1 Kugon vi tanren Yeso a ban Bitrus, Yakubu, nga Yohana vayi Yakubu ran ngɨzhi wa hon hi gashi riwa a zen bran, waka hon kyumba. 2 Imba nye ka sran kpa wan kusi mba. Isi wan ka kpan ka ji, itsro wan ka kpan kinklan ka kpan wuru. 3 Imba wa ka to Musa nga Iliya, wa ran tre iwa Yeso.

4 Bitrus ka tre ri Yeso ri, <<Bachi, a bi nota ki he ri nyi. Inde wuto a bi, me ti bru ti tɨra ri wame, iri wa Musa nga Iliya.>>

5 Riwa a he rimi tre, ikpan wuru ka kɨshu wa ti, nga ran tre ka zhu ri kpawuru ran tre,<<Ri nyi a he vren won, riwa me nyɨme wu; ri wu me fe sisron. Sɨrenton ri wu!>>

6 Riwa miri ndu wa wo nga nyi, wa ka ku susi ri me, sisiri ka ti wa. 7 Ama Yeso ka ye ran bre wawo. <<Wurunde,>>A tre<< ran ti sisiri ran.>> 8 Riwa wa ya shu, wa ran to njo ran ara Yeso.

9 Riwa wa ran ye ri gashi, Yeso ka tre riwa ri, <<Ran la njo kya riwa bi to ran, tse chachu riwa Ivren Izhi a wurunde ri bubu gyuru.>>

10 Mirindu wan waka miye ri, <<Ngye nye wa tsro doka Musa ri no Iliya no gbuchi ye?>>

11 Yeso ka tre ri, <<Bi milan to, Iliya riwa ari milan kongye ti. 12 Ama ame me layi, lliya riga ye-e, ama wa ran to-u ran, ama wa ti kya riwa wasu riwu-e. Rimi nkon riri nye ivren nji ri soya ri womba.>> 13 Imba nye imirindu wan waka to ri ari tre riwa ritu Yohana nji riwa ari sonji tu ri ima.

14 Riwa wa ye ri kpa nji, nji ri ka chiwi ye ri Yeso ran kɨbu ngbazhu kusi wan. 15 <<Bachi, ya vren won ri si lo sron.>> A tre, <<Ari ku kpinkpi, ari to ya bran. Ari ye ka ku ri wuru ka rimi ima. 16 Me ngɨzhi-u ye ri mirindu wen, wa ran to den chuwo ran.>>

17 <<Yeso ka tre riwa ri, biyi wawa bi ran kpa nyime ran nga wa sentu wa ndzan nyin,>>Yeso ka tre,<<shitan me son ri yi? shitan me vu sron ri yi? Ngɨzhi vren mba ye ri me.>> 18 Yeso ka tre fu ri meme bɨzhi, nga ibɨji-a ka zhu jo rikpa vren-a, ka fe sii ri bubu wan.

19 Imba imirindu wan waka ye ri Yeso ri yayibi wari miye ri, <<Ingye ti ko kita kiran to dzu bɨzhi zhu ran?>>

20 Ka tre riwa ri, <<Yosron mbi he fiwen, me layi kpunji tre, ka yosron a tsra wɨlo su, bi to la ri ngbɨlu, chiwi rinyi hi mmu nga ari chiwi hi. Ikya ri ran han gbengbren wen ran.>> 21 Ama, bibi nyin a ran zhu ran tse ri bre Izhi nga vulaima.>>

22 Riwa waye kabruri Galili, ka lawa ri, <<Wa ban Vɨren nji no wa riwo nji. 23 Wa wuu-u. Nga a ari tashɨme ri vi ri tɨra.>>Imirindu wan waka ti shnji sron.

24 Riwa Yeso nga mirindu wan wa zhu ri gbu kafarnaum, wawa wa kpa nkɨren meme wa ye ri Bitrus wa ri mɨyen,<<Wa tsro tre mbi wa ran ri han nkɨren ri ko Izhi ran?>>

25 <<Een, ari han,>> A nyime.

Riwa Bitrus a ye rimi ko, Yeso ka gbuchi tre ri. <<ltaka wen he ngye Sima?>> A miyen.<<Ri ngha nye wa chu wa meme wa kpa ndu nga nkɨren ri wa miri mba ka ri wari? >>

26 <<Bitrus ka tre riwa ri,>>

Ka nyime,<<Waka chu miri joo,>>Yeso ka lawu 27 <<Ama ritu riwa kiran kpa sɨromba time ran, hi ri nchon nne wuri yongɨron, Ban Lambe riwa wu gbuchi vuu; wuri bu nyu wan wuto bibi nkɨren. Ban wu ka nowa ri nkɨren wa mo ri wa me.>> No wa.