Apocalipse 22

Ŋgwɛŋ ndə ĩ kɔ́ məchímbi

1 Ndʉʉmɛ, mbʉ wontəŋNyii dʉ̀ʼ ŋgwɛŋ tʉ mɔ ndə i kie muu ndə ĩ kɔ́ məchímbi, itʉ́ʉnə tə bɛ nə galashi, kə́ kè lɔ̀ hə ndəŋ yetə-Nyii-kə ghɔŋbə mbʉ Vaabinjyʉʉ, 2 kə́ kè tíŋ mu ntəŋntəŋ təfia mu mbʉ kəyəŋkwɛʼtəŋ. Ndə via-mbʉ-ŋgwɛŋ-kə təmiyɔŋ, tyʉkə ndə ĩ kɔ́ məchímbi nə ntɛ-məntɔŋ-hə-i kətʉ-ghɔ̄ njuɔ bûu nə wuŋ ndə ĩ kʉ́ʉnə ntɔŋmə-i ndəŋ chi təmiyɔŋ. Fyuŋ-mbʉ-kətyʉ-bə bɛ ndə məkɔ́ nchʉʼ tʉ lɔʼ-bətə̂ŋ-tə. 3 Fɔkə ndə i kie ndɔŋ-Nyii ndəŋ ghɔ kʉ̂ʉ nə bɛ mu mbʉ kəyəŋkwɛʼtəŋ fɛ, bɔŋ bu bɛ yetə-Nyii-kə ghɔŋ mbʉ Vaabinjyʉʉ muŋgɔ, vâafɔʼɔ-bi kə́ lə̀ʼtə ɔŋ. 4 Bɔ̂ŋ bu nyíɛ shʉ-i, bə nyɔ̀ʼ yie-e chutəyi-bɔŋ. 5 Ndʉʉbətyuʼ kʉʉ leʼnə bɛ ghɔ fɛ. Bɔ̂ŋ kʉʉnə leʼ kə́ kʉ́ʉ kɛʼɛ byuunɔ chichi ndə məchìi yəŋbə súunə tʉ bɔŋ fɛ, bʉʼka mbʉ Nyii Tiekətʉ bu kə́ báa ndəŋ bɔŋ, bɔ̂ŋ bu kə́ sɔ́ʼ bəfɔŋ gɛ̀gɛ̀ təmə liʼ-i nə bɛ ghɔ fɛ.

Məgwè Jiso

6 Ndʉʉmɛ, mbʉ wontəŋNyii ghɔ̀ŋ tʉ mɔ mbɔ, "Ŋgiebə-ɔ̄ŋ inchəŋ nɔ bɛ shʉəŋ bɔŋleʼ bɛ ŋgie-shʉəŋ-kə. Mbʉ Nyii Tiekətʉ ndə ɔ kɔ́ Lyʉʉhəkə-i tʉ bʉəyʉkəŋgie-bi, nɔʼ tə́ŋ wontəŋ-ɛŋ ndə məchìi vâafɔʼɔ-bi kínə nubə ndə i kie ndə gwègwè fyú sê." 7 Jiso ghɔ̀ŋ mbɔ, "Nyíɛ! Mɔ nɔ tʉʼ gwègwè. Tʉʉjyu nɔ bɛ yi-wo-yə ndə ɔ̈ yʉ́ bɔŋleʼ tʉ́ʼ ŋgiebə-ɔ̄ŋ ndə Nyii nɔʼ dʉ̀ʼ bə nyɔ̀ʼ mu ŋwɔʼnə-fɛ̄ŋ nɔ."

8 Mbəŋ-ɔŋ Jɔŋ, nɔ bɛ mɔ bɛ wo ndə mɔ kə yʉ́ bɔŋleʼ nyíɛ nubə-ɔ̄ŋ. Kʉ̂ʉ bɛ ndʉʉ ndə mɔ kə yʉ́ bɔŋleʼ nyíɛ, mɔ bʉ́ʉnə bəshʉ mbʉ wontəŋNyii ndə ɔ kə dʉ̀ʼ nubə-ɔ̄ŋ tʉ mɔ ndə mələ̀ʼtə ɔŋ. 9 Ɔ bɔŋ ghɔ̀ŋ tʉ mɔ mbɔ, "Kə a mə mùutə chìi nɔ fɛ! Mɔ nɔ bɛ wo-fɔ̀ʼ haʼ ndə a leʼnə bəliŋ-ba bʉəyʉkəŋgieNyii leʼnə bʉə bənchəŋ ndə bɔ̂ŋ tʉ́ʼ ŋgiebə ndə bə nyɔ̀ʼ mu ŋwɔʼnə-fɛ̄ŋ. A nɔ kie mələ̀ʼtə haʼ Nyii."

10 Ɔ ghɔ̀ŋ tʉ mɔ mbɔ, "Kə a mə lə̀ŋ ŋgiebə ndə Nyii nɔʼ dʉ̀ʼ ndə i bɛ mu ŋwɔʼnə-fɛ̄ŋ fɛ, bʉʼka ŋgwɔʼmbi nɔʼ kə́ŋhə. 11 Ẅo bʉ̂ʼʉ kə́ bìʼ fɔ̀ʼ bʉ̂ʼʉ-e, ẅo nyàatə ŋwɔŋ kə́ bìʼ nyàatə ŋwɔŋ-ɛŋ. Ẅo ndə ɔ tə́nə ndyʉndyʉ kə́ fɔ̀ʼ haʼ nubə ndə i bɛ ndyʉndyʉ, ẅo ndə ɔ bɛ ŋkʉʉ, kə́ fɔ̀ʼ haʼ ndə ntɛ ndə i bɛ ŋkʉʉ."

12 Jiso ghɔ̀ŋ mbɔ, "Yʉ́! Mɔ nɔ bɛ fia gwègwè, kə́ gwè nə kɛŋbə-ɔŋ kəghɔ-mɔ ndə məkɛ̀ŋ wotəmiyɔŋ haʼ ndə fɔʼtə-i bɛ. 13 Mɔ nɔ bɛ Fəŋ bɔŋ-kə́-leʼ bɛ Ndyiʼtəkə. Mɔ nɔ bɛ nchʉʉhə bɔŋleʼ kə́ bɛ ndyiʼtəkə, nɔ chʉ́ʉhə mɔ chʉ́ʉhə nubə inchəŋ, bɔŋleʼ lìʼ mɔ lìʼ nubə inchəŋ.

14 "Tʉʉjyu nɔ bɛ yi-bʉə-yə ndə bɔ̂ŋ sʉ̀ ndyihə-ʉə i bɛ itʉ́ʉnə mbɔ bɔ̂ŋ chʉʼ kie ghʉəʼkə ndə məyú ntɔŋmə ndəŋ tyʉkə ndə ĩ kɔ́ məchímbi bɔŋleʼ mbɔ bɔ̂ŋ chʉʼ leʼ sʉ́ʉ mu kəyəŋkwɛʼtəŋ tíŋ hə ndəŋ chu-lɔ̂ŋ-tə. 15 Bɔŋ njəŋmbi bɔ̌ŋ lɔ̂ŋ, nɔ tə́nə bûhə, bʉə-bəfʉ, bəŋghaa-bəsəŋ, bʉə yí bʉə, bʉə ndə bɔ̂ŋ tʉʼ gháa bənyii leʼnə wotəmiyɔŋ ndə ɔ kʉ̀ʉ məchʉ̀ə lɛɛŋkə bɔŋ-kə́-leʼ fɔ̀ʼ nu-kəlɛɛŋ-bə.

16 "Mbəŋ-ɔŋ Jiso nɔʼ tə́ŋ wontəŋ-ɔŋ ndə məgwè téʼ ntəŋ-ɔ̄ŋ tʉ a ndə mətéʼ tʉ bəchɔshi. Mɔ nɔ bɛ lyʉʼʉ ŋgwie bɔŋleʼ kə́ bɛ wo kəlɔŋ Dɛbi, kə́ bɛ lɔʼ ndʉʉfiimbi, ndə i báa daa."

17 Mbʉ kəLyʉʉhə ghɔŋ mbʉ Vaabəke ndə ɔ tʉʼ gɛ̀ lɔŋ nɔ ghɔ̀ŋ mbɔ, "Gwè." Wotəmiyɔŋ ndə ɔ yʉ́ yɔ̄ŋ-yə nɔ kie ndə məghɔ̀ŋ mbɔ, "Gwè." Ẅo ndə vaatʉʉ-i bɛ iyə́ŋnə gwè, ẅo ndə ɔ kʉ̀ʉ, fí muu ndə ĩ kɔ́ məchímbi təmə nyúɔnyúɔ fɛ.

18 Mɔ nɔ tʉʼ shyùu tyunə-wo-kə təmiyɔŋ ndə ɔ̈ yʉ́ nubə ndə i fyú hə mu ŋgiebə ndə Nyii dʉ̀ʼ bə nyɔ̀ʼ mu ŋwɔʼnə-fɛ̄ŋ nɔ. Kaʼ wo bìʼ nukə muŋgɔ, Nyii bìʼ ŋgʉəʼ ndəŋ ɔŋ ndə bə fʉ̀ʼtə mu ŋwɔʼnə-fɛ̄ŋ. 19 Bɔŋ-kaʼ-wo-leʼ fyúhə nukə ndə ŋgiebə-ɔ̄ŋ ndə Nyii dʉ̀ʼ bə nyɔ̀ʼ mu ŋwɔʼnə-fɛ̄ŋ nɔ, Nyii fyúhə yi-yə yʉʉ ndə tyʉkə ndə ĩ kɔ́ məchímbi leʼnə yʉʉ-i ndəŋ yəŋkwɛʼtəŋkə ndə i bɛ ŋkʉʉ, ndə bə fʉ̀ʼtə mu ŋwɔʼnə-fɛ̄ŋ.

20 Wo ndə ɔ fʉ̀ʼtə nubə-ɔ̄ŋ nɔ ghɔ̀ŋ mbɔ, "Mɔ nɔ bɛ fia leʼ shʉəŋ ndə məgwè." Ï bɛ haʼ nɔ. Gwè, Jiso Tiekətʉ!

21 Tə Jiso Tiekətʉ dʉ̀ʼ buuŋjyu-i tʉ bii bənchəŋ.*22:21 Bəbɛʼbəŋwɔʼnə kəŋgie-Gili nɔ ghɔ̀ŋ mbɔ tʉ bʉə-Nyii. Bəbɛʼbə ghɔ̀ŋ mbɔ tʉ bʉə-Nyii bənchəŋ.

Ï bɛ haʼ nɔ.