1 Suwe, vanu vatulolele kuva nefwe ndi vanjagila va Kilisito vetugavilwe lupwepo lwa Nguluvi tuchidalike. 2 Nondee, munu yeagavilwe kasi iyi ing'ang'wa kuvecha munu msanzi. 3 Kwa nene sekinu, kuhigwa na nyenye awu kuhigwa na ludamo lwa vanu, vala sendikwihiga yune. 4 Kwakuva sendihigwa kwa lyolyonda munumbula lwangu. Ila ilyo selikunigita ndiveche ndihela nongwa, Mtwa nde yeakunihiga. 5 Suwe, mubihile kuhiga munu yeyonda, mumchindile Mtwa peikwacha. Mwene akugagubutula makani mahofu gyegyafyamile na kuwonesa wachi kuva numbula cha vanu chikela liki. Baho kila yumwi ipatila njumwa yeing'ag'wa kugavilwa.

6 Vakolo vangu, ago gendilongile kwa njowo cha Apolo na nene, neke gavatange nyenye. Kuhumila na mufanu ugu va Apolo na nene nding'ang'a muchele mana lya njowo ichi, "Mugafwate gegasimbilwe mumasimbo ga Nguluvi." Pagati lyenu kubihile kuvecha na munu yeyonda yeakwidumbila munu yumwi na kumbeda yungi. 7 Ani yeakumwilile veve? Kinu liki veve seugavilwe? Ila ngita ugavilwe wuli ukwidumba ngita seugavilwe?.

8 Nondee mufipatile suwe fyonda! Muvechile vamosi suwe! Muvechile vang'achale ngajila nefwe! Ngita ngamuvechile vang'achile ndakyene neke na nefwe tupatile kuvecha vang'achale pamwi na nyenye. 9 Ila nefwe vanjagila ndilola kuva Nguluvi atuvikile vanu va kubedwa kuchumba vanu vonda, tugehe ngita vanu vevahigilwe kufuwa pautalo lya vanu, tugitilwe ngita vanu vakuhekwa baha painyi na kwa vandumindumi va kuluhano kwa Ngulivi na kwa vanu. 10 Ila vanu volofu vakutulola nefwe ngita vapufi kwakuva lya kumgundamikila Kilisito, ila nyenye mwikwilola mugehe na uginyange kwakuva mukumfwatila Kilisito! Nefwe tuwoneka tuhela ludali ila nyenye mwiwoneka muna ludali, nyenye muginywa, ila nefwe twibedwa. 11 Mbaka nondee, nefwe tugehe na njala na ng'elu, twihela myenda na twitovwa na twihela pono pa kwikala. 12 Kangi twiguda na kugita kasi kwa mawoko gyetu. Vanu pevakutuliga tukumsuka Nguluvi avafunye, vanu pevakutugitila uwofu tukuvahuvilila, 13 vanu pevakutusingisila, nefwe twihiga kwa ufokomasi. Ata nondee twiwoneka ngita uhafu mu inyi iyi kangi setung'ang'a hilo. 14 Sendisimba makani aga kwajili lya kuvakafuwa nyenye ila kwajili lya kuwawulanicha vana vangu vendikuvakela. 15 Ata ngita mugehe na vawulanichi volofu hilo kwa kwiwunga na kilisito, ila daada venu ndi yumwi hela. Nene ndikali daada venu kwa kwiwunga na Kilisito, kwakuva ndikavadalikile Njowo Nofu.

16 Ndeni, ndikuvasuka hilo mugite ngita pendigita nene. 17 Kwakuva ndimlagiliche Timotewo kwa nyenye. Mwene nde mwana vangu yendimkeliye yeihuvilila mukasi lya Mtwa. Mwene davawuwisa makani gyendikugafwata kwa kwiwunga na Kilisito, makani gyendiwulanicha kila mumapinga gya vanu vevamwidikiye Kilisito. 18 Vamonga venu vavangile kwidumba vakihocha kuva sendikwacha kangi kwa nyenye. 19 Ila ngita Nguluvi peikela, dandikwacha kisatu. Baho dandigachela makani gyegilongwa na avo vanu vevikwidumba na ndichele kuva vagehe na ludali cha Nguluvi. 20 Kwakuva Ung'achale va Nguluvi se kwa malichwi hela, ila mugala gevawesa kugagita muludali lwa Nguluvi. 21 Wuli, mwikela ndigite liki? Ndache na lubiki awu ndache na numbula lya lukelo na ufokomasi.