1 Ngita munu yeyonda mugati lyenu agehe na ndewo na muyage, igecha wuli kumulata lukolo yeadikiye pautalo lya ludamo lya vanu seyevamchelile Nguluvi badala lya kulata pautalo lya vanu vevamchele Nguluvi? 2 Wuli, semwichela kuva vanu vevamuidikiye Nguluvi davahiga vanu va inyi ugu? Suwe, ikiva nyenye damuhiga vanu va inyi ugu, mwilemwa wuli kuhiga makani madodo madodo hela? 3 Wuli, semwichela kuva datukuvahiga ndumindumi va Nguluvi? Ngita ndeni, mwing'ang'wa kumalila nongwa ndodondodo ga uwumi vetu ugu. 4 Wuli, mukuvakemela vanu vevihela kyanda nofu vache kunjengakaya nongwa chenu? 5 Ndilonga ndena, neke mulole nyoni. Wuli, kwihela ata yumwi mugati lyenu munya uginyange va kuvanjengakaya vanu vevamudikiye Kilisito? 6 Ila nyenye muna kyanda lya kwilata mdikila kwa mdikila?

7 Pemwilata ndeni mwiwonesa kuva mlemwile hilo. Ngaivecha unofu kwa nyenye kumleka munu akugitile uwofu awu kunyaga finu fyenu? 8 Ila nyenye nde mwisulumu vanu na kunyaga finu fyawo, kangi mwigita ata kwa vadikila vayenu! 9 Awu se muchela kuva vanu vahofu setupata ung'achale va Nguluvi? Mbihile kwichanga! Vanu vagoni na vevakugundamila ling'omong'omo na vagosi vevidobokelana na kugona pamwi, 10 vahichi na mwimi na vagala na vaheha na vanyaga, avo vonda seviwecha ku Ung'achale va Nguluvi. 11 Vamonga venu mukali ngita avo. Ila nondee muwogofichwe kuhuma musambi na kunengwa muveche vasanzi pautalo lya Nguluvi kuchumbila Mtwa vetu Yesu Kilisito na kwa Muhe va Nguluvi vetu.

12 Munu ivecha kulonga kuva, "Ndidikilwe kugita kila kinu." Ena, ila sekila kinu ngiba kwa nene. Ndidikilwe kugita kila kinu kyendikela ila sendivecha msutu va kinu kyokyonda. 13 Vamonga venu vilonga, "Munu peivecha na njala ing'ang'wa kuliya, kwakuva mivili ging'ang'a kuliya." Nde peigehe, ila chipindi kikwacha, Nguluvi daigalambucha mivili gyenu daivecha seing'ang'a kyakuliya. Ila nondee mbihile kulonga kuva tung'ang'awa kugita ugoni, ngita peing'ang'awa kuliya chipindi pemuvecha na njala. Nguluvi seakawumbile mivili gyenu kwakuva lya ugoni, ila kwakuva lya kumgumbanila Mtwa na mwene Mtwa akugivika unofu mivili. 14 Kwa ludali lwake Nguluvi amchulubuche Mtwa na kangi datuchulubucha na nefwe. 15 Wuli, Semuchela kuva mivili gyenu nde fiwungo fya Kilisito? Wuli, mwivesa kunyamula muvili va Kilisito na kugita pono lya muvili lya mgoni? Hamu. 16 Kwakuva, ngita mwichela kuva yeavecha pamwi na mgoni ivecha muvili gumwi na mwene, ngita peisimbilwe mumasimbo ga Nguluvi, "Navo vavili davivecha muvili umwi." 17 Ila yeagehe pamwi na Mtwa ivecha muhe wumwi na Mtwa. 18 Muyiyepe na ugoni. Sambi chingi chonda ugitwa kwivala lya muvili, ila mgoni agita sambi kwa muvili vake mwene. 19 Semuchela kuva mivili gyenu nde Kaye lya Muhe va Nguluvi yeagehe mugati lyenu yemumuwanuke kuhuma kwa Nguluvi, nondee mivili igo se gyenu ila ndi gya Nguluvi. 20 Kwakuva Nguluvi avagulile kwa sendi ngomi. Ndeni mumnjume Nguluvi kwa mivili gyenu.