1 Kugehe na njowo chilutiye kuva kugehe na ugoni mugati lyenu, ugoni weseugehe ata kwa vanu sevamchele Nguluvi. Ndilongilwe kugehe na munu igona na mdala va daada vake! 2 Mwivecha wuli kwidumba? Ngaivecha ngiba kwa nyenye kusugwima na kumuhecha mugati lyenu. 3 Ata ngita ndigehe kutali na nyenye ila numbula lyangu ugehe pamwi na nyenye. Ndeni, ngita fila ndigehe baho ndimuhigile suwe munu yeagitile lukani ulu lwa nyoni. 4 Pemwitang'ana pamwi kwa kumsuka Mtwa Yesu na numbula lyangu uvecha pamwi na nyenye na kangi ludali lwa Mtwa vetu Yesu Kilisito chivecha pamwi na nyenye, 5 mumleke munu uyo mumawoko gya Setani, neke muvili vake ugudiswe na muhe vake ulowolwe kigono kya kuwuya kwa Mtwa.

6 Kwidumba kwa nyenye se unofu. Wuli, semwichela kuva lisimika lidodo ligita utine wonda vakugelenicha libumunda kuvecha na lisimika? 7 Suwe, mwing'aliche kwa kumuhecha munu uyo muhofu mugati lyenu, kugita ndeni, iwana kuhecha lisimika lya dahila. Baho damuvecha vanu vamiya ngita utine veugalanichwe seuvikilwe lisimika na ndeni nde pemugehe nyenye. Kwakuva, Nguluvi akamuhechile Kilisito kuvecha usembe, ngita mwana ng'ondolo va Pasaka neke atulowole. 8 Suwe, tugite lihungu ilyo se kwa lisimika lya daha, ambalyo nde unjanganifu na sambi, ila kwa libumunda lye selivikilwe lisimika, nde numbula nofu na undakyene.

9 Ndikavasimbiye mubaluwa lyangu kuva mubihile kwiwunga pamwi na vagoni. 10 Ila sendikali na mana muleke kwiwunga na vanu va muinyi ugu, sengaivecha ndeni, ngamung'ang'ilwe kuhenga muinyi ugu neke mwinenge na vagoni na mwimi na vafyangu na vevakuifunya ling'omong'omo. 11 Ila ndikavasimbiye, mubihile kwiwunga na munu yeakwikemela akumdikila Kilisito ngita nyenye, ila mwene ndi mgona na mwimi na yeakumgundamila ling'omong'omo na yeyiyovelecha na mgalaji na muhichi. Munu yeagehe ndeni, ata kulya mubihile kulya pamwi na mwene.

12 Se kasi lyangu kuvahiga vanu vevagehe kwivala lya lipinga lya vanu vevamuidikiye Kilisito, avo Nguluvi yumwene nde dakuvahiga. Ila nyenye mwing'ang'wa kuvahiga vanu vevagehe mulipinga lyenu. 13 Nguluvi dakuvahiga vala vevagehe kwivala lya lipinga lya vanu vevamuidikiye Kilisito. Ngita peisimbilwe mumasimbo gya Nguluvi, "Muheche munu muhofu pagati lyenu."