1 Ndə Bɔɔ ghɔŋ Banaba kə bɛ mu Antiɔk le, bʉə-Juu-bɛʼbə gwè hə Judia chʉ́ʉhə ndə mədàhə bʉə ndə bɔ̂ŋ nɔʼ kə bɛ́ŋ Nyii mbɔ kaʼ bɔ̂ŋ gòʼ təmə tʉ́ʼ nuʼ-Mushi ndə məfɔ̀ʼ ŋwɔŋtə-ʉə fɛ, bɔ̂ŋ la kie ŋkwaaNyii fɛ. 2 Bɔɔ ghɔŋ Banaba túŋ bəŋʉʉ ghɔŋ bɔŋ tə i kɔ́ kʉʉkə. Kəliʼ, bə chóʼ Bɔɔ ghɔŋ Banaba leʼnə bəbɛʼbə bʉə ndə bɔ̂ŋ nɔʼ kə bɛ́ŋ Nyii, tə́ŋ bɔŋ mbɔ bɔ̂ŋ gɛ̀ fʉ̀ʼtə nukə-ɔ̄ŋ tʉ bəlɔntəŋNyii ghɔŋbə bəntəŋbəshʉ mu chɔshi-Jɛlosalɛŋ.

3 Ndə chɔshi kə tə́ŋ bɔŋ le, bɔ̂ŋ tíŋ hə Fɔnishia leʼnə Samalia, gɛ̀ mətòʼ tʉ bʉə ndə bɔ̂ŋ nɔʼ kə bɛ́ŋ Nyii, kə́ fʉ̀ʼtə tʉ bɔŋ ndə bʉə ndə bɔ̂ŋ gòʼ təmə bɛ bʉə-Juu fɛ tʉʼ bɛ́ŋ Nyii, i kɔ́ tʉʉjyu tʉ bɔŋ.

4 Ndʉʉ ndə Bɔɔ ghɔŋ Banaba kə dàa Jɛlosalɛŋ, mbʉ bʉə-chɔshi, bəlɔntəŋNyii leʼnə bəntəŋbəshʉ fí bɔŋ mu bɔŋ nə tʉʉjyu. Bɔ̂ŋ fʉ̀ʼtə nubə nchəŋnchəŋ-ɛŋ ndə Nyii fɔ̀ʼ tʉ bɔŋ. 5 Bɔŋ bəbɛʼbʉə ndə bɔ̂ŋ nɔʼ kə fəŋ bɛ bəFalasi bɔŋ-nɔʼ-leʼ bɛ́ŋ Nyii, lɔ̀ tə́nə ghɔ̀ŋ mbɔ bʉə bənchəŋ ndə bɔ̂ŋ bɛ́ŋ Nyii təmə bɛ bʉə-Juu fɛ, bə la kie ndə məfɔ̀ʼ bɔŋ bɔŋleʼ kàhə bɔŋ ndə mətʉ́ʼ nuʼ-Mushi.

6 Bʉʼka nukə-ɔ̄ŋ, i chìi mbʉ bəlɔntəŋNyii ghɔŋbə bəntəŋbəshʉ, bɔ̂ŋ chə̀ŋtə kəyəŋ kəmɔʼ ndə məjìʼtə mu i. 7 Mu mbʉ nchəŋtə le, bɔ̂ŋ túŋ bəŋʉʉ yɔ́ŋyɔ́ŋ te nukə-ɔ̄ŋ. Bita lɔ̀ tə́nə ghɔ̀ŋ mbɔ, "Bəliŋ-bɔŋ, bii nɔ kínə mbɔ Nyii nɔʼ kə séʼ mɔ hə mu bii vɛʼbɛʼ ndə məgìe ŋgieNyiikə tʉ bʉə təmə bɔ̂ŋ bɛ bʉə-Juu fɛ, mbɔ b̈ɔ̂ŋ yʉ́ mbʉ ntəŋjyujyu, bɛ́ŋ Nyii. 8 Nyii ndə ɔ kínə fyiihə inchəŋ dʉ̀ʼ mbɔ ɔ nɔʼ bɛ́ŋ bɔŋ ndə məkɔ́ Lyʉʉhəkə-i tʉ bɔŋ haʼ ndə ɔ kə kɔ́ tʉ bʉʼʉ. 9 Təmə ɔ buŋ túhə shʉ tʉ bʉʼʉ bɔŋ fɛ bʉʼka mbɔ ɔ nɔ kə sʉ̀fyiihə-ʉə ghɔ tíŋ hə bɔ̌ŋ məmɔʼfyiihə-ʉə ndəŋ Nyii.

10 "Bɔŋ chìi ka nduɔ bii kə́ mùutə Nyii ndə məkóʼhə bɛʼkə ndəŋ vâafɔʼɔ-Jiso-bɔ̄ŋ, kə́ bɛ bɛʼkə ndə i chàa bʉʼʉ ghɔŋbə bətietie-bʉʼʉ ndə məbɛ̀ʼ? 11 Bɔŋ bʉʼʉ nɔ kínə mbɔ bʉʼʉ nɔ kie ŋkwaaNyii tíŋ hə bɔ̌ŋ buuŋjyu Jiso Tiekətʉ haʼ nə bɔŋ."

12 Bɔ̂ŋ bənchəŋ líitə mbɔ loʼo, bɔŋleʼ kɔ́ tyunəbə-ʉə ndə məyʉ́ Bɔɔ ghɔŋ Banaba ndə bɔ̂ŋ tʉʼ fʉ̀ʼtə nubəcheʼbə ghɔŋbə nuchíechubə ndə Nyii kə́ fɔ̀ʼ mu bʉə təmə bɔ̂ŋ bɛ bʉə-Juu fɛ, tíŋ hə bɔ̌ŋ bɔŋ.

13 Ndʉʉ ndə bɔ̂ŋ kə kwə́ʼ lí, Jɛŋ lɔ̀ hə sê ghɔ̀ŋ mbɔ, "Bəliŋ-bɔŋ, b̈ii yʉ́! 14 Simiɔŋ nɔʼ fʉ̀ʼtə tʉ bii ntɛ ndə Nyii kə fəŋ gɛ̀ mətòʼ tʉ bʉə ndə bɔ̂ŋ gòʼ təmə bɛ bʉə-Juu fɛ, ndə məséʼ yi-yə hə mu bɔŋ. 15 Məséʼ-ɔ̄, nɔ gwù nchəŋhə te nukə ndə bʉəyʉkəŋgieNyii nɔʼ nə nyɔ̀ʼ mbɔ,

16 ‘Nubə-ɔ̄ŋ kʉ̂ʉ tíŋ nɔ, mbəŋ-ɔŋ, Tiekətʉ, buŋ yi bʉ̀nə gwè,

bɔŋ kʉ̂ʉ yi gwè nɔ, bɔ́ŋ ntoʼ-Dɛbi ndə i nɔʼ kə nʉ̀ʉ fuŋ

bʉ̀nə chɔ̀ʼhə mbʉ ntoʼ ndə i nɔʼ kə kùunə tʉ́ʼ,

17 kə mbɔ bəʼ-bʉəməsʉʉ-kə bu bʉ̀nə gwè

tʉ Tiekətʉ ghɔŋbə bʉə təmə bɔ̂ŋ bɛ bʉə-Juu fɛ ghɔ,

bʉə bənchəŋ ndə mɔ tíi bɔŋ ndə məbɛ yɔŋ-yə.

Mbəŋ-ɔŋ, Tiekətʉ nɔʼ bʉ́ yɔ̄ŋ-yə.

18 Mɔ nɔʼ kə chìi, bə kínə yɔ̄ŋ-yə lʉ̀ hə ndəŋ ŋgwunə-mbi.’*

19 Nɔ, yɔŋ-yə ŋkwɛ nduɔ nɔ bɛ mbɔ b̈ii káa məchɔ́ŋhə bʉə ndə bɔ̂ŋ nɔʼ bɛ́ŋ Nyii təmə bɛ bʉə-Juu fɛ. 20 B̈ʉʼʉ bɔŋ nyɔ̀ʼ tʉ bɔŋ mbɔ bɔ̂ŋ mə kə́ yú fɔbə ndə bə nɔʼ fɛ̀ʼ bənyii nə yɔŋ-yə fɛ, təmə kə́ gháa bəsəŋ fɛ, təmə məkwó mbɔʼ nyaa ndə ɔ lʉ́ʉlʉ́ʉ fɛ, təmə kə́ nú fɔbʉəkə fɛ. 21 Bʉʼka mbɔ, bə nɔ nɔʼ kə lɔ̀ʼ nuʼ-Mushi mu yəŋkwɛʼtəŋbə təmiyɔŋ lʉ̀ hə bəshʉ bɔŋleʼ tíi mu njaaghaaNyii-bʉə-Juu-hə ndəŋ Chîlɔʼbə-ʉə təmiyɔŋ."

22 Ndʉʉmɛ, mbʉ bəlɔntəŋNyii leʼnə bəntəŋbəshʉ ghɔŋbə bʉə bənchəŋ ndə bɔ̂ŋ kə bɛ mu chɔshi-Jɛlosalɛŋ nyíɛ i bʉ̀ʉ mbɔ bɔ̂ŋ chóʼ bʉə, tə́ŋ bɔŋ Antiɔk ndə i bɛ mu Silia ghɔŋbə Bɔɔ leʼnə Banaba, mbɔ bɔ̂ŋ gɛ̀ fʉ̀ʼtə nubə-ɔ̄ŋ. Bɔ̂ŋ tə́ŋ Juda ndə bə kə́ tíi ɔ nə Basaba ghɔŋbə Sila ndə bɔ̂ŋ kə bɛ bəntəŋbəshʉ mu bʉə ndə bɔ̂ŋ nɔʼ kə bɛ́ŋ Nyii. 23 Mbʉ ŋwɔʼnə ndə bɔ̂ŋ kə gɛ̀ nə yɔŋ nɔ kə́ ghɔ̀ŋ mbɔ,

"Ŋwɔʼnə-ɔ̄ŋ nɔ lɔ̀ hə kəghɔ-bəlɔntəŋNyii ghɔŋbə bəntəŋbəshʉ, bəliŋ-bii ndə bɔ̂ŋ nɔʼ bɛ́ŋ Nyii, kə́ gìe tʉ bii bəliŋ-baʼa ndə bii gòʼ təmə bɛ bʉə-Juu fɛ, nɔʼ bɛ́ŋ Nyii mu Antiɔk, Silia leʼnə Silisia.

24 "Bʉʼka baʼa nɔʼ yʉ́ mbɔ bʉəbɛʼbə la lɔ̀ hə mu baʼa gwè kə́ byùutə mu-kətʉ-hə-ii nə nubə ndə bɔ̂ŋ tʉʼ dàhə təmə tə́ŋ baʼa tə́ŋ bɔŋ fɛ. 25 Baʼa dùʼ sê jìʼtə nyíɛ i bʉ̀ʉ mbɔ baʼa chóʼ bʉə tə́ŋ tʉ bii ghɔŋbə bəmbʉətə bətieŋkɔŋ-bʉʼʉ-bɔ̄ŋ ndə bʉʼʉ kʉ̀ʉ, Banaba ghɔŋ Bɔɔ, 26 kə́ bɛ bʉə ndə bɔ̂ŋ nɔʼ kɔ́ tʉkə-ʉə tʉ kwu bʉʼka yie-Jiso Klai, Tiekətʉ-yʉʼʉ. 27 Ndʉʉghɔfii, baʼa nɔ tʉʼ tə́ŋ Juda ghɔŋ Sila mbɔ b̈ɔ̂ŋ gwè fʉ̀ʼtə mbʉ bənu-ghɔ̄ tʉ bii nə chu-yʉə.

28 "Bʉʼka i nɔ bɛ nu-jyujyu-kə tʉ LyʉʉhəNyiikə ghɔŋbə mbəŋ-yaʼ mbɔ baʼa mə kóʼhə bɛʼkə liɛŋ-bii tə i tíŋ yɔ̄ŋ-yə fɛ: 29 mbɔ kə bii mə kə́ yú fɔkə ndə bə nɔʼ fɛ̀ʼ bənyii nə yɔ̄ŋ-yə fɛ, kə bii mə nú fɔbʉəkə fɛ, kə bii məkwó fɔ-lʉ́ʉ-kə fɛ, kə bii mə gháa bəsəŋ fɛ. Kaʼ bii fyúhə ŋwɔŋ-yii ndə nubə-ɔ̄ŋ, bii bɛ jyujyu. Bʉʼʉ bɛ́ŋ."

30 Ndʉʉ ndə bə tíŋhə bɔŋ, mbʉ bʉəntəŋNyii lɔ̀ gɛ̀ dàa Antiɔk, kʉ̂ʉ chə̀ŋtə mbʉ nuɔ-bʉə-buŋmbi kəyəŋ kəmɔʼ, téʼ mbʉ ntəŋ tʉ bɔŋ. 31 Bɔ̂ŋ kʉ̂ʉ tíi liʼ, i kɔ́ tʉʉjyu tʉ bʉə-Nyii bənchəŋ, bʉʼka mbʉ ŋwɔʼnə nɔ nə kwèʼhə bɔŋ ndə fɔʼɔ-yʉə.

32 Juda ghɔŋ Sila, bʉʼka bɔ̂ŋ kə bɛ bʉəyʉkəŋgieNyii hə mu bʉə ndə bɔ̂ŋ nɔʼ kə bɛ́ŋ Nyii, bìʼ kwèʼhə bɔŋ bɔŋleʼ kɔ́ ghʉəʼkə tʉ bɔŋ nə ŋgiebə buŋmbi ndə i fyú hə chu-bɔŋ. 33 Bɔ̂ŋ kʉ̂ʉ chí ghɔŋ bɔŋ ndə kʉʉkə məniʼ, tíŋhə bɔŋ nə fyiighʉ́ənə bʉ̀nə gɛ̀ nyíɛ mbʉ bəlɔntəŋNyii ndə bɔ̂ŋ kə tə́ŋ bɔŋ. 34 [Sila nyíɛ mbɔ ɔ bu chí chɔ ghɔŋ bɔŋ.] 35 Bɔŋ Bɔɔ ghɔŋ Banaba gɛ̀ Antiɔk, kə́ dàhə bɔŋleʼ lɔ̀ʼ ŋgie-Tiekətʉ-kə ghɔŋbə bəbɛʼbʉə ghɔ.

36 Mbyu-bəchî-hə kʉ̂ʉ tíŋ məniʼ, Bɔɔ ghɔ̀ŋ tʉ Banaba mbɔ, "B̈âʼa bʉ̀nə gɛ̀ mətòʼ tʉ bəliŋ-bâʼa ndə bɔ̂ŋ nɔʼ bɛ́ŋ Jiso, mu-bəyəŋkwɛʼtəŋ-hə inchəŋ ndə bâʼa nɔʼ kə lɔ̀ʼ ŋgie-Tiekətʉ-kə chɔ, chʉʼ nyíɛ ndə bɔ̂ŋ bɛ." 37 Ndʉʉmɛ, Banaba lyʉ̀ʉ mbɔ ɔ la bu lʉ̀ Jɔŋ ndə yie lɔʼɔ-ɛ kə bɛ Mak. 38 Bɔŋ Bɔɔ kwɔ̀ʼtə mbɔ i bu bɛ yʉʼ-kənu ndə məlʉ̀ ɔ ghɔŋ bɔŋ gɛ̀ mɔʼɔ fɛ, bʉʼka mbɔ ɔ nɔ nə ké bɔŋ vɛʼ ndə bɔ̂ŋ kə bɛ Baŋfilia təmə gɛ̀ ghɔŋ bɔŋ ndə mbʉ fɔʼɔ fɛ. 39 Bɔ̂ŋ túŋ bəŋʉʉ i shʉ́ə daa tə bɔ̂ŋ wɔ̀ʼtə. Banaba lʉ̀ Mak, bɔ̂ŋ ŋíi mu kəbuukwɛʼtəŋ gɛ̀ Siblɔ. 40 Bɔɔ séʼ Sila ghɔŋ ɔŋ gɛ̀ nə wʉə ɔ, ndʉʉ ndə bʉə ndə bɔ̂ŋ nɔʼ bɛ́ŋ Nyii nɔʼ kə chɔ̀ʼhə bɔŋ kɔ́ mu buuŋjyu Tiekətʉ. 41 Ndʉʉmɛ, bɔ̂ŋ tòʼ tíŋ hə Silia ghɔŋ Silisia kə́ kwèʼhə bəchɔshi ndə i bɛ chɔ.