1 ଆରେକ୍‌ ତୁମି, ବେଣ୍ଡିଆବଃଳ୍‌ ନିଜାର୍‌ ଉବ୍‌ଜାଣ୍‌କାରିକେ ଏତାଉଆ; ବଃଲେକ୍‌ କଃରାପ୍‌ ସଃମୟ୍‌ ଆସୁଲି, ଜୁଣ୍‌ବଃର୍ସ୍‌ ତୁମି କଃଉଆସ୍‌, "ଇସଃବୁୟେ ମର୍‌ କାୟି ସୁକ୍‌ନାୟ୍‌, ସେସଃବୁ ବଃର୍ସ୍‌ ଚଃମେ ଅଃଉଁଲି। 2 ସେ ସଃମୟେ ବେଳ୍‌, ଜନ୍‌ ଆର୍‌ ତାରାମଃନ୍‌ ଅଃନ୍ଦାର୍‌ ଅୟିଦ୍‌, ଆରେକ୍‌ ହାଣିମାର୍ଲା ହଃଚେ ଆରେକ୍‌ ମେଗ୍‌ ଅୟିଦ୍‌ 3 ସେଦିନ୍‌ ଗଃର୍‌ଜାଗୁମଃନ୍‌ ତଃର୍‌ତଃରିଜାତି ଆର୍‌ ବଃଳ୍‌କାରି ଲକ୍‌ ତାର୍‌ ବଃଳ୍‌ ଆରାୟିଦ୍‌ ଆର୍‌ ରୁଚ୍‌ତା ଲକ୍‌ ଉଣା ଅଃଉତାର୍‌ ଗିନେ କାମ୍‌ ନଃକେର୍‌ତି, ଆରେକ୍‌ ଜର୍‌କା ବାଟ୍‌ ଦଃକ୍‌ତା ମାୟିଜିମଃନ୍‌କାର୍‌ ଆକି ଡିସିନଃକେରେ। 4 ଆର୍‌ ବାଟ୍‌ଦୁଆର୍‌ ବଃନ୍ଦ୍‌ଅୟ୍‌ଦ୍‌, ସେ ସଃମୟେ ରୁଚ୍‌ତା ସଃବଦ୍‌ ସୁଣା ନଃଜାୟି, ଆରେକ୍‌ ଚେଳେମଃନ୍‌କାର୍‌ କାନ୍ଦୁଣେ ଲକ୍‌ମଃନ୍‌ ଜାଗ୍ରତ୍‌ ଅଃଉତି ଆର୍‌ ବାଜାମାର୍ତା ଟକିମଃନ୍‌ ଦୁର୍ବଳ୍‌ ଅଃଉତି; 5 ଆରେକ୍‌, ସେମଃନ୍‌ ଉଚ୍‌ଟାଣ୍‌ ବିସୟେ ଡିର୍ତି ଆର୍‌ ବାଟେ ବିପ୍‌ତି ଗଃଟେଦ୍‌; ଆର୍‌, ବାଦାମ୍‌ ବୁଟା ହୁଲ୍‌ ହୁଟେଦ୍‌ ଆର୍‌ ଜିଟ୍‌କା ବଃଜେ ଟାଣୁ ଅଲେକାର୍ ବଜ୍‌ ଅୟିଦ୍‌; ମାନାୟିର୍‌ ସଃବୁ ଇଚା କମିଜାୟିଦ୍‌ ଆର୍‌ ତାର୍‌ ସଃବୁଦିନ୍‌ ରେତା ଟାଣେ ଜାୟିଦ୍‌ ଆର୍‌ କାନ୍ଦ୍‌ତା ଲକ୍‌ମଃନ୍‌ ବାଟେ ବୁଲ୍‌ତି;

6 ସେ ସଃମୟେ ରୁହାର୍‌ ମାଳି କଃଣ୍ଡ୍‌ କଃଣ୍ଡ୍‌ ଅୟିଦ୍‌, ସନାର୍‌ କପା ବାଙ୍ଗି ଜାୟିଦ୍‌, ମାଟିର୍‌ କପା ହାଣିଜାତା ଚଃମେ ଗୁଣ୍ଡ୍‌ ଅୟିଦ୍‌ ଆର୍‌ କୁୟାଁର୍‌ ଚକ୍‌ ବାଙ୍ଗିଜାୟିଦ୍‌; 7 ଆରେକ୍‌, ଦୁଳି ଆଗାର୍‌ ହର୍‌ ମାଟିୟେ ମିସି ଜାୟିଦ୍‌, ଆର୍‌ ଆତ୍‌ମା ମାପୁରାର୍‌ ଟାଣେ ବାଉଳି ଜାୟିଦ୍‌। 8 ସିକ୍ୟାଦେଉ କଃଉଁଲା ମଲ୍‌ନାୟିଲାର୍‌ ମଲ୍‌ନାୟିଲାରି ସଃବୁ ହେଁ ମଲ୍‌ନାୟିଲାର୍‌।"

9 ଆରେକ୍‌, ସିକ୍ୟାଦେଉ ଅଃଦିକ୍‌ ଗିଆନ୍‌ ହାୟ୍‌ଲାକ୍‌ ସେ ଲକ୍‌ମଃନ୍‌କେ ବଃଲ୍‌ ସିକ୍ୟା ଦିଲା; ଆରେକ୍‌, ସେ ହୁର୍ଦେ ବାବ୍‌ନା କଃରି ଆର୍‌ କଜି କଃରି ଗାଦେକ୍‌ ବଃଲ୍‌ ସିକ୍ୟା ହଃର୍କାରେ ଅରାୟିଲା। 10 ସିକ୍ୟାଦେଉ ବଃଲ୍‌ ବଃଚନ୍‌ କଜ୍‌ଲା ଆର୍‌ ଜୁୟ୍‌ରି ହୁରାହୁରି ଟିକ୍‌, ସେ ସଃତ୍‌ ବଃଚନ୍‌ ଲେକ୍‌ଲା।

11 ଗିଆନିଲକାର୍‌ ବଃଚନ୍‌ ତିତିର୍‍ ଡାଙ୍ଗ୍‌ ହର୍‌ ଆର୍‌ ବଃଚନ୍‌ ସୁଣାଉଁ ମଃନ୍‌କାର୍‌ ବଃଚନ୍‌ ତିତିର୍‍ ଡାଙ୍ଗାର୍‌ ହିଲ୍‌ କାଟା ହର୍‌, 12 ଆରେକ୍‌, ଏ ମର୍‌ ହିଲା, ତୁୟ୍‌ ସିକ୍ୟା ନେ; ଗାଦେକ୍‌ ବୟ୍‌ ଲେକୁକେ ସେସ୍‌ ଅୟିନଃକେରେ; ଆରେକ୍‌ ବେସି ଅବ୍ୟାସ୍‌ ଗଃଗାଳ୍‌କେ ତାକାୟିଦ୍‌।

13 ସଃବୁ କଃତା ଇରି; ସଃବୁ ସୁଣା ଜାୟ୍‌ ଆଚେ; ମାପୁର୍‌କେ ଡିରା ଆର୍‌ ତାର୍‌ ଆଦେସ୍‌ ସଃବୁ ମାନା; କାୟିତାକ୍‌ବଃଲେକ୍‌ ଇରି ହଃକା ମାନାୟିର୍‌ ହୁର୍ନ୍‌ ଦାୟିତାର୍‌ କାମ୍‌। 14 ଜୁୟିତାର୍‌ଗିନେ ମାପୁର୍‌ ହଃତି କାମାର୍‌, ବଃଲ୍‌ କି ମଃନ୍ଦ୍‌ ହଃତି ଲୁପ୍‌ତ୍‌ ବିସୟ୍‌ ବିଚାର୍‌ କଃରେଦ୍‌।