1 Riwa wa ngɨzhi Yeso ri meme Batalami riwa wa yo wu ri Yudiya, ri vi riwa Hiridus a he chu. Wa to ntsen huwa riwa a zhu kusi nzan ye ri Urushalima 2 wari miyen ri, <<Ichu nji Yahuda riwa wa ngɨzhi ri Batalami he ri minyi? Ritu ki to ntsen wan kusi nzan, Ki ye riwa ki noo mkpen wan.>>

3 Riwa lchu Hiridus a wo nganyi ran ti fu bran bran, iwa wa gbu Urushalima wawu. 4 Imba ka yo wa de tre Izhi ri nji ri wa wa tsro doka Musa, ran miyen wa, <<Ri bubu gru nye wa ngɨzhi Kristo?>>.

5 Wa ka la wu ri, <<Rimi Batalami ri meme Yudiya,>> nganyi nye nji ri la tre Izhi a tre:

6 <A wu, Batalami, ri meme Yauza,

wa ran bla yo rimi wa chu wari bran ri meme Yahuza ran;

rimi wen nye ichu ri zhu riwa

ari ngɨzhi wa nji wan wa lsraila.>>

7 Imba Ichu Hiridus ka yo wawa wa to ntsen huwa ran miyen wa ri yayibi ivi riwa ntsen huwa a kri. 8 Ka ti wa ndu hi ri Batalami ran tre, <<Hi ri miyen wa bubu riwa ivren-a he. i bi to bi ka ye la mo me ri hi tre ri wu ngawen.>>

9 Riwa wa wo tre chu wari hu nkon mba inga ntsen huwa riwa wa to-u ri kusi nzan wa hu dza ntsen huwa ran hi, ntsen huwa ka kri ri bubu riwa ivren a he. 10 Riwa wa to ntsen huwa wa ka ngiri bran bran. 11 Riwa wa gra ri ko-a waka to vi vren imba yi wan Meremu, waka kɨbumgbazhu wari si kpimba wari noo wa tita wakpan rirri nga tulari mur imba luban. 12 Ama imba wa lawa ri mi raa i no wa ran bru hi ri chu Hiridus ngaran nga Wa ka hu nkon ri nkan hi gbu mba.

13 Riwa wa wulunde, ivren ri la tre ndu Izhi ka ye ri Yusufu rimi raa, ran tre riwu ri,<<Wulunde ri ban vren mba imba yi wan ri wulutsu hi ri gbu Masar ri son rimba sai me la ri wu, ritu Hiridus ri wa vren-a riwa ari wuu.>> 14 Imba Yusufu ka ban vren-a imba yi wan ran gra ri gbu Masar. 15 Yusufu a son rimi Masar hari kuu Hiridus. Rinyi a he ritu no tre riwa Bachi a tre dzu ri nyun nji ri la tre ri kusi, <<Rimi gbu Masar nye me yo vren won.<<

16 Riwa Hiridus a to ri wa to ntsen huwa wa gyuru wawu, isron wan ka time, imba ka de doka iri no wa wuu miri wawa wa ke see hari ban kugon ri gbu Batalami hari ri kusan wan, tse ri vi riwa wa to huwa waye la wawu. 17 Imba nye itre riwa Irimiya a ran la waka to a tsra:

18 <<Imba iran ka zhu ri Rama,

waka ti shinji sron wari yii bran bran.

Raila ka yii miri wan; ran ka wo gyuru ritu wa kuu.<<

19 Kugon riwa Hiridus a kuu, ivren ko Izhi ka ye ri Yusufu ri raa ri Masar 20 ran tre ri,<< Wulunde, wuri ban vren mba ri wawu yiwan wuri hi ri meme Israila, ritu wawa wa wa wari wuu vren mba wa kuu-e.<< 21 Imba ka wulunde ran ban vren imba yiwan ran hi gbu Israila. 22 Riwa Yusufu a wo ri Akilayus nye he chu ri gbu Judiya ri meme iko tiwan, ran ti sisiri riwa ritu wa la-u rimi raa, ran ban gon hi rimi gbu Galili 23 nga ran ka son ri gbu riwa wayo ri Nazarat, imba nye ikya riwa nji ri tindu Izhi a ran la ka ye tsra: <<Wa yo-u ri nji Nazarat.>>