1 Nondee, vakolo vangu, ndikela kuvawuwisa Njowo Nofu yendivadalikiye nyenye na mukawanuke na iyo nde ikuvagita mukwime ukangafu. 2 Ngita mukugafwata makani gendikuvalongela, damulowolilwa, ngita mubihile kugafwata suwe, kwidikila kwa nyenye ndi sekinu.

3 Nene ndikavagavile nyenye makani manofu hilo, ambago nene ndikagawanuke. Kuva Kilisito akafuwe kwakuva lya sambi chetu ngita peisimbilwe mumasimbo ga Nguluvi, 4 na akasililwe, akachulubuka kigono kya udatu ngita peisimbilwe mumasimbo gya Nguluvi, 5 kuva akambwitukila Peteli na pambele akavabwitukila vala vanjagila kumi na vavili. 6 Kangi, akavahumiye vanu miya chihanu, volofu vawo vave wumi, ila vamonga vawo vafuwe suwe. 7 Pambele akambwitukiye Yakobo kangi akavabwitukiye vanjagila vonda.

8 Mwiso va gyonda, akandibwitukila nene, nene ndikali ngita mwana yeababilwe chipindi sechake. 9 Kwakuva nene ndi mdodo hilo mugati lya vanjagila vonda, sending'ang'wa kukemelwa mnjagila, kwakuva ndikaligudile lipinga lya vanu vevamudikiye Kilisito. 10 Ila kwa usanzi va Nguluvi geunigitile ndiveche ndeni, usanzi vake kwa nene seukali va hela. Nene ndigitile kasi kuchumba vonda, ila senene, ila ndi usanzi va Nguluvi yeugitile kasi pamwi na nene. 11 Ndeni, ndiveche nene awu vaveche vala vanjagila vangi, vonda tudalika njowo chila chila chemudikiye.

12 Kilisito ilanduchwa kuva achulubuke, wuli, vamonga venu vilonga kuva kwihela kuchulubuka? 13 Nga kwihela kuchulubuka, suwe, Kilisito seakachulubuka, 14 ngita Kilisito seachulubuke, suwe, madaliko gyetu na kudikila kwa nefwe kwihela mana. 15 Kangi nefwe ngatuwoneke vaswida va udesi, kwakuva tukalongile kuva Nguluvi akamchulubucha Kilisito, ila ngita vanu sevachulubuchwa, suwe, Nguluvi seakamchulubuche Kilisito. 16 Ngita vanu vevafuwe sevichulubuka, suwe, Kilisito nave seachulubuchwe. 17 Na ngita Kilisito seachulubushwe, suwe ludikilo venu ndi va hela, musigala musambi chenu. 18 Ndeni ndeni vala vonda vevafuwe kuno vamudikiye Kilisito, vayagile tipu. 19 Ikiva luhuvililo lwetu kwa Kilisito ndi uwumi va nondee hela, Suwe, nefwe ndi vanu va kuwonelwa lusungu muinyi.

20 Ila undakyene ndi ugu, Kilisito achulubiwe kuhuma kwa vanu vevafuwe, mwene akali vakwanja kwa vala vevafuwe. 21 Kwakuva kufuwa kuletilwe na munu yumwi, ndeni ndeni na kuchulubuchwa kukaletilwe na munu yumwi. 22 Kwakuva vonda twifuwa kwakuva tuhumile kwa Adamu. Ndeni ndeni vonda davachulubuchwa kwa kwiwunga na Kilisito. 23 Ila kila yumwi daichulubuchwa kwa fwatatila ng'asi iyi, kwanja ivanga Kilisito, pambele daiwuya vala vevagehe vake davachulubuchwa. 24 Pegichumba ago, na mwiso peukwacha, Kilisito daakumgavila Daada Nguluvi Ung'achale, baho daakuvahananga vatavala vonda na vene umwimike vonda na vene ludali vonda. 25 Kwakuva ikumng'ang'a Kilisito atavale mbaka avasinde vachwindama vake vonda na kuvatavala. 26 Mchundamwa va mwiso kuhanangwa ndi kufuwa. 27 Ngita peisimbilwe mumasimbo, "Nguluvi avikile kila kinu muumwimike vake." Ila, masimbo pegilonga, "Finu fyonda fivikilwe panyi lya umwimike vake na atavale" Yiwoneka kuva Nguluvi seagehe panyi lya Kilisito, kwakuva Nguluvi yumwene nde avikile finu ifyo fyonda panyi lya Kilisito. 28 Baho finu fyonda dafivikilwa panyi lya mwana vake, baho Mwana dakuyivika panyi lya muumwimike va Nguluvi, yeavikile finu fyonda panyi lya Mwana vake, neke Nguluvi aveche mtavala va finu fyonda.

29 Ngita kwihela uchulubucho, vigita wuli vala vevibatiswa kwakuva lya vanu vevafuwe vakuhuvilila liki? Ngita vanu vevafuwe sevichulubuchwa, wuli, kubatiswa kwakuva lya vene? 30 Wuli, na nefwe twikwivika muluchango lwa kufuwa? 31 Vakolo vangu, nene ndigehe muluchago lwa kufuwa kila kigono! Ndikwidumbila kwakuva nyenye nde lipinga lya vanu vemumudikiye Kilisito Yesu Mtwa vetu, ndeikunigita ndilanduche makani aga. 32 Ngita luhuvilila lwangu ngalifechile lwa muinyi ugu, kutovana kwa nene na vanu ngita vang'oko vang'ali muumwani ugu va Ifeso, nganitangile liki? Ngita Nguluvi dakuvachulubucha, "Ndingiba kuliya na kunyuwa hela, kwakuva kilawu datufuwa."

33 Mubihile kuchangwa na vanu vevilonga ndeni kwakuva, "Vaganja vanjanganifu vihananga kyanda nofu." 34 Mulamwike nondee! Muleke kwendelela kugita sambi. Vamonga venu sevakumchela Nguluvi ng'odo. Ndikuvalongela aga, neke mulole soni!

35 Ila munu ivesa kuhucha, "Vanu vevafuwe vichulubuchwa wuli? Davivecha na muvili va namuna liki?" 36 Ago ndi mahucho gya upufi! Mbeyu yeivyalwa seimela mbaka ifuwe tandi. 37 Mbeyu yewivyala nde mbeyu hela, ivecha lya upemba awu yingi yeyonda, ila peimela ivecha na mvili wungi. 38 Ila Nguluvi akuigavila icho mbeyu mvili ngita peikela na kila mbeyu mvili vake.

39 Ndeni ndeni mivili gya fiwumbe fyonde sefiwana. Vanu vana muvili gwao na vang'oko vagehe na muvili gwao na fidege figehe na muvili gwao na somba vagehe na muvili gwao ndeni.

40 Kangi kugehe na mivili gya kuluwano na mivili gya muinyi, ila unofu va gila mivili gya kuluhano nde gaayina imwi na unofu va gila mivili gya muinyi nde gyaayina yingi. 41 Lichuwa lig'alika kwa unofu vake na mwechi ung'alika kwa namuna yingi na nondwa chig'alika kwa namuna yingi, ata nondwa sechikuwana kwa kung'alika kwake.

42 Ndeni ndepeivecha vanu davichulubuchwa. Ngita fila mbeyu, mvili usilwa mumganga na kuwola na dauchulubuchwa daseuwola. 43 Muvili peusilwa uhela uginyange na uhela ludali. Ila dauchulubuchwa uvecha unofu na vene ludali. 44 Muvili peusilwa, usilwa mumvili va munu, ila peuchulubuchwa uvecha muvili va kimuhe. Ugehe muvili va munu na kugehe muvili va kimuhe. 45 Kwakuva isimbilwe mumasimbo, "Munu va kwanja yeakemilwe Adamu, akali kiwumbe kene wumi," Ila Adamu vamwiso ndi Yesu mwene nde Muhe yeakuvagavila vanu wumi. 46 Ila muvili veulonguwe ndi muvili va huchi, pambele ukwacha muvili miya vetugavilwe na Muhe va Nguluvi. 47 Adamu va kwanja akawumbilwe kwa mganga, Kilisito va pili akahumile kuluhano kwa Nguluvi. 48 Vanu vonda va muinyi vagehe na mivili ngita Adamu yeuhumile mumganga na vala vevigehe kuluhanao vagehe ngita yula yeahumile kuluhano kwa Nguluvi, yende Yesu. 49 Ngita fila tuwanine na yula yeawumbilwe na mganga, mwene ndi Adamu na yula yeahumile kuluhano kwa Nguluvi, mwene ndi Kilisito.

50 Suwe, vakolo vangu ndilonga ndeni. Kila kyekigitilwe kwa muvili na danda sekivesa kwingila Mung'achale va Nguluvi. Na kyekihanganika sekiwesa kuwanuka kwanangika.

51 Mupulikiche, ndikuvalongela lupwepo. Nefwe setwifuwa vonda ila vonda twigalambuswa, 52 Chipindi cha lingalapi lya mwiso pelilanduchwa, baho baho ngita kudinda na kudindula meho, vanu vichulubuchwa na mivili segihanangika na nefwe datwigalambuliwa. 53 Kwakuva mivili gyetu igi gyegihanangika ging'ang'wa igalambuchwe kuvecha mivili segihanangika, mivili gyegifuwa giveche mivili segifuwa. 54 Ndeni, mvili ugu veuhanangika ngaugalambuka kuvecha mvili seuhanangika na kila kikifuwa pekigalambuka kiveche sekifuwa, baho nde undakyene peutimila ngita peisimbilwe mumasimbo, "Nguluvi ahanangile kufuwa na kufuwa kihanangike hilo!" 55 "Veve ludali chako cha kuletela ung'ali chigehe kwiya?

Veve kufuwa umwimike vako va kulemacha ugehe kwiya?"

56 Sambi chileta ung'ali va kufuwa na ludali lwa sambi chiwoneka kuchumbila malagilicho cha Nguluvi cheamgavile Musa. 57 Ila tumuhongeche Nguluvi yeatugavila nefwe usindi kwa kuchumbila Mtwa vetu Yesu Kilisito.

58 Suwe, vakolo vangu mwime kwa ukangafu, mubihile kugalambushwa na kinu kyokyonda. Figono fyonda mwendelele kugita kasi cha Mtwa kwakuva muchela kasi yemukumgumbanikila Mtwa daseiyaga hela.