitile. 9 Kwakuva nefwe tugita kasi pamwi na Nguluvi, nyenye ndi mgunda va Nguluvi.

Kangi nyenye kaye lya Nguluvi. 10 Kwa usanzi veanigavile Nguluvi, nene ngita mchengaji yendichela kasi lyangu, ndikachengile kitamiko ambago munu yungi ichenga kukyanya lya kitamiko ugo, ila kila yumwi ing'ang'wa alolele peichenga kukyanya lyake. 11 Kwihela munu yeivesa kuuvangicha kitamiko wungi, badala va wula veuvikilwe suwe, kitamiko ugo nde Yesu Kilisito. 12 Pakyanya lya kitamiko ikyo munu ivecha kuchenga kwa madini gikemelwa sahabu awu madini gyegikemelwa feza awu maganga, ivecha kuchengelwa kwa simbili awu mikwati awu misoli. 13 Kila kasi yeigita munu daiwonekana kigono kila kya luhigo pekikwacha. Baho iwonekane inofu awu seinofu kigono ikyo kila kasi lya munu igechwa kwa lyoto. 14 Nguluvi dakumgavila fupo munu yeachengile kukyanya lya kitamiko ugo, ikiva kasi lyake sedaipiya na lyoto. 15 Ila ngita kasi lya munu igite kupiya, baho sedaigavilwa fupo lyake. Ila mwene dailowelwa ngita munu yeilowolwa mulyoto.

16 Wuli, semuchela kuva nyenye nde kaye lya Nguluvi, kuva Muhe va Nguluvi akwikala mugati lyenu? 17 Ngita munu akihananga Kaye lya Nguluvi, Nguluvi akumuhananga munu uyo. Na nyenye nde kaye lya Nguluvi. Nyenye nde mali lya Nguluvi.

18 Mubihile kwichanga. Munu yeyonda mugati lyenu kuhocha kuva agehe na uginyange muinyi iyi, ngiba aveche mpufi neke aveche na uginyange va undakyene. 19 Kwakuva uginyange va inyi ndi upufi pautalo lwa Nguluvi. Ngita peisimbilwe mumasimbo ga Nguluvi, "Nguluvi akuvagomecha vene uginyange muusugu gyawo". 20 Kangi isimbilwe mumasimbo gya Nguluvi, "Mtwa akugachela kuva mahocho gya vanu vene uginyange sekinu." 21 Kwakuva lya ago mubihile kwidumbila kilongochi yeyonda, kwakuva filongochi vonda vavikilwe kwa kuvatanga nyenye, ngita vanu va Nguluvi. 22 Ndiveche nene Paulo awu Apolo awu Kefa. Kangi Nguluvi avagavile finu fyonda kuvatanga fiveche fya muinyi awu uwumi awu kufuwa awu fila fyefigehe nondee awu fila dafikwacha fyonda ndi fya nyenye, 23 ila nyenye ndi vanu va Kilisito na Kilisito mwene ndi va Nguluvi.